مرقس 16

مسیح دا مُردیاں ءچوں زندہ تھی ونجنڑاں

1جِیں ویلے سبت دا ڈینہہ لنگھ گِیا تاں مریم مگدلینی تے یعقُوب دی ماء مریم تے سلومی خوشبودار مصالحے مُل گِھدے تاں جو وَنج تے یسُوع دی لاش اُتے مَلنڑ۔ 2او ہفتے دے پہلے ڈینہہ بہُوں سویلے سِجھ نِکلدے ای قبر اُتے آئیاں۔ 3او آپس ءچ آکھنڑ لگیاں جو ”ساڈے کیتے قبر دے مُنہ اگُوں پتھر کوݨ ریڑھ تے ہٹیسی؟“

4پر جِیں ویلے اُنہاں نِگاہ کیتی تاں ڈِٹھا جو او پتھر جیہڑا بہُوں وڈا ہا پہلے کنُوں ای ریڑھیا ہویا ہے۔ 5قبر آلی غار دے اندر داخل تھی تے اُنہاں ہِک جوان کُوں چِٹا چولا پاتے سجے پاسُوں بیٹھے ڈِٹھا تے بہُوں حیران تھیّاں۔

6اُوں اُنہاں کُوں آکھیا، ”ایجھیاں حیران نہ تھیؤ۔ تُساں یسُوع ناصری کُوں گولھیندیاں ہیوے جیہڑا صلیب اُتے چڑھایا گِیا ہا۔ او زندہ تھی گئے۔ او اِتھاں کائنی۔ ڈیکھو ایہ او جاہ ہے جِتھاں اُنہاں اُونکُوں رکھیا ہا۔ 7پر ہُنڑ تُساں وَنج تے پطرس تے ڈُوجھے شاگرداں کُوں آکھو جو او تُہاڈے کنُوں پہلے گلیل کُوں ویسی۔ تُساں اُتھائیں اُونکُوں ڈیکھسو جِینویں اُوں تُہاکُوں آکھیا ہا۔“

8او عورتاں جلدی نال قبر کنُوں باہر نِکل تے بھج پئیاں کیوں جو کمبڑیں تے ہیبت اُنہاں اُتے غالب آ گئی ہئی، تے اُنہاں کہیں کُوں کُجھ نہ آکھیا کیوں جو او ڈردیاں ہَن۔

یسُوع مریم مگدلینی اُتے ظاہر تھیندے

9ہفتے دے پہلے ڈینہہ جِیں ویلے یسُوع صُبح سویلے زندہ تھی گِیا تاں سبھ کنُوں پہلے مریم مگدلینی اُتے ظاہر تھیّا، جیندے ءچوں اُوں سَت بدرُوحاں کڈھیاں ہَن۔ 10اُوں وَنج تے اُوندے ساتھیاں کُوں جیہڑے غم پارُوں روندے تے ماتم کریندے ہَن، خبر ڈِتی۔ 11اُنہاں ایہ سُنڑ تے جو یسُوع زندہ ہے تے اُونکُوں ڈِکھالی ڈِتے، یقین نہ کیتا۔

یسُوع آپنڑے ڈُو پیروکاراں اُتے ظاہر تھیندے

12اِیندے بعد یسُوع ڈُوجھی صورت ءچ ڈُو بندیاں اُتے ظاہر تھیّا، جِیں ویلے او دیہات دو پیدل ویندے پئے ہَن۔ 13اُنہاں وی وَنج تے باقی لوکاں کُوں خبر ڈِتی پر اُنہاں، اُنہاں دا وی یقین نہ کیتا۔

یسُوع یارہاں شاگرداں اُتے ظاہر تھیندے

14وَل یسُوع اُنہاں یارہاں شاگرداں اُتے ظاہر تھیّا، جِیں ویلے او کھانڑا کھاوݨ بیٹھے ہَن۔ اُوں اُنہاں دی بےاعتقادی تے سخت دِلی اُتے اُنہاں کُوں ملامت کیتی، کیوں جو اُنہاں، اُنہاں لوکاں دا یقین نہ کیتا ہا جِنہاں اُوندے زندہ تھیوݨ تُوں بعد اُونکُوں ڈِٹھا ہا۔ 15اُوں اُنہاں کُوں آکھیا جو ”تُساں ساری دُنیا ءچ وَنج تے سارے لوکاں دے سامنڑے خوشخبری دی تبلیغ کرو۔ 16جیہڑا اِیمان گِھن آوے تے بپتسمہ گِھنے او نجات پیسی، پر جیہڑا اِیمان نہ گِھن آوے او قصُوروار کھڑایا ویسی۔ 17تے اِیمان گِھن آوݨ آلیاں دے وچال ایہ معجزے تھیسن: او میڈے ناں نال بدرُوحاں کُوں کڈھیسن، نوِیاں نوِیاں زباناں بُولیسن، 18نانگاں کُوں چا گِھنسن، تے جے کوئی زہریلی چیز پی گِھنسن تاں اُنہاں کُوں کُجھ نُقصان نہ تھیسی۔ او بیماراں اُتے ہتھ رکھیسن تے او چنگے تھی ویسن۔“

یسُوع اسمان اُتے چایا ویندے

19خُداوند یسُوع اُنہاں نال کلام کرݨ تُوں بعد اسمان اُتے چا گِھدا گِیا تے خُدا دے سجے پاسُوں بہہ گِیا۔ 20وَل شاگرداں نِکل تے جاہ جاہ تبلیغ کیتی، تے خُداوند اُنہاں دے نال کم کریندا ریہا، تے اُنہاں معجزیاں دے وسیلے نال جیہڑے نال نال تھیندے ہَن کلام کُوں ثابت کریندا ریہا۔