متّی 2

سِجھ اُبھار تُوں آوݨ آلے مجُوسی

1یسُوع ہیرودیس بادشاہ دے زمانے ءچ یہُودیہ صوبے دے شہر بیت لحم ءچ جمیا۔ اُنہاں ڈینہاں ءچ سِجھ اُبھار تُوں کُجھ مجوسی یروشلیم ءچ ایہ پُچھدے ہوئے آئے جو 2”یہُودیاں دا بادشاہ جیہڑا جمے او کِتھاں ہے؟ کیوں جو اساں سِجھ اُبھار آلے پاسے اُوندا تارہ ڈیکھ تے اُونکُوں سجدہ کرݨ آئے ہیں۔“ 3ایہ سُنڑ تے ہیرودیس بادشاہ تے اُوندے نال یروشلیم دے سبھ لوک گھبرا گئے۔ 4اُوں قوم دے سبھ سردار کاہِناں تے شریعت دے عالماں کُوں کٹھا کر تے اُنہاں تُوں پُچھیا جو ”المسیح کِتھاں جمسی؟“

5اُنہاں اُونکُوں آکھیا، ”یہُودیہ دے بیت لحم ءچ کیوں جو نبی دی معرفت فرمایا گِیا ہے جو

6’بیت لحم! یہُوداہ دے علاقے،

تُوں یہُوداہ دے حاکماں ءچوں ہرگز چھوٹا نئیں

کیوں جو تیڈے ءچوں ہِک حاکم اُٹھسی

جیہڑا آجڑی آلی کار میڈی اُمت اِسرائیل دی نگہبانی کریسی1‘۔“

7وَل ہیرودیس مجُوسیاں کُوں خفیہ طور تے آپنڑے کولھ سڈیا تے اُوں تارے دے ظاہر تھیوݨ دا ٹھیک ویلا دریافت کیتا۔ 8وَل اُوں اُنہاں کُوں ایہ آکھ تے بیت لحم بھیجیا جو ”ونجو تے اُوں بال دا ٹھیک ٹھیک پتہ کرو۔ تے جِیں ویلے او مِل ونجے تاں میکُوں وی ڈسائے تاں جو مَیں وی وَنج تے اُونکُوں سجدہ کراں۔“

9او بادشاہ دی گالھ سُنڑ تے روانہ تھئے تے جیہڑا تارہ اُنہاں کُوں سِجھ اُبھار آلے پاسُوں نظریا ہا، او اُنہاں دے اگُوں اگُوں ٹُریا، اِتُھوں تئیں جو اُوں جاہ اُتے وَنج کھڑا تھیّا جِتھاں او بال ہا۔ 10او تارے کُوں ڈیکھ تے بہُوں خوش تھئے۔ 11وَل او اُوں گھر ءچ داخل تھئے تے بال کُوں اُوندی ماء مریم دے کولھ ڈیکھ تے اُوندے اگُوں سجدہ کیتا، تے آپنڑے ڈبے کھول تے سونا، لُبان تے مُر2 اُونکُوں نذر کیتا۔ 12وَل او کہیں بئے رستے تُوں آپنڑے وطن دو لگے گئے کیوں جو اُنہاں خواب ءچ خُدا تُوں ایہ ہدایت پاتی ہئی جو ہیرودیس دے کولھ ولا نہ ونجنڑ۔

مِصر دا سفر

13اُنہاں دے ونجنڑ تُوں بعد رب دا ہِک فرشتہ یُوسف کُوں خواب ءچ ڈِکھالی ڈِتا تے آکھنڑ لگا، ”اُٹھی۔ بال تے اُوندی ماء کُوں نال گِھن تے مِصر دو بھج وَنج، تے جئیں تئیں مَیں نہ آکھاں اُتھائیں رہوائے، کیوں جو ہیرودیس اِیں بال کُوں گولھ تے مارݨ چاہندے۔“ 14او فوراً اُٹھی تے رات دے ویلے بال تے اُوندی ماء کُوں گِھن تے مِصر دو ٹُر پِیا۔ 15تے ہیرودیس دی وفات تئیں اُتھائیں ریہا تاں جو جیہڑی گالھ رب العالمین نبی دی معرفت فرمائی ہئی او پُوری تھیوے جو ”مَیں مِصر تُوں آپنڑے پوتر کُوں سڈیا3۔“

بالاں دا قتل

16جِیں ویلے ہیرودیس کُوں پتہ لگیا جو مجُوسیاں میڈے نال دوکھا کیتے تاں اُونکُوں بہُوں کاوڑ لگی۔ اُوں بیت لحم تے اُوندے چودھارُوں سپاہی بھیج تے سارے بالاں کُوں جیہڑے ڈُو سال یا اِیں تُوں چھوٹے ہَن قتل کروا ڈِتا، کیوں جو اُوں مجُوسیاں تُوں تحقیق کر تے بال دی عمر دا حساب لا گِھدا ہا۔ 17اُوں ویلے او گالھ پُوری تھئی جیہڑی یرمیاہ نبی دی معرفت فرمائی گئی ہئی جو

18”رامہ ءچ اواز سُنڑائی ڈِتی۔

رووݨ تے وڈے ماتم دی اواز۔

راخِل آپنڑے بالاں کیتے روندی پئی ہے

تے تسلی قبول نئیں کریندی

کیوں جو او ہِن کائنا4۔“

مِصر تُوں واپسی

19جِیں ویلے ہیرودیس مر گِیا تاں رب دے فرشتہ مِصر ءچ یُوسف کُوں خواب ءچ ڈِکھالی ڈے تے آکھیا، 20”اُٹھی۔ اِیں بال تے اِیندی ماء کُوں گِھن تے اِسرائیل دے مُلک لگا وَنج، کیوں جو جیہڑے لوک بال کُوں مارݨ چاہندے ہَن او مر گئے ہِن۔“ 21بس او اُٹھی تے بال تے اُوندی ماء کُوں گِھن تے اِسرائیل دے مُلک ءچ آ گِیا۔

22پر جِیں ویلے اُوں سُنڑیا جو اَرخلاؤس آپنڑے پِیُو ہیرودیس دی جاہ تے یہُودیہ دا بادشاہ بنڑ گِیا ہے تاں اُتھاں ونجنڑ تُوں ڈریا تے خواب ءچ ہدایت پا تے گلیل دے علاقے دو ٹُر پِیا۔ 23تے اُتھاں پُج تے ناصرت ناں دے شہر ءچ راہنڑ لگا۔ اِینویں او گالھ پُوری تھئی جیہڑی نبی دی معرفت فرمائی گئی ہئی جو ”او ناصری اکھویسی۔“