Santhali Project
लुक 24
जिसुइ जिवेत् बेरेत्एन
(माथाय २८:१-१०; मा़रकुस १६:१-८; जोहान २०:१-१०)
मेनखान हापता रेयाक् पा़हिल हिलोक् आ़डि सेताक्रे कोबोर ठेनको हेच्एना, आकोको तेयारलेत् मोंहोंक सुनुमको आ़गु तोरावानते। आर धिरि दो कोबोर खोन गुडरा़उ ओचोक् आकानको ञामकेदा, आदोको बोलोयेन खान प्रोभु जिसुवाक् होड़मो दो बाको ञामलाक्आ। आर नोवा रेयाङको आ़ँदुक् मा़ँदुगोक् कान ताहेंकानरे, ञेलपे, बार होड़ फिँक लेका पिंड़िंत् पिंड़िंत् किचरिच् होरोक् आकात् ओनको ठेनकिन तेङगोयेना। खानगे बोतोरेनते ओतसेच्को कुडबुरेना, खानगेकिन मेतात्कोवा, “जिवेत्इच् दो गोच्को तालारे चेदाक्पे ञाम बाड़ायदेया? बा़नुगिच्आन नोंडे दो, मेनखाने जिवेत् बेरेत्एना, दिसा़यपे, गा़लिलरेये ताहेंकान जोखेच् चेत्लेकाय ला़इयात्पे ताहेंकाना, बाङमा, मानवा होपोन दो का़इ होड़कोवाक् तिरे सोपरोत ओचोक्, कुरुस ओचोक् आर पे माँहाँ हिलोक्रे जिवेत् बेरेदोक् होयोक्ताया मेनते,” खानगे जिसुवाक् काथाकोको दिसा़केदा। आर कोबोर खोन रुवा़ड़ सेनकाते ओनको गेलमित् चेलाको आर एटाक् सानामको नोवा काथाको जा़हिरात्कोवा। ताहेंकानाको मा़रिया़म मागदालिनि, जोआन्ना आर जाकोब एङगात मा़रिया़म आर ओनको साँवते आर मायजिउको, ओनको दो नोवाको काथा आपोसतोलकोको ला़इयात्कोवा। मेनखान ओनाको काथा दो आ़उड़ि सा़उड़ि लेकागे ओनको ठेन बुजहा़उ एना आर बाको पा़तिया़वात्ताकोवा। मेनखान पातरास दो बेरेत्काते कोबोर ठेने ञिर चालावेना आर एङगोत्काते एकेन मुसना़ किचरिच्कोय ञेलकेदा आर होय आकानाक्को रेयाङ हाहाड़ाकाते ओड़ाक्तेये रुवा़ड़ चालावेना।
एमावतेकिन चालाक्कान चेला ठेन जिसुइ सोदोरेन
(मा़रकुस १६:१२-१३)
आर ञेलपे, एनहिलोक्गे चेलाको मोदरेन बार होड़ जेरुसालेम खोन गेलमित् किला़मिटा़र गान सा़ङगिञ एमाव ञुतुमानाक् आतोतेकिन चालाक्कान ताहेंकाना। आर ओनाको जोतो होय आकानाक्को रेयाङकिन गालमारावजोङकान ताहेंकाना। आर उनकिनकिन गालमाराव आरकिन बुपुजहा़उजोङकानरे जिसु आच्गे हेच् सोरकाते उनकिन तुलुच्ए सेन इदियेना। मेनखान आलोकिन ञेल ओरोमेया मेनते उनकिनाक् मेंत् दो आकोट आकान ताहेंकान ता़किना।
आदो जिसुइ मेतात्किना, “नोवाको काथा दो चेत्काना ओने ओकाटाक् रेयाङबेन कुपुलिक्कान, चालाक्कान तुलुच्?” आदोकिन तेङगोयेना मिरलुङगे। खानगे कलेओपास ञुतुमानिच् मित् होड़ दोए रोड़ रुवा़ड़ादेया, “आम एसकारगे जेरुसालेमरे उपरिया़ मेनामा आर निया़को दिनरे ओंडे होय आकानाक्को बाम बाडाया?”
आदोए मेतात्किना, “चेत् लेकानाक्को?” मेतादेयाकिन नासारेतरेन जिसु रेयाङको, ओने उनि इसोर आर जोतो दिसा़म होड़को सामाङरे का़मि आर काथाते मित्टेन दाड़ेयान ना़बिये ताहेंकाना, आर चेत्लेका माराङ नायकेको आर आलेरेन मुखिया़को दो गोजे बिचा़ररेको सोपरोतकेदे आरको कुरुस केदेया। आले दोले आसोक्कान ताहेंकाना इसराएलको छाडावको ला़गिदोक्इच् दो उनि कानगेयाय मेनते, मेनखान नोवाको जोतो छाडा ओनाको होयेन खोन नोक्ओंय पे माँहाँ होयोक् काना। आर आले मोदरेन तिन उडिच् मायजिउ होंको ठाककेत्लेया, आ़डि सेताक्रे कोबोररे चालावेनते आर उनियाक् होड़मो बाको ञामलेत्ते, हेच्कातेको मेनकेदा, बाङमा, दुतकिन रेयाक् दोरसोन होंले ञेल आकादा, ओने उनकिन दो जिवेत्गेयाय मेनतेकिन ला़इयात्ले। आर आले साँवरेनको मोदरेन तिन उडिच् होड़ कोबोर ठेनको सेनलेना आर मायजिउकोको मेनलेत् लेकागेको ञामकेदा, मेनखान उनि दो बाको ञेललेदेया,
खानगे जिसुइ मेतात्किना, “ए बेबुज, ना़बिकोको रोड़ आकात्आक्को पा़तिया़उरे गा़न्ढिया़ मोनेयानकिन। मा़सि दो नोवाको दुक जोजोम आर आयाक् ठोनोकरे बोलोक् जा़रुड़ बाङ ताहेंकानताया?” आदो मोसेयाक् आर जोतो ना़बिकोवाक्को खोन एहोप्काते जोतो सोसतोरकोरे आच् रेयाङकोय भाङगावात्किना।
आदोकिन चालाक्कान ताहेंकान आतोको सेन सोर एना आर जिसु दो आर हों लाहाते सेन इदिक् लेकाय ञेल एना। आदो का़ँवा़ँरिकातेकिन मेतादेया, “आ़लिञ ठेन बाड़े ताहेनमे, एनते आ़युबोक् काना आर बेर होंए फेड एना।” आदो उनकिन ठेन ताहेन ला़गित्ए बोलोयेना। आर उनकिन साँवते जोजोमे दुड़ुप्एन खान, पिठा़ हालाङकातेये भोरादा आर केचाक्कातेये एमाकिनकान ताहेंकाना। खानगे उनकिनाक् मेंत् दो साड़ेन ता़किना आरकिन ओरोम केदेया आर उनि दो उनकिन ठेन खोने छानगोत् एना। आदोकिन मेपेनेना, “चेत् आलाङाक् मोन आलाङरे बाङ लोलोक्कान ताहेंकाना, ओने होर होरतेये गालमारावालाङकान ताहेंकान आर सोसतोर रेयाक्ए भेद भाङगावालाङकान ताहेंकानरे?”
आदो इना़ घा़ड़िच्गे बेरेत्काते जेरुसालेमतेकिन रुवा़ड़ चालावेना आर ओनको गेलमित् चेलाको आर ओनको साँवरेनको जारवा आकानकिन ञामकेत्कोवा, ओने ओनकोको मेनकेत् बाङमा “प्रोभु दो खा़टिगेये जिवेत् बेरेत् आकाना आर सिमोन ठेने सोदोरेना।”
आर उनकिन दो होर तेयाक्को रेयाङ आर पिठा़ केक्चाक्रे चेत्लेका उनकिन ठेने ओरोमेना, ओना रेयाङकिन ला़इ सोदोरात्कोवा।
जिसु आच्रेन चेलाको ठेने सोदोरेन
(माथाय २८:१६-२०; मा़रकुस १६:१४-१८; जोहान २०:१९-२३; आपोस का़मि १:६-८)
आदो ओनाको रेयाङको गालमारावकान ताहेंकानरे आच्गे ओनको तालारे तेङगोयेनतेये मेतात्कोवा, “सुलुकापेमा।”
खानगे थारथाराव आर बोतोरेनते मित्टेन जिउको ञेले काना मेनतेको बुजहा़उकेदा। आदोए मेतात्कोवा, “चेदाक्पे तोरास आकाना आर चेत् इया़ते आपेयाक् मोनरे ना़ंदिगुंदि राकाप् आकाना?” ञेलपे इञाक् तिकिन, ञेलपे इञाक् जाङगाकिन, इञ कानगेया़ञ मेनते तुनुमिञपे आर ञेलपे, एनते जिउ रेयाक् जेल आर जाङ दो बा़नुक्आनाङ इञ मेनाक्तिञपे ञेलेत्लेका दो।
आर नोवा मेनकाते आयाक् ति आर जाङगाय उदुक्आत्कोवा। मेनखान उन हा़बिच् हों रा़सका़ इया़ते बाको पा़तिया़उक् आरको हाहाड़ाक्कानतेये मेतात्कोवा, “नोंडे जाहान जोमाक् मेनाक्तापेया?” ओनको दो मित् कुटरा़ रापाक् हाकोको चालआदेया। आदो ओना आताङकाते ओनको सामाङरेये जोमकेदा।
आरे मेतात्कोवा, “नोक्ओंय नोवागे इञाक् काथाको ओने आपे तुलुच् इञ ताहेंकानरेञ गालमारावात्पे” एन काथाय, मोसे रेयाक् आ़नरे आर ना़बिको रेयाक् पुथिरे आर सेरेञकोरे इञ रेयाङ ओल आकानाक्को दो पुरा़उक्गे जा़रुड़ा। खानगे सोसतोरकोको बुजहा़उ ला़गित् बुदे झिच्केत्ताकोवा आरे मेतात्कोवा, नोनकागे ओल आकाना, “मा़सि दो दुके जोमा आर पे माँहाँ हिलोक्रे गोच्को खोने जिवेत् बेरेदोक्आ। आर उनि ञुतुमते सानाम होड़को ठेन का़इ इका़क् ला़गित् मोन आ़चुर पोरचारोक्आ, जेरुसालेम खोन एहोप्काते। आपेगे नोवाकोरेन गोहाको। आर ञेलपे, इञ दो आ़पुञ रेयाक् गोक्आक् आपेरेञ कोल गोत्काक्काना, मेनखान नोवा नागराहारे बाड़े ताहें हाताड़ोक्पे चोट खोन दाड़े आ़उरिपे होरोक् ओचोक् हा़बिच्।”
जिसु सेरमातेये राकाप्एन
(मा़रकुस १६:१९-२०; आपोस का़मि १:९-११)
खानगे बेथानिया़ फेड हा़बिच्ए आ़युर इदिकेत्कोवा, आर आयाक् तिकिन तिया़रकातेये भोरात्कोवा। आरे भोराकोकान तुलुच्गे ओनको खोने बेगारेना आर चेतान सेरमातेये राकाप् इदि ओचोयेना। आर ओनको दो सेवावादेते माराङ रा़सका़वानते जेरुसालेमतेको रुवा़ड़े। आर जावगे कोयजोङ ओड़ाक्रे इसोरको सारहावेदे ताहेंकाना।
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.