Lulanga lwa 21

Okuvuga omunkwa oku minjà Nyakasane àjirîre mwâmi

1Gwârhi omukulu w’abimbiza. Lulanga. Lwa Daudi.

2Yâgirwa Nyakasane, mwâmi adwîrhe acîshingira emisî yâwe, oburhabâle bwâwe bumuyunjuzize mwishingo.

3Wàmushobôzize eci omurhima gwâge gucîfinja, orhanabulaga bwayumvîrhiza omusengero gw’akanwa kâge.

4Wanacimuhà obwangà burhajirwa na wundi, wamuyambika ishungwè ly’amasholo oku irhwe.

5Akushenga obuzîne, wamuhabwo, wayûshûla ensiku z’akalamo kâge kuhika ensiku n’amango.

6Oku burhabâle bwâwe irenge lyâge liri linji, wamuhîre obukuze n’obulangashane.

7Nêci, wamuhîre obwangà bw’ensiku n’amango, wamusîmîsa n’obusîme bw’omu masù gâwe.

8Bulya mwâmi acîkwîkubagîre Nyakasane, arhankahuligana kulya kubà arhabirwe n’enshôkano y’Ow’Enyanya.

9Okuboko kwâwe kwâhika oku bashombanyi boshi, okulyo kwâwe kwâgwârha abanzi bâwe boshi.

10Wàbajira nka cibêye cayâka olusiku waciyêrekana, Nyakasane abaherêrekeza omu bukunizi bwâge; n’omuliro gwabamirangusa.

11Iburha lyâbo waliherêrekeza en’igulu, n’ishanja lyâbo wâlikaga omu bâna b’abantu.

12Ciru bankaja migabo y’okukujira kubî, ciru bankajira amenge, barhankakuhasha.

13Nêci, wabalibisa, wabafôlera omuherho gwâwe.

14Baduka, Nyakasane, omu buhashe bwâwe: rhuyimbe rhunakuze oburhwâli bwâwe.