Santhali Project
लुक 15
आत्लेन भिडि रेयाङ
(माथाय १८:१२-१४)
मित् दिन जोतो मा़सुल उक्ठा़उको आर का़इ होड़को जिसु ठेनको सोरोक्कान ताहेंकाना आँजोमताय ला़गित्। आर फा़रिसिको आर आ़न गुरुकोको काराच्कुरुजोक्कान ताहेंकाना, मेनकेदाको, “नुय दो का़इ होड़े आताङ दारामेत्कोवा आर ओनको तुलुच्ए जोमेदा।” आदो जिसु नोवा फेने ला़इयात्कोवा।
आपे मोदरे जाहाँयरेन मित्साय भिडिको ताहेनताय आर ओनको मोदरे मित्गोटेने आत्लेरे, ओनको आरेगेल आरे दो हाहाङकाररे बा़गि ओटोकाते, उनि आत्इच् बाय पाँजायेया आ़उरिये ञामे हा़बिच्? आरे ञामलेरे आयाक् तारेनरेये लादेयेया रा़सका़काते। आर ओड़ाक्ते हेच्काते आच्रेन गाते पेड़ाको आर आडेपासेरेनको होहो जारवाकातेये मेताकोवा, इञ तुलुच् रा़सका़क्पे, एनते आत्लेन भिडि दोञ ञाम केदेया। मेतापे का़ना़ञ, ओनकागे मोन आ़चुर जा़रुड़ बा़नुक्ताको आरेगेल आरे भागे होड़को खोन दो कासतावक्कान मित्टेन का़इ होड़ इया़ते सेरमारे बा़ड़ति रा़सका़ होयोक्आ।
आत्लेन सिकि रेयाङ
“से जाहाँय मायजिउ गेल गोटेच् सिकि ताहेनताय आर मित्टेच् सिकिये आत्लेरे, दिउहे जेरेत्काते आर ओड़ाक् जोक्जोक्ते सुच्सुतरुच् बाय ञाम बाड़ाया आ़उरिये ञाम हा़बिच्? आर ञामलेरे गाते मायजिउको आर आडेपासेरेनको होहो जारवाकातेये मेना। इञ तुलुच् रा़सका़क्पे, एनतेञ आत्लेत् सिकि दोञ ञामआकादा। ओनकागे, मेतापे का़ना़ञ, इसोररेन दुतको सामाङरे रा़सका़ होयोक्आ का़इको खोन कासतावक्कान मित्टेन का़इ होड़ इया़ते।”
आत्लेन होपोन
आरहों जिसुइ मेनकेदा, “मित् होड़रेन बारया होपोनकिन ताहेंकानताया। आर उनकिन मोदरे हुडिञिच् दो आपाते मेतादेया, ‘ए बाबा आमाक् धोन दुरिब रेयाक् इञरे पाड़ावकोक् बाखरा देन एमका़तिञमे।’ आदो आयाक् ताहेंकानतायाक्ए हा़टिञात्किना। खानगे थोड़ा दिन तायोमते उनि हुडिञिच् होपोन दो सानामाक्को सामटावकाते मित्टेच् सा़ङगिञ दिसा़मतेये ओडोक चालावेना आर ओंडे रिजरोङते ताहेंकानतायाक्ए ताहास नाहास चाबाकेदा। आर सानामाक्कोय उबला़डुबला़केत्ताय खान ओना दिसा़मरे आ़डिआँट आकाल होयेना आर उनि दो रेङगेजोक्ए एहोप् एना। आर ओना दिसा़मरेन मित्टेन रायोत ठेन का़मि ला़गित् का़मि सेंदराय सेन एना आर उनि दो आयाक् डोहटा जायगातेये कोलकादेया सुकरि गुपि। आर सुकरिकोको जोमेत् ताहेंकान चोकलाक्कोते आयाक् लाच् पेक्रेच्ए गागोजोक्कान ताहेंकाना आर ओकोय हों चेत् हों बाको एमायकान ताहेंकाना। आदो चेतावेनतेये मेनकेदा, आ़पुञरेन उना़क् उना़क् मुनिसको दो सारेड़ोक् लेका जोमाक् मेनाक्ताकोवा, मेनखान नोंडे इञ रेङगेच्तेञ गुजुक् काना। बेरेत्काते आ़पुञ ठेनिञ चालाक्आ आर इञ मेताया, ए बाबा, सेरमा रेयाक् आर आम सामाङरेञ का़इ आकादा। आरदो आमरेन होपोन ञुमोगोक् लेकगेञ बाङ काना, आमरेन मुनिस मेनते दोहोका़ञमे बाड़े।”
“खानगे बेरेत्काते आच् आपात ठेने हेच्एना। मेनखान सा़ङगिञरेये ताहेंकानरेगे आपात दोए ञेल ञाम केदेया आर माँयाँ हेच् आदेया आर ञिर सेनकातेये कोके केदेया आरे चोक् चोक्आदेया। मेनखान होपोन दोए मेतादेया, ए बाबा, सेरमा रेयाक् आर आम सामाङरेञ का़इ आकादा आर दो आमरेन होपोन ञुमोगोक् लेकगेञ बाङ काना।” “मेनखान आपाततेत् दो आच्रेन गुतिये मेतात्कोवा, देन भागे उता़राक् ओयोन आङगरोप ओडोक आ़गुहोत्काते होरोक्आयपे आर ति ला़गित् मुनदा़म आर जाङगा ला़गित् खारपा एमायपे। आर उनि पोसाव आकादे दामकोम आ़गुकाते गुरहोदेपे आर जोतोबोन हेसेच्सेकरेजोक्मा। एनते नुय इञरेन होपोन दो गोच्गेये ताहेंकाना आरे जिवेत् रुवा़ड़ आकाना, आत्गेये ताहेंकाना आरे ञाम आकाना। खानगे हेसेच्सेकरेजोक्को पोरतोनकेदा।”
“मेनखान माराङिच् होपोनतेत् दो गोडारेये ताहेंकाना आर ओड़ाक्ए हेच् सोरेन खान, सेरेञ आर एनेच्ए आँजोमकेदा। खानगे मित्टेन गुति कोड़ा होहो सोरकातेेये कुलि बुजहा़वाना चेत् होयोक् काना मेनते। उनि दोए मेतादेया, बोकोमे हेच् आकाना आर आ़पुम दो उनि पोसाव आकादे दामकोमे गुर आकादेया, एनते नापायगेये ञाम रुवा़ड़ आकादे इया़ते। खानगे आच् दादा दोए राङगावेना आर बोलोक् बाय रेबेनलेना, आदो आपाततेत् ओडोक हेच्कातेये नेहोंरादेया। मेनखान उनि दो आपाततेत्ए रोड़ रुवा़ड़ादेया, नोक्ओंय नुन सेरमा खोन आम ठेन गोलाम इञ खाटावाकाना आर आमाक् हुकुम दो तिस हों बा़ञ ताड़ाम पारोम आकादा एनरेहों इञ दो तिस हों मित्टेच् मेरोम होपोन तानाक् हों बाम एम आकावादिञा इञरेन गातेको साँवतेञ हेसेच्सेकरेच् जोङा मेनते। मेनखान कुसुमबिको तुलुच् आमाक् धोने जोम चाबावाकात् नुय होपोनमेये हेच्एन खान दो, पोसाव आकादे दामकोमेम गुर आदेया।” “खान आपात दोए मेतादेया, ए बा़बु आम दो जावगे इञ सोङगेरे मेनामा आर इञाक् जोतोवाक् दो आमाक्कानगेया। मेनखान हेसेच्सेकरेजोक् आर रा़सका़क् दो लेकगेताबोना, एनते नुय बोकोम दो गोच्गेये ताहेंकाना आरे जिवेत् एना, आत्गेये ताहेंकाना आरे ञामेना”
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.