Lulanga lwa 91

Nyamuzinda ye Mulanzi w’Abemêzi

1We yimangirwe n’ow’enyanya, we bêra omu cizunguzungu c’Ogala-byoshi

2Obwîre Nyamwagirwa, erhi: «We lwâkiro lwâni, we n’ibuye ncîfulikaho, we Nyamuzinda wâni, we ncîkubagira.»

3Bulyâla yêne ye wâkulîkûza oku murhego gw’abahivi, oku cihûsi cidârhi.

4Akucinga n’amashala gâge, n’omu byûbi byâge mwo wâyâkira. Oburhabêsha bwâge yo mpenzi yâkucinga.

5Orharhînye ecôbà c’obudufu, orhanarhînye omwampi guhenesire mûshi.

6Orharhînye ecihûsi cahulahula omu mwizimya, nîsi erhi ecahira cakola emyônè mûshi.

7Bahirime cihumbi aha burhambi bwâwe, na bihumbi ikumi aha kulyo kwâwe, ci wêhe ababisha barhâkuhikeho.

8Câba nâwe wêne wâcibonera; wâbona oku ababî bahembwa.

9Bulyâla Nyakasane ye lwâkiro lwâwe, Ow’enyanya ye wajizire mpenzi yâwe.

10Okubî kurhakuhikeho, n’obuhanya burhayêrekere ah’oli.

11Kulya kubà àkuhizirekwo abaganda bâge, mpu bakulange omu njira zâwe zoshi.

12Bakuhek’aha nfune zâbo, mpu wakanasarhala okw’ibuye.

13Wâger’oku ntale n’oku mpiri, wâlabarh’empangaza olabarhe n’enkuba-joka.

14Nâmulîkûza kulya kubà acinyishwêkîrekwo, namucinga kulya kubà amanyire izîno lyâni.

15Ampamagala mmuyumve, akajakw’embaka erhi rhwe naye rhunali, namukulakwozo nnamuhè irenge.

16Nâmuyigusa n’omwandu gw’ensiku, nâmuyêreka n’oku nciza abandi.