گلتِیوں 4

1مَیں ایہ آدھا ہاں جو وارث جئیں تئیں بال ہے، اُوندی تے ہِک غُلام دی حالت ءچ کوئی فرق نئیں بھانویں او ساریاں چیزاں دا مالک ہے۔ 2تے او پِیُو دی مقرر کیتی ہوئی عُمر تئیں نگہباناں تے مُختاراں دے اِختیار ءچ راہندے۔ 3اِینویں ای اساں وی جِیں ویلے بال ہسے تاں دُنیاوی اصُولاں دی غُلامی ءچ ہسے۔ 4پر جِیں ویلے وقت پُورا تھی گِیا تاں خُدا آپنڑے پوتر کُوں بھیجیا جیہڑا عورت تُوں پیدا تھیّا تے شریعت دے تابع پیدا تھیّا، 5تاں جو او ساکُوں جیہڑے شریعت دے تابع ہیں، چُھڑا گِھنے تے ساکُوں لےپالک پوتر تھیوݨ د ا درجہ مِلے۔

6کیوں جو تُساں پوتر ہیوے اِیں واسطے خُدا آپنڑے پوتر دا رُوح القُدس ساڈے دِلاں ءچ بھیجیا تے او ”ابّا“ یعنی ”باپ“ آکھ تے سڈیندا راہندے۔ 7بس ہُنڑ تُساں غُلام نئیں ریہے بلکہ پوتر بنڑ گئے ہیوے، تے جے پوتر تھئے تاں خُدا تُہاکُوں وارث وی بنڑا ڈِتے۔

گلِتیاں کیتے پولُس دی فِکر مندی

8اِیں تُوں پہلے جِیں ویلے تُساں خُدا تُوں واقف نہ ہَوے تاں تُساں ایجھے معبُوداں دے غُلام ہَوے جیہڑے خُدا ہِن کائنی۔ 9پر ہُنڑ جڈاں تُساں خُدا کُوں پچھاݨ گِھدے بلکہ خُدا تُہاکُوں پچھاݨ گِھدے تاں تُساں کیوں اُنہاں کمزور تے بے کار اصُولاں دو واپس ویندے پئے ہیوے؟ کیا ولا کنُوں اُنہاں دی غُلامی ءچ آوݨ چاہندے ہیوے؟ 10تُساں ڈینہاں، مہینیاں، موسماں تے سالاں کُوں منیندے ہیوے۔ 11میکُوں ڈر ہے جو جیہڑی محنت مَیں تُہاڈے اُتے کیتی ہے، کِتھائیں بے فائدہ نہ تھی ونجے۔

12بِھراؤ! مَیں تُہاڈی مِنت کریندا ہاں جو میڈے وانگُوں بنڑو جِینویں پہلے مَیں تُہاڈے وانگُوں بنڑیا ہم1۔ تُساں میڈا کُجھ نُقصان نئیں کیتا۔ 13تُہاکُوں یاد ہوسی جو مَیں پہلی پھیری بیماری دی حالت ءچ تُہاکُوں خوشخبری سُنڑائی ہئی۔ 14میڈی ایہ جِسمانی حالت تُہاڈی ازمائش دا سبب ہئی، پر تُساں نہ تاں میکُوں حقیر جانڑیا تے نہ ای مَیں تُوں نفرت کیتی۔ اِیندے بجائے تُساں میکُوں خُدا دے فرشتہ وانگُوں بلکہ مسیح یسُوع وانگُوں قبول کیتا۔ 15ہُنڑ تُہاڈی او خوشی کِتھاں گئی؟ کیوں جو مَیں تُہاڈا گواہ ہاں جو جے ممکن ہوندا تاں تُساں آپنڑے اکھیں وی کڈھ تے میکُوں ڈے ڈیندے۔ 16کیا تُہاڈے نال سچ بولنڑ دے سببّوں مَیں تُہاڈا دُشمنڑ بنڑ گِیا ہاں؟

17او لوک تُہاکُوں آپنڑا دوست بنڑاوݨ دی کوشش تاں کریندے ہِن پر اُنہاں دی نیّت صاف کائنی۔ او تُہاکُوں میڈے تُوں اَنج کراوݨ چاہندے ہِن تاں جو تُساں اُنہاں دے ای بنڑے راہو۔ 18ہا، نیک نیّتی نال دوست بنڑاوݨ چنگا ہے جے ایہ کوشش ہر ویلے کیتی ونجے نہ صرف جڈاں میں اُتھاں تُہاڈے کولھ حاضر ہوندا ہاں۔ 19میڈے بالو! تُہاڈے کیتے میکُوں ولا کنُوں بال جاوݨ وانگُوں دے درد لگے ہِن تے اُوں ویلے تئیں لگے راہسن، جئیں تئیں مسیح دی صورت تُہاڈے ءچ قائم نہ تھی ونجے۔ 20میڈا دل چاہندے جو ہُنڑ تُہاڈے کولھ ہوواں تے بئے طریقے نال بولاں کیوں جو مَیں تُہاڈے بارے ءچ بہُوں شک ءچ ہاں۔

ہاجرہ تے سارہ دی مثال

21میکُوں ڈساؤ! تُساں جیہڑے شریعت دے تابع تھیوݨ چاہندے ہیوے، کیا شریعت دے گالھیں نئیں سُنڑدے؟ 22اُوندے ءچ لِکھیا ہے جو ابرہام دے ڈُو پوتر ہَن، ہِک غُلام عورت ءچوں، ڈُوجھا ازاد ءچوں۔ 23جیہڑا پوتر غُلام عورت ءچوں ہا او اِنسانی فطرت دے مطابق پیدا تھیّا پر جیہڑا پوتر ازاد ءچوں پیدا تھیّا، او خُدا دے وعدے دے مطابق پیدا تھیّا2۔ 24اِنہاں گالھیں ءچ ہِک مثال ہے کیوں جو ایہ عورتاں ڈُو عہداں دو اِشارہ کریندیاں ہِن۔ ہِک کوہ ِسِینا اُتے بدھیا ہویا عہد ہے جیندے ءچوں غُلام ای پیدا تھیندے ہِن تے او ہاجرہ ہے۔ 25ہاجرہ عرب دے کوہ ِ سِینا دو اِشارہ ہے تے موجودہ یروشلیم دو وی، کیوں جو یروشلیم آپنڑے بالاں سمیت غُلامی ءچ ہے۔ 26پر اسمانی یروشلیم3 ازاد ہے تے اُوہو ساڈی ماء ہے۔ 27کیوں جو کلام ءچ لِکھیا ہے جو

”اے بانجھ! تُوں جئیں بال نئیں جمیا،

خوشی دے نعرے لا۔

تُوں جِینکُوں جمنڑ دا درد نئیں تھیّا،

اُچی اواز نال پُکار،

کیوں جو چھوڑی ہوئی تریمت دے بال

پئے آلی دے بالاں تُوں زیادہ ہوسن4۔“

28اِیں واسطے بِھراؤ! تُساں اِضحاق آلی کار وعدے دے فرزند ہیوے۔ 29پر جِینویں اُوں وقت اِنسانی فطرت دے مطابق پیدا تھیّا ہویا بال رُوح دی قُدرت نال پیدا تھئے ہوئے کُوں سَتیندا ہا، ہُنڑ وی اِینویں ای تھیندے۔ 30پر خُدا دا کلام کیا آدھے؟ ایہ جو ”اِیں کنیز تے اُوندے پوتر کُوں کڈھ ڈیؤ کیوں جو کنیز دا پوتر ازاد دے پوتر نال ہرگز وارث نہ ہوسی5۔“ 31اِیں واسطے بِھراؤ! اساں غُلام عورت دی اولاد نئیں بلکہ ازاد دی ہیں۔