BIBLIYA NTAGATIFU OMU MASHI
Lulanga lwa 29
Olwimbo kuli Nyamuzinda Nnankubâ
Lulanga. Lwa Daudi.
Mukazirhûla Nyakasane, bene Lungwè we,
Mukazirhûla Nyakasane irenge n’obukulu.
Mukazirhûla Nyakasane irenge likwânîne izîno lyâwe, mukaziharâmya Nyakasane n’omwambalo gukwânîne.
Izù lya Nyamuzinda lirhalusire ery’amîshi, Nyamuzinda Nnâmahanga akûngwîre: amîshi manji-manji gacîhambage.
Izù lya Nyakasane obuhashe lijira wâni! Izù lya Nyakasane lirhaluga wâni!
Izù lya Nyakasane linahongole enduluma, Nyakasane anahongole enduluma z’e Libano.
Anarhume ecihugo ca Libano cahama nka mutwîrà arhume na Siriyoni ahama nka kanina ka mbogo.
Izù lya Nyakasane linamanule engulumira y’omuliro.
Izù lya Nyakasane linadirhimanye irungu, Nyakasane anageze irungu lya Kadesi mw’omusisi.
Izù lya Nyakasane linakube emirhi lisige emizirhu bûmu-bûmu: n’omu ngombe yâge boshi kwo baderha, mpu: Aj’irenge!
Nyakasane atamîre agandâza kurhaluka ecihonzi, Nyakasane ye wanayôrha ayîmire ensiku n’amango.
Nyakasane ye wâyîsh’ihà olubaga lwâge emisî, Nyakasane ye wâyîsh’igisha ishanja lyâge omu kulihà. omurhûla.
BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.