مرقس 15

یسُوع دی پِیلاطُس دے سامنڑے پیشی

1سویل تھیندے ای سردار کاہِناں، بزُرگاں، شریعت دے عالماں تے سبھ صدر عدالت دے ممبراں نال صلاح کر تے یسُوع کُوں بدھیا تے گِھن تے پِیلاطُس دے حوالے کر ڈِتا۔ 2پِیلاطُس اُوں کنُوں پُچھیا، ”کیا تُوں یہُودیاں دا بادشاہ ہیں؟“

یسُوع جواب ءچ آکھیا، ”ایہ تُوں خود آدھیں۔“

3وَل سردار کاہِن اُوندے اُتے بہُوں سارے گالھیں دا اِلزام لیندے ریہے۔ 4پِیلاطُس اُونکُوں ولا پُچھیا جو ”کیا تُوں کوئی جواب نہ ڈیسیں؟ ڈیکھ ایہ تیڈے اُتے کتنے اِلزام لیندے پئے ہِن۔“

5یسُوع وَل وی کوئی جواب نہ ڈِتا، ایہ تئیں جو پِیلاطُس بہُوں حیران تھیّا۔

یسُوع کُوں سزائے موت سُنڑائی ویندی ہے

6عید دے موقع تے پِیلاطُس ہِک قیدی کُوں چھوڑ ڈیندا ہا جیندے کیتے لوک درخاست کریندے ہَن۔ 7برابّا ناں دا ہِک بندہ اُنہاں باغیاں دے نال قید ءچ ہا جِنہاں بغاوت ءچ قتل و غارت کیتی ہئی۔ 8بِھیڑ کولھ آ تے پِیلاطُس کُوں درخاست کرݨ لگی جو ”آپنڑے دستور دے مطابق ساڈے کیتے کر۔“

9پِیلاطُس جواب ءچ آکھیا، ”کیا تُساں چاہندے ہیوے جو مَیں تُہاڈے کیتے یہُودیاں دے بادشاہ کُوں چھوڑ ڈیواں؟“ 10کیوں جو اُونکُوں پتہ ہا جو سردار کاہِناں یسُوع کُوں حسد نال پکڑوائے۔

11پر سردار کاہِناں بِھیڑ کُوں اُبھاریا، تاں جو پِیلاطُس اُنہاں کیتے برابّا کُوں ای چھوڑ ڈیوے۔ 12پِیلاطُس اُنہاں تُوں ڈُوجھی پھیری پُچھیا، ”وَل مَیں اُوں بندے نال جِینکُوں تُساں یہُودیاں دا بادشاہ آدھے ہیوے، کیا کراں؟“

13او وَل چِلائے جو ”اِینکُوں صلیب اُتے چڑھاؤ۔“

14پِیلاطُس اُنہاں کُوں آکھیا، ”کیوں، اُوں کیہڑی بُرائی کیتی ہے؟“

پر او مزید شور مچا تے آکھنڑ لگے ”اِینکُوں صلیب اُتے چڑھاؤ۔“

15پِیلاطُس لوکاں کُوں خوش کرݨ سانگے برابّا کُوں چھوڑ ڈِتا، تے یسُوع کُوں کوڑے مرواوݨ تُوں بعد اُونکُوں صلیب اُتے چڑھاوݨ تے سپاہیاں دے حوالے کر ڈِتا۔

سپاہی یسُوع کُوں ٹھٹّھیاں ءچ اُڈیندے ہِن

16سپاہی اُونکُوں اُوں صحن ءچ گِھن گئے جیہڑا گورنر دے قلعہ دا حصہ 1 ہا تے ساری پلٹن کُوں سڈوا گِھدا۔ 17اُنہاں اُونکُوں جامنی چوغہ پوایا تے کنڈیاں دا تاج بنڑا تے اُوندے سر اُتے رکھیا، 18تے اُونکُوں سلام کر تے آکھنڑ لگے جو ”یہُودیاں دے بادشاہ! سلام،“ 19او اُوندے سر اُتے کانے مریندے تے اُوندے اُتے تُھوکیندے تے گوڈے ٹیک تے اُونکُوں سجدہ کریندے ریہے۔ 20جِیں ویلے اُوندا مذاق بنڑا گِھدا تاں اُوندے اُتوں جامنی چوغہ لہا تے وَل اُوندے آپنڑے کپڑے اُونکُوں پوا ڈِتے۔ وَل اُونکُوں صلیب اُتے چڑھاوݨ کیتے باہر گِھن گئے۔

یسُوع کُوں صلیب اُتے چڑھایا ویندے

21اُوں ویلے شمعون ناں دا ہِک کُرینی بندہ، دیہات تُوں آندے ہوئے اُتھوں لنگھیا۔ او سکندر تے رُوفُس دا پِیُو ہا۔ سپاہیاں اُونکُوں وِنگار ءچ پکڑ گِھدا جو او یسُوع دی صلیب چاوے۔ 22تے او یسُوع کُوں گُلگُتا دے مقام تے گِھن آئے جِیندا ترجمہ ہے کھوپڑی دی جاہ۔ 23اُتھاں اُونکُوں مُر2 مِلیا ہویا انگُور دا رَس پِیوݨ کیتے ڈِتا پر اُوں نہ پِیتا۔ 24وَل اُنہاں اُونکُوں صلیب اُتے چڑھایا تے پرچی پا تے اُوندے کپڑے آپس ءچ وَنڈ گِھدے۔ 25ایہ سویلے نؤں وجے دا ویلا ہا جڈاں اُنہاں اُونکُوں صلیب اُتے چڑھایا۔ 26تے اُوندا اِلزام لِکھ تے اُوندی صلیب اُتے لا ڈِتا گِیا جو ”ایہ یہُودیاں دا بادشاہ ہے۔“ 27اُنہاں ڈُو ڈاکواں کُوں وی اُوندے نال صلیب اُتے چڑھایا، ہِک کُوں اُوندے سجے پاسُوں تے ڈُوجھے کُوں کھبے پاسُوں۔ 28وَل ایہ گالھ پُوری تھئی جو ”او بدکاراں ءچ شمار کیتا گِیا3۔“

29اُتھوں کنُوں لنگھنڑ آلے سر ہِلا ہِلا تے اُونکُوں لعن طعن کریندے تے اکھیندے ہَن جو ”واہ! ہیکل کُوں ڈھا تے ترے ڈینہہ ءچ بنڑاوݨ آلے، 30صلیب تُوں لہہ تے آپنڑے آپ کُوں بچا۔“

31اِینویں ای سردار کاہِن وی شریعت دے عالماں نال رَل تے آپس ءچ اُوندا مذاق بنڑیندے ہوئے آدھے ہَن، ”اِیں بئیاں کُوں بچایا پر آپنڑے آپ کُوں نئیں بچا سگدا۔ 32اِسرائیل دے بادشاہ المسیح، ہُنڑ صلیب تُوں لہہ آ تاں جو اساں ڈیکھ تے اِیمان گِھن آؤں۔“ تے جیہڑے اُوندے نال صلیب اُتے چڑھائے گئے ہَن او وی اُونکُوں لعن طعن کریندے ہَن۔

یسُوع دی موت

33جِیں ویلے ڈوپہر تھئی تاں سارے مُلک ءچ تریجھے پہر تئیں اندھارا چھایا ریہا۔ 34تریجھے پہر دے نیڑے یسُوع اُچی اواز ءچ آکھیا، ”اِلوہی اِلوہی لما شبقتنی؟“ جِیندا ترجمہ ہے ”میڈے خُدا! میڈے خُدا! تُوں میکُوں کیوں چھوڑ ڈِتا؟“

35جیہڑے لوک اُتھاں کھڑے ہَن، اُنہاں ءچوں کُجھ ایہ سُنڑ تے آکھیا، ”ڈیکھو او ایلیّاہ نبی کُوں سڈیندے۔“ 36ہِک بندے بھج تے ہِک سپنج کُوں انگُور دے سِرکے ءچ بوڈیا تے ہِک کانے اُتے رکھ تے اُونکُوں چُسایا تے آکھنڑ لگا، ”ذرا کھڑ ونجو، ڈیکھوں جو ایلیّاہ اُونکُوں لہاوݨ آندے یا نئیں۔“

37وَل یسُوع وڈی اواز نال چِلا تے دم ڈے ڈِتا۔

38تے ہیکل دا پڑدہ اُتوں کنُوں تلے تئیں پھٹ تے ڈُو ٹوٹے تھی گِیا۔ 39جیہڑا صوبیدار اُوندے سامنڑے کھڑا ہا، اُوں اُونکُوں اِینویں دم ڈیندے ہوئے ڈیکھ تے آکھیا، ”سچ مُچ ایہ بندہ خُدا دا پوتر ہا۔“

40کئی عورتاں دُور کنُوں ڈیدھیاں پئیاں ہَن۔ اُنہاں ءچ مریم مگدلینی، چھوٹے یعقُوب تے یوسیس دی ماء مریم تے سلومی ہَن۔ 41جِیں ویلے یسُوع گلیل ءچ ہا، ایہ عورتاں اُوندے پِچُھوں ٹُر پوندیاں تے اُوندی خدمت کریندیاں ہَن۔ تے بئیاں وی بہُوں ساریاں عورتاں اُتھاں ہَن جیہڑیاں اُوندے نال یروشلیم ءچ آئیاں ہَن۔

یسُوع دی تدفین

42او تیاری دا ڈینہہ ہا جیہڑا سبت کنُوں ہِک ڈینہہ پہلے ہوندا ہا۔ اِیں واسطے جِیں ویلے شام تھئی تاں 43ارِمَتِیاہ شہر دے راہنڑ آلے یُوسف جیہڑا صدر عدالت دا معزز ممبر ہا تے خود وی خُدا دی بادشاہی دا منتظر ہا، جُرأت نال پِیلاطُس دے کولھ وَنج تے یسُوع دی لاش منگی۔ 44پِیلاطُس حیران تھیّا جو او اِتنی جلدی مر گئے تے صوبیدار کُوں سڈ تے پُچھیا جو ”اُونکُوں موئے کِتنی دیر تھی گئی ہے؟“ 45جِیں ویلے صوبیدار کنُوں حقیقت دا پتہ چلیا تاں لاش یُوسف دے حوالے کر ڈِتی۔ 46اُوں ہِک لینن دی چادر مُل گِھدی تے لاش کُوں لہا تے اُوں چادر ءچ کفنایا۔ تے ہِک قبر ءچ رکھ ڈِتا جیہڑی چٹان ءچ کھودی گئی ہئی تے قبر دے مُنہ اُتے ہِک پتھر ریڑھ ڈِتا۔ 47مریم مگدلینی تے یوسیس دی ماء مریم ڈیدھیاں پئیاں ہَن جو اُونکُوں کِتھاں رکھیا گِیا ہے۔