Santhali Project
लुक 4
सायतान ठेन जिसुइ बिडा़उ ओचोयेन
(माथाय ४:१-११; मा़रकुस १:१२-१३)
आर जिसु दो सोनोत जिउते पेरेच्आकान जोरदान खोने रुवा़ड़ेना आर जिउ होतेते हाहाङकारतेये आ़युर इदि ओचोयेना। ओंडे दो पोनगेल दिन हा़बिच्ए ताहेंयेना आर सायतान ठेने बिडा़उ ओचोयेना; उन दिन दो चेत् हों बाय जोमलेदा आर ओनाको दिन पुरा़वेन खान उनि दो रेङगेच् केदेया।
आदो सायतान उनिये मेतादेया, “इसोररेन होपोन कान खानेम, नोवा धिरि हुकुमाक्मे जेमोन पिठा़ होयोक्।”
जिसु उनिये रोड़ रुवा़ड़ादेया, “ओल आकाना, पिठा़ मोतोते मानवा दो जिवेत् बाको ताहेना।”1
खानगे आ़युर राकाप्केदेते मित् रिपित्तेगे धा़रति रेयाक् जोतो राजे उदुक्आदेया, आर सायतान दो उनिये मेतादेया, “आमिञ एमामा नोवा जोतो एकतिया़रि आर नोवाको रेयाक् ठोनोक दो, नोवा दो एनते इञ ठेन जिमा़ आकाना, आर जाहाँयगे सानाञ उनिगे ओनाञ एमाया। आदो आम डोबोक्कातेम सेवावा़ञ खान, जोतो आमाक्गे होयोक्आ।”
जिसु उनिये रोड़ रुवा़ड़ादेया, “ओल आकाना, प्रोभु आमरेन इसोर सेवावायमे, उनि एसकारगे देवा सेवावायमे।”2
आदो जेरुसालेमते आ़युर इदिकाते कोयजोङ ओड़ाक् रेयाक् चुड़ा़रेये तेङगोकेदेया, आरे मेतादेया, “इसोररेन होपोनकान खानेम, मा नोंडे खोन दोन गोत्काक्मे,” एनते ओल आकाना, “आच्रेन दुतको आम रेयाङे हुकुमाकोवा होरहो जाङगेमे ला़गित्,3 आर, ओनको, दो तितेको सेपेञमेया, जेमोन धिरिरे जाङगा आलोम बाजावक्।”4
जिसु दो उनिये रोड़ रुवा़ड़ादेया, “रोड़ दोहोवाकाना, प्रोभु आमरेन इसोर दो आलोम बिडा़वेया।”5
आदो सायतान जोतो बिडा़वे चाबाकेत् खान, ताक आ़उरि हिजुक् हा़बिच्ए बा़गि हाताड़ादेया।
जिसु गा़लिलरे का़मिये एहोप्एत्कान
(माथाय ४:१२-१७; मा़रकुस १:१४-१५)
आर जिसु दो जिउ रेयाक् दाड़ेते गा़लिलतेये रुवा़ड़ेना; आर उनि रेयाङ उना़न दो बेड़हायतेयाक् गोटा टोठारे पासनावेना। आर उनि दो ओनकोवाक् सुना़गोगकोरेये चेत्आकोकान ताहेंकाना आर जोतो होड़को साबासियायकान ताहेंकाना।
नासारेतरे जिसुको बाङेकान
(माथाय १३:५३-५८; मा़रकुस ६:१-६)
आदो नासारेततेये हेच्एना ओने ओकारेये हारालेन आर आयाक् चा़लि लेका जिरा़उक् माँहाँरे सुना़गोगतेये बोलोयेना आर पाड़हाव ला़गित्ए तेङगोयेना। आदो जेसाया ना़बि रेयाक् पुथिको चालआदेया आर पुथि ओटाक्काते ओना ठा़ँये ञामकेदा ओकारे नोनका ओल आकाना,
“प्रोभुरेन जिउ दोए देच्आकावादिञा,
रेङगेच् ओरेच् होड़ भागे सोमबात पोरचाराको ला़गित्,
उनि दो इञे ओजोक्केदिञा।
चालोन होड़को छाडावक् रेयाक् ला़इ पासनाव, आर काँड़ाँ होड़को ञेञेल रेयाक्;
तालगातुवा़क् आकान होड़ खालासकाते बिदा़काको ला़गित्;
प्रोभुइ कुसियाक् सेरमा ला़इसाडे ला़गित्।”6
आदो जिसु पुथिये सामटावकेदा आर साप्दाप्इच् चाल रुवा़ड़ादेतेये दुड़ुप् एना आर सुना़गोगरेन सानाम होड़कोवाक् नोजोर उनिरे ताहेंकाना। आदो मेताकोय एहोप् एना, “तेहेञ दो सोसतोररे ओलाक् नोवा काथा आपे आँजोम आँजोमतेगे पुरा़वाकाना।”
आर जोतो होड़ उनि सेच्को गोहायेना आर उनियाक् मोचा खोन ओडोकोक्कान दाया दान रेयाक् काथातेको हाहाड़ाक्कान ताहेंकाना; आरको मेनेत् ताहेंकाना, “नुय दो जोसेफरेन होपोन दोए बाङकानते?”
आदोए मेतात्कोवा, “धोरागे नोवा काथापे मेता़ञा, ‘ए रारानिच् आम बाड़े बोगेकोक्मे।’ ओकाको काफारना़हुमरे होय आकानले आँजोमाकात्; नोंडे आमाक् नागराहारे हों का़मिमे।” आर जिसुइ मेनकेदा, “सा़रिगेञ मेतापेकाना, ओकोय ना़बि हों आच् निज आतोरे दो बाय बा़सुतोक्आ।7 आर सा़रियाक्गेञ मेतापेकाना, इसराएलको तालारे ढेर रा़ँडि मायजिउको ताहेंकाना एलिया़ बिदा़लरे, ओने उनरे पे बोछोर तुरुइ चाँदो दिन सेरमा सिञलेनते गोटा दिसा़मरे माराङ आकाल होयलेना।8 एनरेहों ओनको मोदरेन ओकोय ठेन हों एलिया़ दो बाय कोल ओचोलेना, बिचकोम सिदोन टोठा रेयाक् सारेपतारेन रा़ँडि मायजिउ ठेन मोतोगे।9 आर एलिसा ना़बि बिदा़लरे इसराएलको तालारे ढेर मुरहुच् जोम होड़को ताहेंकाना, एनरेहों ओनको मोदरेन ओकोय हों बाको साफा ओचोलेना, सुरिया़रेन नामान मोतोगे।”10
खानगे नोवाको आँजोमकेत् खान सुना़गोगरेन जोतो होड़ आ़डि एदरे चाड़हावात्कोवा, आर बेरेत्काते नागराहा बाहरेतेको ओडोक केदेया, ओका बुरुरे आकोवाक् नागराहा बेनाव आकान ताहेंकान, ओना रेयाक् चोट चुड़ा़ खोन ञुरहा़ये ला़गित्। मेनखान उनि दो ओनको तालातेये सेन ओडोक चालावेना।
बा़ड़िच् जिउ जाँपाँड़ होड़े बोगेओचोक्कान
(मा़रकुस १:२१-२८)
आदो जिसु गा़लिल रेयाक् मित्टेन नागराहा काफारना़हुमतेये फेड चालावेना। आर जिरा़उक् माँहाँरेये चेत्आकोकान ताहेंकाना, आर उनियाक् चेचेत्आक्तेको भाड़ोयेना, एनते उनियाक् काथा दो एकतिया़रियानाक् ताहेंकाना। आदो सुना़गोगरे मित् होड़े ताहेंकाना, ओने ओकोय बा़ड़िच् जिउवे ताहेंकानताय; उनि दो आँटतेये किकिया़उकेदा “उह आले तुलुच् आमाक् दो चेत्? ए नासारेतरेन जिसु नोसटोले ला़गित्एम हेच् आकाना? बाडायगेया़ञ ओकोय कानाम मेनते, आम ए इसोररेन सोनोतिच्।”
खान जिसु दो उनिये धोमकावकेदेया, नोवा मेनकाते, “थिरुक्मे आर उनि खोन ओडोक चालाक्मे।” आर बा़ड़िच् जिउ दो उनि होड़ ओनको तालारे भिनदा़ड़केदेते उनि खोने ओडोक चालावेना बेगोर जाहानाक् हा़नेतेगे।
आर जोतो होड़को थारबासावेना आर आको आकोरेको गालमारावकान ताहेंकाना, “चेत् रोड़कान बाङ नोवा दो? एनते एकतिया़रि आर दाड़ेते बेसाफा जिउकोय हुकुमाकोकाना आरको ओडोक चालाक्काना।” आर जिसु रेयाङ उना़न दो डामडाहेयेना ओना बेड़हाय टोठा रेयाक् जोतो जायगाकोरे।
जिसु दुखा़लिकोय बोगेयेत्को
(माथाय ८:१४-१७; मा़रकुस १:२९-३४)
आदो जिसु सुना़गोग खोन बेरेत् सेनकाते सिमोन ओड़ाक्तेये बोलोयेना आर सिमोन हानहारतेत् दो आ़डि आँट रुवा़तेये जा़बुन आकान ताहेंकाना, आदो उनि रेयाङको नेहोंरादेया। खान उनि ठेन एङगोत्काते रुवा़य धोमकावकेदा, आदो छुटा़उ गोत्एनताया आर इना़ घा़ड़िच्तेगे बेरेत्कातेये साप्सोरात्कोवा।
आर बेरे हा़सुरोक्कान ताहेंकानरे एमानतेयाक् रोगते का़हिल आकानको जोतो उनि ठेनको आ़गुकेत्कोताकोवा आर उनि दो ओनको मित्के मित् चापोकातेये बोगेकेत्कोवा।
आर बा़ड़िच् जिउको हों आ़डि होड़ खोनको ओडोक गिडिक्कान ताहेंकाना, ओने ओकोय होहोवातेको मेनेत् ताहेंकान, “आम दो इसोररेन होपोन कानाम।” आर धोमकावकेत्कोते बाय रोड़ ओचोवाकोकान ताहेंकाना, एनते मा़सि कानाय मेनतेको बाडायेदेकान ताहेंकाना।
जिसु सुना़गोगरेये पोरचारेत्कान
(मा़रकुस १:३५-३९)
आर सेताक्एन खान जिसु ओडोक सेनकाते मित्टेच् हाहाङकार जायगातेये चालावेना; आर ओनको गादेल होड़ दो उनि ञाम ञामतेको सेन तिया़क्केदेया, आरको दोहो दोहोकादेया “जेमोन आको ठेन खोन आलोय चालाक्।” मेनखान उनि दोए मेतात्कोवा, “एटाक् नागराहाकोरे हों इसोराक् राज रेयाक् भागे सोमबात पोरचाराको होयोक्तिञा, एनते ओना ला़गित्गेञ कोल ओचो आकाना।”
आर गोटा जिहुदा़ रेयाक् सुना़गोगकोरेये पोरचारेत्कान ताहेंकाना।
Source notes (10)
- Cross-reference देउ ८:३
- Cross-reference देउ ६:३
- Cross-reference सेरे ९१:११,१२
- Cross-reference सेरे ९१:१२
- Cross-reference देउ ६:१६
- Cross-reference जेसा ६१:१,२
- Cross-reference जोहा ४:४४
- Cross-reference १ रा १७:१
- Cross-reference १ रा १७:८-१६
- Cross-reference २ रा ५:१-१४
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.