Lulanga lwa 115

Obukulu n’obwinjà bwa Nyamuzinda w’okuli

1Irenge arhali rhwe Yâgirwa, ci izîno lyâwe Waliha, bulya oli mwinjà orhanarhebana.

2Cici càkazirhuma ab’emahugo barhukangula, mpu: «Ngahi Nyamuzinda wâbo aligi?»

3Nyamuzinda wîrhu omu mpingu abâ, ebi alonzize byoshi byo anajira.

4Ebi bagashâniza abo biri bya cûma, biri bya masholo, bunali bushanja burhenga omu nfune z’abantu.

5Bigwêrhe akanwa birhanaderha, bigwêrhe amasù birhanabona.

6Bijira amarhwîri birhanayumva, bijira amazûlu birhanabayirwa na cici.

7Bijira amaboko birhanahuma kantu, bijira amagulu birhanarhenga aha biri; ciru ntà izù lirhenga ekanwa kâbyo.

8Ababitula babishushe, ngasi boshi babihirakw’omurhima babishushe.

9Enyumpa y’Israheli yôhe Nyakasane ecîkubagira, Ye Mufungizi wâbo ye na mpenzi yâbo.

10Enyumpa ya Aroni yôhe Nyakasane ecîkubagira, Ye Mufungizi wâbo ye na mpenzi yâbo.

11Abarhînya Nyakasane yêne bahirakwo omurhima ye mufungizi wâbo ye na mpenzi yâbo.

12Nyakasane arharhuyibagira, kugisha arhugisha, kugisha agisha enyumpa y’Israheli, kugisha agisha enyumpa ya Aroni.

13Agisha ngasi boshi barhînya Nyakasane, abarho n’abakulu.

14Nyakasane âmmuluza, mw’oyo n’abâna binyu,

15Mw’oyo mukola mugwêrhe omugisho gwa Nyakasane, Ye wajiraga empingu n’igulu.

16Empingu ebà ya Nyakasane, igulu lyôhe abantu bàlishobwîre.

17Arhali abalinda-mboho bo bakuza Nyakasane, arhali abàjîre ekuzimu bo bamukuza.

18Ci rhwe rhuzîne rhwe rhwakuza Nyakasane, buno n’omu myâka n’emyâka.