BIBLIYA NTAGATIFU OMU MASHI
Lulanga lwa 20
Nyamuzinda aciza mwâmi
Gwârhi omukulu w’abimbiza. Lulanga. Lwa Daudi.
Mâshi Nyakasane akuyumvirhize omu lusiku lw’amalibuko, izîno lya Nyamuzinda wa Yakôbo likulange!
Akurhumire oburhabâle kurhenga ebwâmi bwâge butagatîfu anakulange kurhenga e Siyoni.
Ayibuke entûlo zâwe zoshi, anasîme enterekêro yâwe.
Akushobòze eci omurhima gwâwe gucìfinja, anakurhabâle obone ehi olonza hyoshi.
Mâshi rhucîshingire okuhimana kwâwe, rhunashûrhire izîno lya Nnâhamwîrhu Nyamuzinda engoma. Nyakasane ayumvîrhîze ensengero zâwe zoshi!
Lêro nkola mmanyire oku Nyakasane aciza omushîgwa-mavurha wâge; kurhenga ebwâmi bwâge butagatîfu bw’omu malunga amuyumvîrhiza, omu kurhwalihya okuboko kwâge mpu kuhimane.
Baguma ngâlè zâbo bacîkubagira, abandi endogomi zâbo; rhwêhe izîno lya Nyakasane Nnâhamwîrhu Nyamuzinda lyo rhucîkubagira!
Bôhe bahimirwe banahirima, nîrhu rhuli bwimanga rhunazibuhire!
Nyakasane, fungira mwâmi; orhuyumvîrhize olusiku rhwakubirikira.
BIBLIYA NTAGATIFU OMU MASHI. Copyright © 2024 BUKAVU Mashi and other Kivu Languages Bible. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.