Lulanga lwa 111

Irenge ly’emikolo ya Nyamuzinda

1Aleluya!

Nkola nakuza Nyakasane n’omurhima gwâni gwoshi, omu ndêko y’abemêzi n’ey’abashinganyanya.

2Emikolo ya Nyakasane erhankagerwa ekwânîne emanywe n’abayisîma boshi.

3Omukolo gwâge bubà bwâmi bunabà bulangashane; n’obushinganyanya bwâge buyôrha buhabà ensiku n’amango.

4Ajijire ebirhangâzo analonza bikazikengêrwa, Nyakasane abâ wa bwonjo anabà wa lukogo.

5Abamukenga àbahire ebiryo, ayôrha akengêra endagâno yâge ensiku zoshi. 6Amanyîsize olubaga lwâge obuhashe bw’emikolo yâge, erhi àlushobôza eby’amashanja.

7Emikolo y’amaboko gâge erhabâ ya bunywesi enabà mimâna; amarhegeko gâge goshi gali magwîke buzibu.

8Gali magwîke akantashugulwa, oku nsiku n’amango, garhajiragwa n’oluhinzo erhi n’obulyâlya.

9Arhumira olubaga lwâge owalucungula, àjizire endagâno yâge ebè ya nsiku n’amango, izîno lyâge liri limâna liri na lya kukengwa.

10Okurhînya Nyakasane gwo murhondêro gw’obushinganyanya, ngasi bamukenga boshi, bo barhondekezi b’okunali; irenge lyâge liyôrhe lihabà ensiku n’amango.