متّی 12

سبت دے بارے ءچ سوال

1اُوں ویلے یسُوع سبت دے ڈینہہ رَڑھیں ءچوں تھی تے ویندا پِیا ہا تے اُوندے شاگرداں کُوں بُکھ لگی تے او سِٹے تروڑ تروڑ تے کھاوݨ لگے۔ 2فریسیاں ایہ ڈیکھ تے اُونکُوں آکھیا، ”ڈیکھو تُہاڈے شاگرد او کم کریندن جیہڑا سبت دے ڈینہہ کرݨ جائز نئیں1۔“

3اُوں اُنہاں کُوں جواب ڈِتا، ”کیا تُساں نئیں پڑھیا جو جِیں ویلے داؤد تے اُوندے ساتھی بُکھے ہَن تاں اُوں کیا کیتا2؟ 4او کِینویں خُدا دے گھر ءچ گِیا تے نذر دیاں روٹیاں کھادیاں تے آپنڑے ساتھیاں کُوں وی کھاوݨ کیتے ڈِتیاں، بھانویں ایجھیاں روٹیاں کھاوݨ صرف کاہِناں کُوں جائز ہا؟ 5یا کیا تُساں توریت ءچ ایہ نئیں پڑھیا جو کاہِن سبت دے ڈینہہ ہیکل ءچ سبت دی بے حُرمتی کرݨ دے باوجود وی بے قصُور راہندن3؟ 6مَیں تُہاکُوں آدھا ہاں جو اِتھاں او ہے جیہڑا ہیکل کنُوں وی وڈا ہے۔ 7پر جے تُساں اِیں نوِشتہ دا مطلب جانڑدے جو ’مَیں قُربانی نئیں بلکہ رحم پسند کریندا ہاں4،‘ تاں بے قصُوراں کُوں قصُوروار نہ آدھے۔ 8کیوں جو اِبنِ آدم سبت دا مالک ہے۔“

سُکے ہتھ آلا بندہ

9وَل یسُوع اُتھوں کنُوں روانہ تھی تے اُنہاں دے عبادت خانے ءچ گِیا۔ 10اُتھاں ہِک بندہ ہا جِیندا ہتھ سُکیا ہویا ہا۔ فریسیاں اُوندے اُتے اِلزام لاوݨ دے اِرادے نال ایہ پُچھیا جو ”کیا سبت دے ڈینہہ شِفا ڈیوݨ جائز ہے؟“

11اُوں اُنہاں کُوں آکھیا، ”تُہاڈے ءچوں ایجھا کوݨ ہے جیندی بھیڈ سبت دے ڈینہہ کھڈے ءچ ڈھے پووے تے او اُونکُوں نہ کڈھے؟ 12بس اِنسان دی قدر تاں بھیڈ کنُوں بہُوں ای زیادہ ہے۔ اِیں کیتے سبت دے ڈینہہ نیکی کرݨ جائز ہے۔“ 13وَل اُوں، اُوں بندے کُوں آکھیا، ”آپنڑا ہتھ ودھا۔“ اُوں ودھایا تے او اُوندے ڈُوجھے ہتھ آلی کار ٹھیک تھی گِیا۔

14وَل فریسی باہر چلے گئے تے اُوندے خلاف مشورہ کیتا جو اُونکُوں کِینویں ہلاک کرُوں۔

خُدا دا چُنڑیا ہویا خادم

15یسُوع ایہ معلوم کر تے اُتھوں کنُوں روانہ تھیّا تے لوکاں دی ہِک بِھیڑ اُوندے پِچُھوں ٹُر پئی تے اُوں سبھ کُوں چنگا کر ڈِتا۔ 16تے اُنہاں کُوں چِتا تے آکھیا جو میکُوں ظاہر نہ کرائے۔ 17اِینویں یسعیاہ نبی دی ایہ پیشن گوئی پُوری تھئی جو

18”ڈیکھو میڈا خادم، جِینکُوں مَیں چُنڑیا۔

میڈا محبوب جئیں کنُوں میڈا دل خوش ہے۔

مَیں آپنڑا رُوح اُوندے اُتے نازل کریساں

تے او قوماں ءچ اِنصاف دا اعلان کریسی۔

19او نہ جھیڑا کریسی نہ شور

تے نہ گلیاں ءچ کوئی اُوندی اواز سُنڑسی۔

20او لتاڑے ہوئے کانے کُوں نہ تُوڑیسی5

تے نہ بُجھدے ہوئے ڈیوے کُوں وِسمیسی

جئیں تئیں اِنصاف کُوں فتح نہ ڈیواوے۔

21تے اُوندے ناں کنُوں غیر قوماں اُمید رکھیسن6۔“

یسُوع تے بعل زبُول

22اُوں ویلے لوک یسُوع دے کولھ ہِک اندھے تے گُونگے بندے کُوں گِھن آئے جیندے ءچ بدرُوح ہئی۔ اُوں اُونکُوں چنگا کر ڈِتا تے او بندہ ڈیکھنڑ تے بولنڑ لگ گِیا۔ 23سارے لوک حیران تھی تے آکھنڑ لگے، ”کیا ایہ اِبنِ داؤد ہے؟“

24فریسیاں سُنڑ تے آکھیا، ”ایہ صرف بدرُوحاں دے سردار بعل زبُول دی مدد نال بدرُوحاں کُوں کڈھیندے۔“

25یسُوع اُنہاں دے خیالاں کُوں جاݨ تے اُنہاں کُوں آکھیا، ”جِیں بادشاہی ءچ پُھٹ پے ویندی ہے او تباہ تھی ویندی ہے تے جِیں شہر یا گھر ءچ پُھٹ پے ونجے، او قائم نئیں راہندا۔ 26اِینویں ای جے شیطان ای شیطان کُوں کڈھے تاں او آپ ای آپنڑا مخالف تھی ویسی۔ وَل اُوندی بادشاہی کِینویں قائم راہسی؟ 27تے جے مَیں بعل زبُول دی مدد نال بدرُوحاں کُوں کڈھیندا ہاں تاں تُہاڈے شاگرد کیندی مدد نال کڈھیندے ہِن؟ اِیں واسطے اُوہو تُہاڈی اِیں گالھ کُوں غلط ثابت کریسن۔ 28پر جے مَیں خُدا دے رُوح دی مدد نال بدرُوحاں کُوں کڈھیندا ہاں تاں خُدا دی بادشاہی تُہاڈے کولھ آݨ پُجی ہے۔

29کوئی بندہ کہیں زور آور دے گھر وڑ تے اُوندا مال کِینویں لُٹ سگدے جئیں تئیں پہلے اُوں زور آور کُوں بَدھ نہ گِھنے؟ وَل او اُوندا گھر لُٹ گِھنسی۔

30جیہڑا میڈے نال نئیں او میڈے خلاف ہے، تے جیہڑا میڈے نال جمع نئیں کریندا او کِھنڈیندے۔ 31اِیں واسطے مَیں تُہاکُوں آدھا ہاں جو آدمیاں دا ہر گُناہ تے کُفر معاف کیتا ویسی پر جیہڑا کُفر رُوح القُدس دے خلاف ہوسی او بخشیا نہ ویسی۔ 32تے جے کوئی اِبنِ آدم دے خلاف کوئی گالھ کریسی، اُونکُوں معاف کیتا ویسی، پر جیہڑا رُوح القُدس دے خلاف کوئی گالھ کریسی، او اُونکُوں معاف نہ کیتی ویسی، نہ اِیں جہان ءچ تے نہ آوݨ آلے ءچ۔

درخت تے اُوندا پھل

33یا تاں درخت کُوں چنگا آکھو تے اُوندے پھل کُوں وی چنگا، یا درخت کُوں وی بُرا آکھو تے اُوندے پھل کُوں وی بُرا، کیوں جو درخت آپنڑے پھل کنُوں سُنجانڑیا ویندے۔ 34نانگ دے بالو! تُساں بُرے تھی تے کِینویں چنگے گالھیں آکھ سگدے ہیوے؟ کیوں جو جیہڑا دل ءچ ہوندے اُوہو زبان اُتے آندے۔ 35چنگا بندہ آپنڑے دل دے چنگے خزانے ءچوں چنگیاں چیزاں کڈھیندے تے بُرا بندہ آپنڑے بُرے خزانے ءچوں بُریاں چیزاں۔

36مَیں تُہاکُوں آدھا ہاں جو عدالت دے ڈینہہ لوکاں کُوں ہر نکمی گالھ دا حساب ڈیونڑاں پوسی۔ 37کیوں جو تُساں آپنڑے گالھیں دی وجہ کنُوں راستباز یا قصُوروار کھڑائے ویسو۔“

معجزانہ نشان دا مطالبہ

38وَل شریعت دے کُجھ عالماں تے فریسیاں جواب ءچ اُونکُوں آکھیا، ”اُستاد، اساں تُہاڈے کنُوں ہِک نشان ڈیکھنڑ چاہندے ہیں۔“

39اُوں اُنہاں کُوں جواب ڈِتا، ”اِیں زمانے دے بُرے تے زِناکار لوک نشان ڈیکھنڑ چاہندے ہِن پر یُوناہ نبی دے نشان دے علاوہ بِیا کوئی نشان اُنہاں کُوں نہ ڈِتا ویسی۔ 40کیوں جو جِینویں یُوناہ ترے ڈینہہ رات وڈی مچھی دے پیٹ ءچ ریہا اِینویں ای اِبنِ آدم ترے ڈینہہ رات زمین دے اندر راہسی۔

41نِینوہ دے لوک عدالت دے ڈینہہ اِیں زمانے دے لوکاں نال کھڑ تے اُنہاں کُوں مُجرم کھڑیسن کیوں جو اُنہاں یُوناہ دی تبلیغ دی وجہ کنُوں توبہ کر گِھدی ہئی7 تے ڈیکھو اِتھاں او ہے جیہڑا یُوناہ کنُوں وی وڈا ہے۔ 42جنُوب دی ملکہ عدالت دے ڈینہہ اِیں زمانے دے لوکاں نال کھڑ تے اُنہاں کُوں مُجرم کھڑیسی۔ کیوں جو او بہُوں دُور کنُوں سُلیمان دی حِکمت سُنڑݨ کیتے آئی ہئی تے ڈیکھو اِتھاں او ہے جیہڑا سُلیمان کنُوں وی وڈا ہے8۔

بدرُوح دی واپسی

43جِیں ویلے کہیں بندے ءچوں بدرُوح نِکلدی ہے تاں او بیاباناں ءچ ارام گولھیندی پِھردی ہے پر نئیں پیندی۔ 44وَل او آدھی ہے جو ’مَیں آپنڑے اُوں گھر وَل ویساں جِتُھوں نِکلی ہم،‘ تے او آ تے اُوں گھر کُوں خالی، صاف ستھرا تے سجیا ہویا ڈیدھی ہے۔ 45وَل او وَنج تے آپنڑے کنُوں وی بدتر سَت بئیاں بدرُوحاں کُوں نال گِھن آندی ہے تے او اندر وَنج تے راہنڑ لگدیاں ہِن تے اُوں بندے دا حال پہلے کنُوں وی بُرا تھی ویندے۔ اِیں زمانے دے بُرے لوکاں دا حال وی ایجھا ای ہوسی۔“

یسُوع دی ماء تے بِھرا

46جِیں ویلے یسُوع بِھیڑ نال گالھ کریندا پِیا ہا تاں اُوندی ماء تے بِھرا باہر کھڑے ہَن تے اُوندے نال گالھ کرݨ چاہندے ہَن۔ 47کہیں اُونکُوں خبر ڈِتی جو ”تُہاڈی ماء تے تُہاڈے بِھرا باہر کھڑے ہِن تے تُہاڈے نال گالھ کرݨ چاہندے ہِن۔“

48یسُوع جواب ءچ آکھیا، ”میڈی ماء تے میڈے بِھرا کوݨ ہِن؟“ 49تے آپنڑے شاگرداں دو ہتھ ودھا تے آکھیا، ”ڈیکھو، میڈی ماء تے میڈے بِھرا ایہ ہِن۔ 50کیوں جو جیہڑا کوئی میڈے اسمانی باپ دی مرضی اُتے چلدے اُوہو میڈا بِھرا، میڈی بھینڑ تے میڈی ماء ہے۔“