مُکاشفہ 5

طُومار تے لیلا

1وَل مَیں اُوندے سجے ہتھ ءچ، جیہڑا تخت اُتے بیٹھا ہا، ہِک طُومار1 ڈِٹھا جیہڑا ڈوہائیں پاسُوں لِکھیا ہویا ہا تے جِینکُوں سَت مُہراں لا تے بند کیتا گِیا ہا۔ 2تے مَیں ہِک فرشتہ کُوں ڈِٹھا جیہڑا اُچی اواز نال ایہ آدھا پِیا ہا جو ”کوݨ اِنہاں مُہراں کُوں تروڑ تے اِیں طُومار کُوں کھولنڑ دے لائق ہے؟“ 3پر نہ اسمان اُتے نہ زمین اُتے تے نہ زمین دے تلے کوئی بندہ ہا جیہڑا اُوں طُومار کُوں کھول تے اُونکُوں پڑھ سگے۔ 4تے مَیں بُٹ بُٹ رووݨ لگ پِیا کیوں جو کوئی وی اِیں لائق نہ مِلیا جیہڑا اُوں طُومار کُوں کھول سگے یا اُونکُوں پڑھ سگے۔ 5وَل اُنہاں بزُرگاں ءچوں ہِک میکُوں آکھیا جو ”نہ رو، ڈیکھ، یہُوداہ دے قبیلے دا ببرشیر جیہڑا داؤد دی نسل2 ہے، غالب آیا ہے۔ اُوہو اُوں طُومار کُوں تے اُوندیاں ستّے مُہراں کُوں کھول سگدے۔“

6وَل مَیں اُوں تخت، چارے جانداراں تے اُنہاں بزُرگاں دے وچال ہِک لیلا کھڑا ڈِٹھا جیہڑا ذبح تھیّا ہویا لگدا ہا۔ اُوندے سَت سینگ ہَن تے سَت اکھیں۔ ایہ خُدا دیاں سَت رُوحاں3 ہِن جیہڑیاں ساری زمین اُتے بھیجیاں گئیاں ہِن۔ 7او لیلا آیا تے اُوں تخت اُتے بیٹھے ہوئے دے سجے ہتھ کنُوں او طُومار گِھن گِھدا۔ 8تے جِیں ویلے اُوں او طُومار گِھن گِھدا تاں او چارے جاندار تے او چوِّیہہ بزُرگ، لیلے دے سامنڑے سجدہ ءچ ڈھے پئے۔ اُنہاں ءچوں ہر ہِک دے کولھ ستار تے خوشبودار مصالحے نال بھرے سونے دے مُنگر ہَن۔ ایہ مُقدّساں دیاں دُعاواں ہِن۔ 9تے او ایہ نواں گیت گاوݨ لگے جو

”تُوں ای اِیں لائق ہیں

جو طُومار کُوں گِھن تے اُوندیاں مُہراں کھولیں،

کیوں جو تَیں ذبح تھی تے آپنڑے خون نال

ہر قبیلہ، ہر زبان، ہر اُمت تے ہر قوم ءچوں

لوکاں کُوں خُدا دے واسطے مُل گِھن گِھدے۔

10تے اُنہاں کُوں ساڈے خُدا کیتے ہِک بادشاہی

تے کاہِن بنڑا ڈِتا تے او زمین اُتے بادشاہی کریسن۔“

11وَل مَیں نِگاہ کیتی تاں لکھاں کروڑاں فرشتیاں دی اواز سُنڑی جیہڑے اُوں تخت تے اُنہاں جانداراں تے بزُرگاں دے چودھارُوں موجود ہَن۔ 12او اُچی اواز نال آدھے پئے ہَن جو

”ذبح تھیّا ہویا لیلا ای قُدرت، دولت،

حِکمت، عزت، جلال تے تمجید دے لائق ہے۔“

13وَل مَیں اسمان تے زمین اُتے دی تے زمین دے تلے دی تے سمندر دی ساری مخلوق کُوں یعنی سبھ شیواں کُوں جیہڑیاں اُنہاں ءچ ہِن، ایہ آدھے ہوئے سُنڑیا جو

”جیہڑا تخت اُتے بیٹھا ہے، اُوندی تے لیلے دی تمجید،

عزت، جلال تے قُدرت ہمیشاں تئیں راہوے۔“

14تے چارے جانداراں آکھیا، ”آمین“ تے بزُرگاں ڈھے تے سجدہ کیتا۔