Santhali Project
लुक 13
का़इको खोन आ़चुरोक् बाङखान गुजुक्
आदो ओना जोखेच्गे ओंडेको ताहेंकान आदोम होड़ ओनको गा़लिलरेनको रेयाङ जिसुको ला़इयादेया, ओने ओनकोवाक् माँयाँम पिला़त दो ओनकोरेन दाँड़ेंको तुलुच्ए मिला़उलेत्। आदो जिसुइ रोड़ रुवा़ड़ात्कोवा, “चेत्पे बुजहा़वेदा, ओनको गा़लिलिको दो जोतो गा़लिलरेनको खोन बा़ड़ति का़यानको ताहेंकाना, नोवाको पाड़ावात्कोते? मेतापे का़ना़ञ, बाङा, बिचकोम का़इ खोन बापे कासतावलेन खान, आपे जोतोको ओनकागेपे नोसटोक्आ। से ओनको गेलइरा़ल होड़को ओने ओनको चेतानरे सिलोआम रेयाक् बुरुंज भिनदा़ड़ात्कोतेये गोच्केत्को, आपे बुजहा़उरे ओनकोगे जेरुसालेमरे ताहेन जोतो होड़को खोन बा़ड़ति दुसियानको ताहेंकाना? मेतापे का़ना़ञ बाङा, बिचकोम का़इ खोन बापे कासतावलेन खान, आपे जोतोको ओनकागेपे नोसटोक्आ।”
बाङ जोक् लोवा दारे रेयाक् फेन
आदो जिसु नोवा फेने ला़इयात्कोवा, “मित् होड़ आयाक् दारखा बागवानरे रोहोय आकात् मित्टेच् लोवा दारे ताहेंकानताया। आर हेच्काते ओनारे जोय ञाम बाड़ायेत् ताहेंकाना, मेनखान बाय ञामलाक्आ। खान दारखा बागवानरेन मा़लिये मेतादेया, ञेलमे, पे सेरमा खोन हेच्काते नोवा लोवा दारेरे जोञ ञाम बाक्ड़ाकाना, मेनखान बा़ञ ञामेदा, नोवा दो माक् गिडिकाम, चाक् ओना दो ओते एसेत्काक्आ?” आदोए रोड़ रुवा़ड़ादेया, “ए बाबा, निया़ सेरमा बाड़े इका़काम आ़उरिञ ला आ़चुर आरिञ गुरिच्आक् हा़बिच्। आदो हिजुक् सेरमा जोलेन खान मा बोगेगे, बाङखान दोम माक् गिडिकेत्गे।”
जिसु दो जिरा़उक् माँहाँरे कुबढि मायजिवे बोगेयेदे
आदो जिसु जिरा़उक् माँहाँरे मित्टेच् सुना़गोगरेये चेत्आकोकान ताहेंकाना। आर ञेलपे, मित्टेन मायजिउ ओने उनिरे गेलइरा़ल सेरमा खोन निक्जोर ओक्चोयिच् बा़ड़िच् जिवे ताहेंकानताय, आर कुबढि आकाने ताहेंकाना आर ओकालेकाते हों बाय सोजहे दाड़ेयाक् कान ताहेंकाना। आदो जिसु उनिये ञेलकेदे खान, होहो सोरकातेेये मेतादेया, “ए गो, आमाक् रुवा़ खोन दोम बोगेयेना।” आर जिसु दो तिकिने चापोवादेया। खानगे एकालतेये सोजहे गोत्एना आर इसोरे साबासिवादेया।
आदो सुना़गोगरेन मुखिया़इ एदरेयेना, एनते जिरा़उक् माँहाँरे जिसुइ बोगेकेदेते, आर गादेल होड़े मेतात्कोवा, तुरुइ माँहाँ मेनाक्आ ओने ओनकोरे का़मि होयोक्। ओनाते इना़कोरेगे बाड़े बोगे ओचोक् ला़गित् दो हिजुक्पे आर जिरा़उक् माँहाँरे दो आलो।1
मेनखान प्रोभु दो उनिये रोड़ रुवा़ड़ादेया, “ए फा़सिया़राको आपे मिमित् होड़ जिरा़उक् माँहाँरे आपेरेन डाङगरा से गादहा गोड़ा डाकाडाक् ठेन खोन राड़ाकाते दाक् ञु बापे इदियेत्कोवा? आर उनि मायजिउ, ओने उनि आबराहामरेन मित्टेन होपोनेरा काने, ओकोय सायतान गेल इरा़ल सेरमा खोने तोललेदे, जिरा़उक् माँहाँरे ओना तोनोल खोन राड़ा ओचोक् दो बाङ गानोक्ताया?” खान जिसु नोवाकोय रोरोड़कानरे उनि उपा़रते जोतो तेङगो दारामकोको लाजावक्कान ताहेंकाना। आर जोतो गादेल होड़को दो जिसु होतेते होयोक्कान ताहेंकान सानाम ठोनोकानाक्कोतेको रा़सका़येना।
तुड़ि इता़ रेयाक् फेन
(माथाय १३:३१-३२; मा़रकुस ४:३०-३२)
आदो जिसुइ मेनकेदा, “इसोराक् राज दो ओका लेकाना, आर चेत् तुलुच् ओना दोञ तुला़या? ओना दो मित्टेन तुड़ि जाङ लेकाना ओकाटाक् दो मित्टेन होड़ इदिकाते आयाक् बाड़गेरेये एरकेत् आर ओना दो हारायेना आर मित्टेच् दारे होयेना आर चोटरेन उडा़उक् चेंड़ेंको दो ओना रेयाक् डा़रकोरेको तुका़येत्काना।”
ता़ड़ि रेयाक् फेन
(माथाय १३:३३)
जिसु दो आरहोंए मेनकेदा, “इसोराक् राज दो चेत् तुलुच् इञ तुला़या? ओना दो ता़ड़ि लेकाना ओकाटाक् मित्टेन मायजिउ दो हातावकाते पे सुलि होलोङरेये मेसालकेत्, आर ओना जोतो दो ता़ड़ियानाक् होयेना।”
साकड़ा दुवा़र
(माथाय ७:१३,१४; २१—२३)
आदो जिसु नागराहा नागराहा आर आतो आतो दाँड़ाँ दाँड़ाँते ला़इ चेचेत्कान जेरुसालेमतेये चालाक्कान ताहेंकाना।
आदो मित्टेन होड़ जिसुइ मेतादेया, “हेंदा प्रोभु, चेत् बाञचावक्को दोको थोड़ागेया?” जिसु दोए मेतात्कोवा, “साकड़ा दुवा़रते बोलोक् ला़गित् ला़गिया़ँपाड़ाक्पे। एनते मेतापे का़ना़ञ, आ़डि होड़ बोलोक्को ञाम बाड़ाया, मेनखान बाको दाड़ेयाक्आ। ओड़ाक् किसा़ँड़ बेरेत्काते दुवा़रे सिञलेरे आर आपे दो बाहरेरे तेङगोकाते सिलपिञपे ठोप् ठोप्, आरपे मेन ए प्रोभु, देसे झिच्आलेमे। आदोए रोड़ रुवा़ड़ापेया, बा़ञ बाडायेत्पेया ओकारेन कान चोङपे।” उनरेपे मेना, “आम सामाङरेगे चोङले जोम ञुलेत् आर आलेयाक् कुलहिकोरेगेचोम ला़इ चेत्आलेकान ताहेंकान।” आदोए मेना मेतापे का़ना़ञ, “बा़ञ बाडाया ओकारेनकानचोपे। इञ ठेन खोन दो मेन ञिरजोङपे, आपे जोतो बेधोरोम का़क्मिको दो।”2 “ओंडे दो राक्जोङ आर तोगोच्डाक्टा होयोक्आ, आबराहाम, इसाहाक आर जाकोब आर सानाम ना़बिको इसोराक् राजरेपे ञेलकोरे आर आपे दो बाहरेरेपे ओडोक गिडि ओचोक्रे।3 आर पुरुब आर पा़छिम आर उता़र आर दा़खिन खोन होड़को हिजुक्आ आर इसोराक् राजरे भोजरेको सेलेदोक्आ। आर ञेलपे, तायोमतेनको मेनाक्कोवा ओने ओनको पा़हिलतेनकोको होयोक् आर पा़हिलतेनको मेनाक्कोवा ओने ओनको तायोमतेनकोको होयोक्।”4
जेरुसालेम ला़गित् जिसुवाक् दुला़ड़
(माथाय २३:३७-३९)
ओना घा़ड़िच्गे तिन उडिच् फा़रिसिको चोङ हेच्कातेको मेतादेया, नोंडे खोन ओडोक चालाक्मे, एनते हेरोद दो गोच्मेये मेनजोङ काना।
आदो जिसुइ मेतात्कोवा, “दो सेनकाते उनि तोयो दो मेतायपे, ञेलमे, तेहेञ आर गापाते भुतकोञ ओडोक गिडियेत्कोवा आर होड़कोञ बोगेकोवा आर तेसार हिलोक् दो इञाक् का़मि सा़ता़क्आ। एन हों तेहेञ, गापा आर मेयाङ दो दाड़ानतेगे होयोक्तिञा, एनते जेरुसालेम बाहरेरे मित्टेन ना़बिये बेनडावक् दो ओहो होयलेना।”
ए जेरुसालेम, ए जेरुसालेम, ना़बिको गोगोच्इच् आर आम ठेन कोलको धिरिते तितिञिच्, तिना़क् धाव आमरेन होपोनको हा़र सामटावकोञ मेनवाना, सिम एङगा आच्रेन होपोनको फा़ँकड़ा़ँक् लाताररेये गुङगुत्को लेका, मेनखान आपे दो बापे रेबेनलेना। ञेलपे, आपेयाक् ओड़ाक् दो आपे ला़गित् उजा़ड़गे बा़गि ओटोक्काना, मेतापे का़ना़ञ बाङगेपे ञेलेञा “भोरानगेयाय प्रोभु ञुतुमते दारायकानिच् दो आ़उरिपे मेन हा़बिच्।”5
Source notes (5)
- Cross-reference एकसो २०:९-१०; देउ ५:१३-१४
- Cross-reference सेरे ६:८
- Cross-reference माथ ८:११-१२; २२:१३; २५:३०
- Cross-reference माथ १९:३०; २०:१६; मा़र १०:३१
- Cross-reference सेरे ११८:२६; जिरि १२:७; २२:५
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.