اعمال

رسُولاں دے اعمال

پیش لفظ

لُوقا طبیب اِیں کتاب ءچ او بیان جاری رکھیندے جیہڑا اُوں لُوقا دی اِنجیل ءچ شروع کیتا ہا۔ ایہ کتاب مسیح دے آپنڑے شاگرداں نال آخری پھیری گالھ کرݨ تے اُنہاں دے سامنڑے اسمان اُتے چاتے ونجنڑ تُوں شروع تھیندی ہے۔ ”رسُولاں دے اعمال“ ءچ اساں مسیح دے اُونہئی کماں کُوں ڈیدھے ہیں جیہڑے اُوں اسمان اُتے ونجنڑ تُوں بعد آپنڑے رسُولاں دے ذریعے کیتے۔

ایہ کم رسُولاں رُوح القُدس دی طاقت تے ہدایت نال کیتے جِینکُوں یسُوع مسیح آپنڑے وعدے دے مطابق اُنہاں اُتے نازل کیتا۔ اُنہاں خُداوند یسُوع دے حُکم دے مطابق، یروشلیم تُوں شروع کر تے پُورے اِسرائیل تے ڈُوجھے مُلکاں ءچ خوشخبری دی تبلیغ کیتی جِیندے نتیجے ءچ عالمگیر کلیسیا بنڑی تے ودھدی گئی۔ بہُوں ظلم تے مُصیبتاں دے باوجود وی اِیمانداراں آپنڑی کوشش تے ترقی کُوں جاری رکھیا۔

اساں پولُس دے بارے ءچ وی پڑھدے ہیں جیہڑا کلیسیا اُتے ظلم کریندا ہا پر اِیمان گِھن آوݨ تُوں بعد پُوری رومی سلطنت ءچ اِنجیل دی تبلیغ کریندا ریہا۔ اِینویں کلیسیا ءچ یہُودی تے غیر یہُودی سبھ شامل تھی گئے۔