Santhali Project
आपोस का़मि 20
मा़किदुनिया़ आर आ़सिया़ सेच्
आदो ओना हुलमाल थिरेन तायोम पावल दो चेलाको होहो आ़गु ओचोकातेये उसकुरकेत्कोवा, आर ओनको बिदा़ जोहारात्कोते मा़किदुनिया़ते सेनोक् ला़गित्ए ओडोक चालावेना। आर ओनाको टोठा तालातेये सेन इदियेना आर ढेर काथातेये उसकुरकेत्कोते जुना़नितेये चालावेना। आर पे चाँदो ओंडेये खेमावकेत् खान, आर जाहाजते सुरिया़तेये चालाक् ला़गिदोक्कान ताहेंकानरे जिहुदिको उनि उपा़रतेको मित् सा़तेना उनि जालसा़जिये ला़गित् खान, मा़किदुनिया़ तालाते रुवा़ड़ चालाक्गेये गोटावाना। आर बेरिया़रेन पुरोस होपोन सोपातेर दो उनि सोङगेते आ़सिया़ हा़बिच्ए चालावेना, आर नोकोको हों, थेस्सालोनिकिको मोदरेन आ़रिसतारखुस आर सेकुनदुस, देरबेरेन गा़युस आर आर आ़सिया़रेन तुखिकुस आर तरोफिमुस आर तिमोथि। आर ओनको दो सेन लाहाकाते तरोआसरे आलेको ता़ङगिकेत्लेया। मेनखान आले दो बिन ता़ड़ियानाक् पिठा़ पोरोब दिनको तायोम फिलिपि खोन जाहाजतेले चालावेना, आर मोंड़ें माँहाँते ओनको ठेन तरोआसतेले सेटेरेना आर ओंडे दो एयाय माँहाँले ताहेंयेना।
मुचा़त् धाव तरोआसतेये चालावेन
आर हापता रेयाक् पा़हिल हिलोक् पिठा़ केचाग ला़गित्ले हेच् जारवा आकान ताहेंकानरे, पावल दो दोसार हिलोक् ओडोक चालाक्ए मेनजोङकान ताहेंकानते, ओनकोय गालमारावात्कोवा, आर ताला ञिंदा़ हा़बिच्ए गालमाराव इदिकेदा। आर ओना चेतान कांदहारे, ओने ओकारेले जारवा आकान ताहेंकान, आयमा दिउहेको जोलोक्कान ताहेंकाना। आर एथुकुस ञुतुमान मित्टेन जुवा़न होड़ दो खिड़कि दुवा़ररे दुड़ुप् आकान ताहेंकाना। आदो पावल दो आ़डि घा़ड़िच्ए गालमाराव इदियेत् ताहेंकानते, उनि दो आ़डि दुद्ड़ुमकेदेतेये जा़पित् ला़थिया़वेन खान तेसार माहला खोने ञुरहा़येना आर गोच्गेको तुल राकाप् केदेया। खानगे पावल दो फेडेनते उनिये ताबेर लोटोमकेदेया, आर उनि हा़ड़ुप्केदेतेये मेनकेदा, “आलोपे का़वा़रा़वा़क्आ, एनते जिवि दो मेनाक्गेताया।” आदो राकाप् सेनेनते पिठा़इ केचाक्केदा, आरे जोमकेदा, आर ढेर घा़ड़िच् आङगा मारसालोक् हा़बिच्ए गालमारावात्कोवा, आदोए ओडोक चालावेना। आर उनि कोड़ा दो जिवेत्गेको आ़गु केदेया, आर आ़डितेत् जिवि राड़ेच्एन ताकोवा।
तरोआस खोन मिलेतुस हा़बिच्
मेनखान आले दो जाहाज ठेन सेन लाहायेनते जाहाजते आससोसतेले मोहंडायेना, ओंडे पावल देजेले मेनवान ताहेंकानते, एनते ओनकागेये निट आकात् ताहेंकाना, आच् दो ओत ओततेये चालाक् ला़गिदोक्कान ताहेंकानते। आदो आससोसरे आले तुलुच्ए ञापामेन खानले देच् केदेया आर मितेलेनेतेले हेच्एना। आर ओंडे खोन जाहाजते चालावेनते दोसार हिलोक् दो खियोस मोहंडारेले सेटेरेना; आर ओना दोसार हिलोक् दो सामोस ठेनले तेङगोञोक्केदा आर ओना दोसार हिलोक् दो मिलेतुसरेले सेटेरेना। एनते पावल दो जाहाजते एफेसुस कोञे ओटोकात्ए निट आकात् ताहेंकाना, जेमोन आ़सिया़रे दिन खेक्माव आलो होयोक्ताय; एनतेये उसा़रायेत् ताहेंकाना, होय दाड़ेयाक् खान जेमोन पेनतेकोस हिलोक् दो जेरुसालेमरेये ताहेन।
एफेसुस रेन मुरुबिको ला़गित् पावलाक् मुचा़त् पोरचार
आर मिलेतुस खोन एफेसुसते काथा कोलकेत्ते का़लिसिया़रेन मुरुबिकोय होहो आ़गुकेत्कोवा। आर उनि ठेनको हेच्एन खाने मेतात्कोवा।
आपेपे बाडाया, आ़सिया़रेञ बोलोयेन पा़हिल हिलोक् खोन जावगे चेत्लेका आपे तुलुच् इञ बेवहार आ़गुवाकादा। प्रोभु ठेन गोलाम इञ खाटावेना, आ़डि निंधा़न मोनते, मेंत्दाक् जोरो जोरोते, आर जिहुदिकोवाक् बा़ड़िच् पोन्था पाड़ावादिञ बिडा़उको सालाक्। इञ दो जाहान पोरहोवानाक्गे ला़इ सोदोरापे आर चेत् आपे बा़ञ पा़चलेना, सोदोररे आर ओड़ाक् ओड़ाक्रे, इसोर सेच् मोन आ़चुर रेयाक् आर आबोरेन प्रोभु जिसु मा़सिरे पा़तिया़उक् रेयाक् जिहुदिको हों आर जुना़निको हों गोहाञ एम इदियात्कोते। आर नितोक् दो ञेलपे इञ दो सोनोत जिउतेञ तोलआकान जेरुसालेमतेञ चालाक् काना, ओंडे चेत्को चोङ पाड़ावा़ञ, ओना दो बिन बाडायतेगे सोनोत जिउ दो नागराहा पिछे गोहावा़ञकानतेये मेता़ञ काना, बाङमा तोनोलको आर सानतावकोको ता़ङगिएदिञ काना। मेनखान इञाक् जिवि दो आपनार ला़गित् दामानाक् बा़ञ मेताक् काना, खा़जुक इञाक् साफोर इञ पुरा़उ दा़ड़ेयाक्, आर ओना साप्दाप् का़मि हों, ओकाटाक् प्रोभु जिसु ठेन खोन इञ ञामआकात्, मेताक् मे इसोराक् दाया रेयाक् भागे सोमबात रेयाक् गोहा एमोक्।1
आर नितोक् दो ञेलपे इञिञ बाडाया, आपे जोतोको, ओने आपे तालारे दाँड़ाँ दाँड़ाँते राजोसटि रेयाक् इञ पोरचारकेत्, आर दो इञाक् मेंत्हाँ बापे ञेला। ओना इया़ते तेहेञ इञ गोहावापे काना, जे इञ दो सानाम होड़कोवाक् माँयाँम खोन इञ मिरिदोसगेया। एनते इसोराक् गोटा मोने रेयाक् ला़इ सोदोरापे दो बा़ञ पा़चलेना। आपनार ला़गित् सोनतोरोक् पे, आर गोटा खा़ड़रेनको ला़गित् हों, ओने ओनको तालारे सोनोत जिउ दो होहोरहोको मेनकातेये दोहोआकात्पे इसोराक् का़लिसिया़रेनको गुपिकोवा मेनते, ओने ओका आच् निज माँयाँमतेये किरिञान। इञिञ बाडाया, इञ सेन तायोम चाङके हुनडा़रको आपे तालारेको बोलोक्आ, ओनको दो खा़ड़रेनको बाको माँयाँवाकोवा। आर आपे मोद खोनगे होड़कोको तेङगोना, ओने ओनको पेड़तावाक्कोको रोड़, चेलाको आको तायोमते झाकरावको ला़गित्। ओना इया़ते जागवारआकाय ताहेनपे, नोवा दिसा़काते, जे पे बोछोर हा़बिच् सिञ ञिंदा़ मेंत्दाक् जोरो जोरोते आपे मित्के मित् होड़ चेहावपे दो बा़ञ थिरलेना।
आर नितोक् दो इसोर ठेन आर उनियाक् दाया रेयाक् काथारेञ जिमा़कापे काना, ओने उनि दोए बेनाव इदि दाड़ेयापे आर सानाम सोनोतको तालारे आ़इदा़रिये एम दाड़ेयापे। ओनकोवाक् हों रुपा़ से सोना से किचरिच् बा़ञ लालोचआदा। आपेपे बाडाया, इञ आर सोङगेतेनको जा़रुड़ालेयाक्को ला़गित् दो निया़ तिगेकिन खाटावलेना। इञ दो सानामाक्रेञ का़मि उदुक्आत्पेया, ओनका मेहनोतकाते निजोरको गोड़ोंवाको लेक ताबोना मेनते, आर जेमोन प्रोभु जिसुवाक् काथाबो दिसा़य चेत् लेका आच्गेये मेनकेत्, “बिचकोम हाक्ताव खोन एमोक्गे भागेया।”
आदो ओनाकोय रोड़केत् खान इखड़ुमेनते ओनको सानामको साँवतेये कोयकेदा। आर सानामकोगे हुँक हुँकको राक्केदा आर पावल कोकेकेदेतेको चोक् चोक्आदेया। ढेरकायते दो ओना काथा इया़तेको भाबनायेनते ओनेये मेनलेत्, बाङमा इञाक् मेंत्हाँ आर दो बापे ञेला। आदो जाहाज हा़बिच् को इदि गोत्कादेया।
Source notes (1)
- Cross-reference २ ति ४:७
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.