Lulanga lwa 30

Omunkwa gw’omuntu ofulumusire akâga k’okufà

1Lulanga. Lwimbo lw’omugisho gw’aka-Nyamuzinda. Lwa Daudi.

2Nkola naderha aminjà gâwe, Nyamwagirwa: wandîkûzize Muhanyi, orhanazigaga abashombanyi bâni bacîzigiriza nie ntumire.

3Yâgirwa Nyamuzinda wâni, nshuba nakuyâkûza wananfumya.

4Omu kuzimu wakûzire omûka gwâni Nyamwagirwa: mwo wankûzire muli balya bayandagalira omu mwîna.

5Mwe barhonyi ba Nyakasane; nêci mumuzihire là! munavuge izîno lyâge litagatîfu omunkwa.

6Kulya kubà oburhè bwâge hisanzi hityunguni bushinga, oburhonyi bwâge bwôhe oku omuntu ahabà erhi ho bunabà.

7Omu muhimbo gwâni nâyisha, nti: «Ntakafà nâdunzirwe».

8Nyamwagirwa erhi okola wantonya, wampà irenge wampà n’obuhashe; erhi ocibà nka wanfulika obusù bwâwe, najuguma nageramw’omusisi.

9Yâgirwa w’ono nkola nayâkûza, bwonjo bwa Nnawîrhu Nnâmahanga buno nkola nasengera:

10Bunguke buci wankakûla omu mukò gwâni, nîsi erhi omu kujà emwîna kwâni? K’oluvù lwo lwakukuza, nîsi erhi lumanyîse oburhabêsha bwâwe?

11Yâgirwa onyumve onambabalire, obè mufungizi wâni, Muciza w’abantu.

12Omulenge nàlimwo waguhindwîre gwashuba masâmo; busunzu nali nyambîrhe wamushwêkûla wanyambika enshagadu.

13Omurhima gwâni gukolaga gwakuzihira gurhacihuse Yâgirwa Nnâmahanga nâkaz’ikukuza omu myâka n’emyâka.