متّی 22

شادی دی دعوت دی مثال

1یسُوع ولا اُنہاں کُوں مثالاں ءچ آکھنڑ لگا، 2”اسمان دی بادشاہی اُوں بادشاہ وانگُوں ہے جئیں آپنڑے پوتر دی شادی کیتی۔ 3تے آپنڑے نوکراں کُوں بھیجیا جو اُنہاں لوکاں کُوں جِنہاں کُوں شادی دی دعوت ڈِتی گئی ہئی سڈ آوݨ، پر او نہ آئے۔ 4وَل اُوں بئے نوکراں کُوں ایہ آکھ تے بھیجیا جو ’جِنہاں کُوں دعوت ڈِتی گئی ہے اُنہاں کُوں آکھو جو ”کھانڑا تیار تھی گئے۔ میڈے ڈاند تے موٹے موٹے جانور ذبح تھی گئے ہِن تے سبھ کُجھ تیار ہے۔ شادی ءچ آؤ“۔‘ 5پر اُنہاں کوئی پرواہ نہ کیتی تے آپنڑے آپنڑے کماں ءچ لگ گئے۔ کوئی آپنڑی رَڑھ ءچ تے کوئی آپنڑے کاروبار ءچ۔ 6بئیاں اُوندے نوکراں کُوں پکڑ تے اُنہاں دی بے عزتی کیتی تے قتل کر ڈِتا۔ 7بادشاہ بہُوں کوڑیج گِیا تے اُوں آپنڑا لشکر بھیج تے اُنہاں قاتلاں کُوں مروا ڈِتا تے اُنہاں دا شہر ساڑ ڈِتا۔

8وَل اُوں آپنڑے نوکراں کُوں آکھیا، ’شادی دی ضیافت تاں تیار ہے پر جیہڑے سڈے گئے ہَن لائق نہ ہَن۔ 9بس رستے دے چوکاں اُتے ونجو تے جِتّی تُہاکُوں مِلنڑ، اُنہاں کُوں شادی دی دعوت ڈیؤ۔‘ 10نوکر گئے تے جِتّی چنگے مندے اُنہاں کُوں مِلے، ساریاں کُوں جمع کر تے گِھن آئے تے شادی آلا گھر مہماناں نال بھریج گِیا۔

11پر جِیں ویلے بادشاہ مہماناں کُوں ڈیکھنڑ اندر آیا تاں اُوندی نظر ہِک بندے اُتے گئی جیہڑا شادی آلے جوڑے ءچ نہ ہا۔ 12اُوں اُونکُوں آکھیا، ’میاں تُوں شادی آلا جوڑا پاتے بغیر اِتھاں کیوں آ گئیں؟‘ پر او کوئی جواب نہ ڈے سگیا۔ 13اِیں وجہ تُوں بادشاہ آپنڑے خادماں کُوں آکھیا، ’اِیندے ہتھ پیر بَدھ تے اِینکُوں باہر اندھارے ءچ سَٹ ڈیؤ۔ اُتھاں رووݨ تے ڈنداں دا پِیہوݨ ہوسی۔‘

14کیوں جو سڈے ہوئے بہُوں ہِن پر چُنڑے ہوئے تھوڑے۔“

ٹیکس ڈیوݨ دے بارے ءچ سوال

15وَل فریسی وَنج تے آپس ءچ صلاح کرݨ لگ پئے جو یسُوع کُوں گالھیں ءچ کِینویں پھساوݨ۔ 16بس اُنہاں آپنڑے شاگرداں کُوں ہیرودیس دے پیروکاراں نال اُوندے کولھ بھیجیا تے اُنہاں آکھیا، ”اُستاد! اساں جانڑدے ہیں جو تُساں سچے ہیوے تے سچائی نال خُدا دی راہ دی تعلیم ڈیندے ہیوے، تے کہیں دی پرواہ نئیں کریندے کیوں جو تُساں کہیں بندے دے طرفدار نئیں۔ 17بس ساکُوں ڈساؤ جو تُہاڈے خیال ءچ رومی بادشاہ قیصر کُوں ٹیکس ڈیوݨ جائز ہے یا نئیں؟“

18یسُوع اُنہاں دی بُری نیّت معلوم کر تے آکھیا، ”منافقو! میکُوں کیوں ازمیندے ہیوے؟ 19ٹیکس دا سِکہ میکُوں ڈِکھاؤ۔“

او ہِک دینار اُوندے کولھ گِھن آئے۔ 20اُوں اُنہاں کنُوں پُچھیا، ”اِیندے اُتے کیندی تصویر تے ناں ہے؟“

21اُنہاں اُونکُوں آکھیا، ”رومی بادشاہ قیصر دا۔“

وَل اُوں اُنہاں کُوں آکھیا، ”جیہڑا قیصر دا ہے قیصر کُوں تے جیہڑا خُدا دا ہے خُدا کُوں ڈیؤ۔“

22او ایہ سُنڑ تے حیران تھی گئے تے اُونکُوں چھوڑ تے چلے گئے۔

مُردیاں دی قیامت دے بارے ءچ سوال

23اُوں ڈینہہ صدوقی جیہڑے قیامت دے مُنکر ہَن اُوندے کولھ آئے تے اُوں کنُوں ایہ پُچھیا جو 24”اُستاد! مُوسیٰ آکھیا ہا جو جے کوئی بندہ بے اولاد مر ونجے تاں اُوندا بِھرا بیوہ نال شادی کر گِھنے تاں جو آپنڑے بِھرا کیتے نسل پیدا کرے1۔ 25ہُنڑ ساڈے اِتھاں سَت بِھرا ہَن۔ پہلے بِھرا شادی کیتی تے مر گِیا تے اِیں وجہ کنُوں جو اُوندی اولاد نہ ہئی، اُوندے بِھرا اُوں بیوہ نال شادی کیتی۔ 26وَل ڈُوجھا بِھرا وی بے اولاد مر گِیا۔ تریجھے بِھرا نال وی اِینویں ای تھیّا۔ اِینویں ستّے بِھرا بیوہ نال شادی کر تے بے اولاد مر گئے۔ 27آخر ءچ او عورت وی مر گئی۔ 28بس قیامت ءچ او اُنہاں ستّاں بِھرانواں ءچوں کیندی ذال ہوسی؟ کیوں جو سبھ اُوندے نال شادی کیتی ہئی۔“

29یسُوع اُنہاں کُوں جواب ءچ آکھیا، ”تُساں گُمراہ ہیوے اِیں واسطے جو نہ تاں خُدا دے کلام کُوں جانڑدے ہیوے، نہ خُدا دی قُدرت کُوں۔ 30کیوں جو قیامت ءچ شادی ویاہ نہ تھیسی بلکہ اسمان اُتے لوک فرشتیاں آلی کار ہوسن۔ 31پر مُردیاں دے زندہ تھیوݨ دے بارے ءچ کیا تُساں ایہ نئیں پڑھیا، جیہڑا خُدا فرمایا ہا، 32’مَیں ابرہام دا خُدا تے اِضحاق دا خُدا تے یعقُوب دا خُدا ہاں2؟‘ او مُردیاں دا خُدا نئیں بلکہ زندیاں دا خُدا ہے۔“

33لوک اُوندی ایہ تعلیم سُنڑ تے حیران تھی گئے۔

ساریاں تُوں وڈا حُکم

34جِیں ویلے فریسیاں سُنڑیا جو اُوں صدوقیاں کُوں لاجواب کر ڈِتے تاں او جمع تھی گئے۔ 35اُنہاں ءچوں شریعت دے ہِک عالم اُونکُوں ازماوݨ کیتے پُچھیا، 36”اُستاد! توریت ءچ سبھ کنُوں وڈا حُکم کیہڑا ہے؟“

37اُوں اُونکُوں آکھیا، ”رب العالمین آپنڑے خُدا نال آپنڑے سارے دل تے آپنڑی ساری جان تے آپنڑی ساری عقل نال محبت رکھ3۔ 38وڈا تے پہلا حُکم اِیہو ہے۔ 39تے ڈُوجھا اِیندے وانگُوں ایہ ہے جو آپنڑے ہمسائے نال آپنڑے وانگُوں محبت رکھ4۔ 40ساری شریعت تے نبیاں دے صحیفیاں دا دار و مدار اِنہاں ڈُو حُکماں اُتے ہے۔“

مسیح ِ مَوعُود دے بارے ءچ سوال

41جیہڑے ویلے فریسی جمع تھئے تاں یسُوع اُنہاں کنُوں پُچھیا، 42”المسیح دے بارے ءچ تُہاڈا کیا خیال ہے؟ او کِیندا پوتر ہے؟“

اُنہاں جواب ڈِتا، ”داؤد دا۔“

43اُوں اُنہاں کُوں آکھیا، ”وَل داؤد رُوح القُدس دی ہدایت نال اُونکُوں مالک کِینویں آدھا ہے جو

44’رب میڈے مالک کُوں آکھیا

میڈے سجے پاسُوں بہہ

جئیں تئیں مَیں تیڈے دُشمنڑاں کُوں تیڈے پیراں دے

تلے نہ کر ڈیواں5؟‘

45بس جِیں ویلے داؤد اُونکُوں مالک آدھے تاں او اُوندا پوتر کِینویں تھی سگدے؟“

46کوئی ہِک لفظ وی اُوندے جواب ءچ نہ آکھ سگیا تے اُوں ڈینہہ تُوں بعد کہیں اُوندے تُوں مزید سوال پُچھنڑ دی جُرأت نہ کیتی۔