BurhSira 16

Obuhanya bw’ababî

1Orhacîfinjaga okuburha ba-bunji-bwa-busha, orhacîshingiraga abâna b’ebyâbi. 2Orhacîshingaga ciru bankaluga, nka barharhînya Nyamuzinda. 3Arhalangaâliraga okulama kwâbo, arhalangaâliraga n’enjira balimwo, bulya muguma nkana ye mukulu aha cihumbi, n’aha omuntu akaburha enkola-maligo, akacîfira buzira mwâna. 4Omuntu muguma nkana anabumbe olugo, iburha ly’ababî kuhwa linahwa. 5Niene nabwîne n’amasù gâni bintu binji bishushana; nanayumva n’amarhwîri gâni ebiri bizibu. 6Omuliro gucîtuzire omu ndêko y’endyâlya, n’obukunizi buzûsire omu ngabo y’abagoma. 7Nyamuzinda arhababaliraga balya ba ciri-misî ha mîra, bagomaga erhi kulimbira emisî kurhuma1. 8Arhababaliraga olugo Loti2 aliyûbasiremwo, erhi obucîbone bwa benelwo bwamamugayîsa. 9Arhabaga bwonjo oku bûko bw’emihera3, boshi baholoka erhi byâha byâho birhuma. 10Akujirira n’engabo ya bihumbi magana galindarhu4, balya bacîhindulaga5 erhi buzibu bwa mirhima yâbo burhuma. 11Ciru ankabîre muntu muguma cikanyi-cirhagomba, okumuleka arhahanyirwi kwanasômerana, bulya obwonjo n’obukunizi biri bya Nyamuzinda, nn’olukogo ye na nn’oburhè. 12Obwonjo bwâge buluga, ci n’obukali bwâge burhali bunyi, anatwe olubanja lw’abantu nk’oku emikolo yâbo enali. 13Arhaleka buzira kuhana omunya-byâha n’amabî gâge, arhanalindîsa busha omuntu omurhînya. 14Abà wa lukogo lunji, ci ngasi muguma ashobôla nk’oku ebijiro byâge binali. 15Nyamuzinda adundaguzize omurhima gwa Faraoni mwâmi w’e Mîsiri mpu lyo amanyîsa emikolo yâge hano igulu. 16Obwonjo bwâge bucîyêrekana oku biremwa byoshi, obulangashane n’omwizimya abijirire abantu boshi.

Oluhembo ho luli

17Orhaderhaga, erhi: «Ka ntacîfulika oyo Nyamuzinda, eyo nyanya ndi wânkengêra?» «Ndi wajà anfukula omu karhî k’entuliri y’abantu?» «Ndi ntâye ekarhî k’ebiremwa binji6 ntya». 18Lolà: empingu, enyanya kurhaluka amalunga, ekuzimu n’igulu, okuyisha kwâge kwamâbigezamwo omusisi. 19Caligumiza entondo n’eciriba c’igulu, byamâgeramwo ogwa nyugunyu embere zâge. 20Ci kwône barhakengêra ebyo byoshi, ndi ogerêreza ogw’enjira zâge? 21Ciru n’omusirûla gurhabonekana, hôfi emikolo yâge yoshi gali mahwe. 22«Emikolo y’obushinganyanya7, ndi wayimanyîsa? Ndi wayirinda? Bulya endagâno eri kuli». 23Zo nkengêro z’omuntu w’obukengêre bwofi ezo, omuhwinja n’omuhabà barhalôrha elirhali isirhe.

Omuntu omu biremwa

24Nyumva, mwâna wâni, oyigîrire, ebinwa nakubwîra obirhege omurhima. 25Nakuyêreka olugero lw’enjira, nacîhangana nkuyumvîse omanye. 26aha murhondêro, erhi Nyamuzinda alema ebiremwa byâge8, oku ayûsirema, agabira ngasi ciguma aha cabêra. 27Ebiremwa byâge abihà olukere lw’ensiku n’amango, kurheng’emurhondêro gwâbyo kuhika okuli kw’amango. Ebiremwa byâge birhafà ishali, birhafà murhamo, na ntà mango bireka omukolo gwâbyo. 28Ntâco cisagihukula ecâbo, na ntà mango bibula kumuyumva. 29Nyamuzinda asinza igulu obwo, aliyunjuza ebinja byâge. 30Alihiramwo ngasi bûko bwa nsimba, n’omu idaho zânâshubire.