گلتِیوں

گلتِیوں دے ناں پولُس رسُول دا خط

پیش لفظ

پولُس رسُول ایہ خط رومی صوبے گلِتیہ دے اِیمانداراں کُوں لِکھیا۔ اُتھاں بہُوں سارے یہُودی راہندے ہَن تے کلیسیاواں ءچ یہُودی تے غیر یہُودی قوم آلے ڈُوہائیں شامل ہَن۔ کُجھ لوک اُتھاں دی کلیسیاواں ءچ آ تے پولُس دی رسالت دے خلاف غلط تعلیم ڈیوݨ لگے۔ او ایہ وی سکھیندے ہَن جو نجات پاوݨ کیتے پُوری شریعت اُتے، خاص طور تے ختنے دی رسم اُتے عمل کرݨ لازم ہے۔ تے بہُوں سارے لوک اِیں تعلیم تُوں گُمراہ وی تھی گئے۔

اِیں واسطے پولُس رسُول اِیں خط ءچ اِیمانداراں کُوں سکھیندے جو نجات شریعت اُتے عمل کرݨ نال نئیں مِل سگدی بلکہ مسیح دی صلیبی موت اُتے اِیمان گِھن آوݨ نال مِلدی ہے۔ او اعمال نال نئیں بلکہ فضل نال مِلدی ہے۔ اِیمانداراں کُوں چاہیدے جو پاک رُوح دی تابع داری کرݨ تے آپنڑے ہمسائیاں نال آپنڑے وانگُوں محبت رکھنڑ۔