2کُرِنتھِیوں 6

1اساں جیہڑے خُدا دے کم ءچ شریک ہیں تُہاڈی مِنت کریندے ہیں جو خُدا دے اُوں فضل کُوں جیہڑا تُہاڈے اُتے تھئے بے فائدہ نہ تھیوݨ ڈیؤں۔ 2کیوں جو او فرمیندے جو

”مَیں قبولیت دے ویلے تیڈی سُنڑ گِھدی

تے نجات دے ڈینہہ تیڈی مدد کیتی1۔“

ڈیکھو! ہُنڑ قبولیت دا ویلا ہے تے ایہ نجات دا ڈینہہ ہے۔

3اساں کہیں وی گالھ ءچ تُھڈا کھاوݨ دا سبب نئیں بنڑدے تاں جو ساڈی اِیں خدمت اُتے کوئی انگل نہ چاوے۔ 4بلکہ خُدا دے خادم ہوندے ہوئے اساں ہر گالھ تُوں آپنڑی نیکی ظاہر کریندے ہیں، یعنی بہُوں صبر نال، مُصیبت ءچ، مُشکلات ءچ، تنگی ءچ، 5کوڑے کھا تے، قید ءچ رہ تے، فساد دا سامنڑا کر تے، سخت محنت کر تے، آپنڑیاں نیندراں حرام کر تے، بُکھے رہ تے، 6پاکیزگی، علم، تحمل تے مہربانی دے ذریعے، رُوح القُدس، سچی محبت، 7سچے کلام تے خُدا دی قُدرت دے ذریعے تے راستبازی دے ہتھیاراں دے ذریعے جیہڑے ساڈے سجے کھبے ہتھاں ءچ ہِن، 8عزت تے بے عزتی ءچ، بدنامی تے نیک نامی ءچ اساں آپنڑی نیکی ظاہر کریندے ہیں۔ اساں سچے ہیں پر وَل وی لوک ساکُوں دوکھے باز سمجھدے ہِن۔ 9اساں مشہور ہیں، وَل وی لوک ساکُوں نئیں جانڑدے۔ اساں موت دے مُنہ ءچ راہندے ہیں، پر ڈیکھو وَل وی زندہ ہیں۔ مار کھاندے راہندے ہیں پر جان کنُوں نئیں مردے۔ 10ڈُکھی ہیں پر ہمیشاں خوش راہندے ہیں، غریب ہیں پر بہُوں ساریاں کُوں دولت مند بنڑا ڈیندے ہیں، مسکین ہیں پر ساڈے کولھ سبھ کُجھ ہے۔

11کُرِنتھیو! اساں تُہاڈے نال کُھل تے گالھیں کریندے ہیں تے ساڈا دل تُہاڈے کیتے وڈا تھی گئے۔ 12ساڈے دِلاں ءچ تُہاڈے کیتے جاہ گھٹ نئیں تھئی پر تُہاڈے دِلاں ءچ ساڈے کیتے جاہ گھٹ تھی گئی ہے۔ 13مَیں تُہاکُوں آپنڑی اولاد سمجھ تے ایہ آدھا ہاں جو بدلے ءچ تُساں وی آپنڑے دِلاں کُوں ساڈے کیتے وڈا کرو۔

بُت پرستی دے خلاف آگاہی

14غیر اِیمانداراں دے نال ہِک پنجالی دے تلے زندگی نہ گُزارو کیوں جو راستبازی تے بدکاری دا آپس ءچ کیا واسطہ؟ یا روشنی تے اندھارے ءچ کیا تعلق؟ 15مسیح دا ابلیس2 نال کیا اِتفاق؟ یا اِیماندار دی غیر اِیماندار نال کیا شراکت؟ 16خُدا دی ہیکل دا بُتاں نال کیا تعلق؟ کیوں جو اساں زندہ خُدا دی ہیکل ہیں، جِینویں خُدا فرمایا ہے جو

”مَیں اُنہاں ءچ راہساں

تے اُنہاں دے وچال پِھرساں۔

مَیں اُنہاں دا خُدا ہوساں

تے او میڈی قوم ہوسن3۔

17اِیں واسطے رب فرمیندے

اُنہاں ءچوں نِکل تے اَنج راہو

تے کہیں وی پلیت شے کُوں ہتھ نہ لاؤ4۔

وَل مَیں تُہاکُوں قبول کریساں

18تے تُہاڈا باپ ہوساں

تے تُساں میڈے پوتر دِھیاں ہوسو۔

ایہ قول قُدرت آلے رب دا ہے۔“