یُوحنّا

یُوحنّا دی معرفت لِکھی گئی اِنجیل

پیش لفظ

ایہ اِنجیل یُوحنّا رسُول دی طرفوں لِکھی گئی ہے جیہڑا یسُوع مسیح دے بارہاں شاگرداں ءچوں ہا۔ اِیں اِنجیل تُوں پتہ لگدے جو مسیح خُدا دا ابدی کلام ہے جیہڑا اِنسان بنڑ تے دُنیا ءچ آیا۔ او اُنہاں سبھ لوکاں کُوں جیہڑے اُوندے اُتے اِیمان گِھن آندے ہِن نجات تے ہمیشاں دی زندگی ڈیندے تے اِینویں اُوں خُدا دی محبت کُوں ظاہر کیتا۔ ایہ اِنجیل بیان کریندی ہے جو بھانویں یسُوع مسیح بہُوں معجزے ڈِکھا تے ثابت کیتا جو او خُدا دی طرفوں ہے، وَل وی یہُودیاں اُونکُوں رَد کر ڈِتا۔ اِیں اِنجیل ءچ مسیح دی تعلیم تے دُعاواں کُوں وی بیان کیتا گئے جیہڑیاں اُوں آپنڑے شاگرداں دے حق ءچ کیتیاں۔ وَل ایہ اِنجیل اُوندی صلیبی موت، زندہ تھیوݨ تے لوکاں اُتے ظاہر تھیوݨ دے بارے ءچ ڈسیندی ہے۔ اِیں اِنجیل دا مقصد ایہ ہے جو لوک مسیح اُتے اِیمان گِھن آوݨ تے ہمیشاں دی زندگی پاوݨ۔