Mat 6

O baala azaa o nyaza

1“Ezana a sauwo tana ogole oying orere wa itǝ ogongta a yizi ne. Azaa obena e eza nyimi, eto cǝ o taasa o woma araa Ate aying o zaa shili ne.

2“Nyimia baaya nya ana odera, tana o ara lengmelo ajǝng ka komana kone ne, ana o ara ukpwei ezeze nyimi odandaro o gwarzanang maYahuda ka azaa marona adora aromo sabe ne. Eyang dongdong bele oying, ne samba ocǝ o taasa o woma one pat. 3Aa bayaa nya ondo odera eyapa, tana o baya o ara oguri wa rose epaaka o ara ore ya eza me ne, 4adorana nyaza oying itǝ epa esuk. Arakaname Ate aying, ka wa gongte epaaka aya ezaa me aa asuk, wayo taasau akap.

O baala azaa o beya angmǝ ka Ashili

(Luk 11:2-4)

5“Aa baaya beya angmǝ ka Ashili, tana oye na ana o ara ukpwei ne, ne yeme o beya angmǝ ka Ashili a itǝ a madandaro ma ogwarzanang maYahuda ka edǝki marona ka aromo laka ne. Eyang dongdong bele oying epeng, ne samba o emba o taasa one a pat.1 6Nyimia waaza, baya beya angmǝ ka Ashili, ale a nyimi odo o, pate abuudu me o beye angmǝ ka Ate au aaka ata gonta ai ne, aa Ate au ka agonte pate epaaka a eze a suk, ayo taasau.

7“A eeya beya angmǝ ka Ashili, tana wa eweo na aworme ka neta rosa Ashili ne, andaame neya gonta na ne beya angmǝ a ewo waya yo ote ka kone ne. 8Tane itǝ na nee ne, Ate ying rosa epaaka e gwara ka ying zongka e pirkǝ ai.

9E beya angmǝ ka Ashili nanna,

“Ate aro ozaa shili,

a monte leze leo a sangsang.

10A togomo to de,

aa eze epaaka oya yeme me

a lerambo leena,

nangka ezeze azaa shili.

11Nyaro epaolya o ngmeengme.

12O pisi ro madinǝ maro,

nangka te pisizi andaaka ne ezeze ro madinǝ.

13Tana o ale kaaro ara o kedeya ne,

o wobe ro a taara te ogomo o bere o buru ona.’

14“E pisǝ aromo aaka ne ezeze ying epa eburu, Ate aying o zaa shili yo pisǝ maying’. 15Aa eeta pisǝ ana ondo madinǝ mane ne, Ate ying to pisǝ epa eburu eeying ne.”

O baala azaa o pate ongmǝ

16“Eeya meke o ngmǝ, tane care mayinu nangka ana o ara ukpwei ezeze ne. Ne care mayinu kane wore aromo bekaana neya eza opate o ngmǝ. Ang dongdong bele oying, ne samba ocǝ o taasa one naname. 17Aa baaya pate o ngmǝ, kwizǝ mayinu mau, o saane mai manau, 18adorana tana rosa o bena oya eza o pate o ngmǝ ne. Ate au kaa ta gonta ne, ooka kangza wa gonte pate epaaka a ezeze a suk, wayo taasau.

O baala azaa o eke ocǝ azaa shili

(Luk 12:33-34)

19“Tana e kuri tukpwei toying ocǝ a lerambo leena araaka egau kaa orengkaka yo cara wai ne, araaka akǝri neyo pora ka ne lyǝ ne kpwi. 20Soona e kuri tukpwei toying ocǝ azaa shili, araaka egau ka orengkaka to cara wai ne, araaka kangza, akǝri to lyǝ ka ne eze bekǝri ne. 21Araaka ocǝ o zene, sanamea lenyong leo zene kangza.

Masanto ma lepung

(Luk 11:34-36)

22“Liizi leya beru be masanto ma lepung, liizi leo leeya cammo, pate lepung leo yo pena ka masanto. 23A liizi leo leeta cammo ne, pate lepung leo yo dera masanto. Masanto ma lepung leo ma itǝ maring, maring yo dongdong gongha!

O eza lezara aa ateokora a leere

(Luk 16:13)

24“Ondo wa era wata eza lezara ateakoro leere ne, baya nyimi oyo nyana o yende o yeme o yende, koona o tare o yende o zeele o leere me. Ba era ota tare Ashili kaa emate awere yende ne.”

O werno a Ateokora

(Luk 12:22-31)

25Azaa nyimi eyang bele oying, tana e gare tukpwei toying azaa epaaka eya lyame, koona eya sa me, koona nangka eyo cǝ madibi ma o amba. Ebeene kala epaolya sang? Aa lepung kangza kala madibi sang? 26Laka na engmeng o zaa shili, neta eza o shebeka koona ne shende kane eke a bengga ne. Pate ka nyimi Ate ying o zaa shili lyeeze ka ne. Ying e kala ne edang sang? 27Mana a nyimi oying a kazo gara ukpwei wai wa era wa wale lemore le yende a nyimi tomore to wai2?

28“Na eyaka eya gara tukpwei toying azaa madibi ma o amba? Laka nangka eburu o wake e gongze, neta eza gole yende ne. 29Pate ka nyimi eyang belo oying na ogomo Suleimanu ka ocǝ wai wata wa amba madibi maa gong na ondo a nyimi one ne.3 30Nyimia Ashili eze mawake ma owake bejaga nanna, maaka maya arakana o ngmeengme, a leere a ese mai ka ola, shibari ying? Ying ana o dera o kabare kaa Ashili! 31Azaa nyimi tana e gare tukpwei toying a beyana, ‘Eya taya lya me?’ Koona ‘Eya teya sa me?’ Koona ‘Eya teya amba me?’ 32A worme ana o dera o rosa Ashili neya gare tukpwei tone azaa o gera nyimi. Kangza Ate aying o zaa shili a rose o bena eya yeme mapapa maana. 33Epa e woma o bora eya, e nya Ashili tukpwei toying, e eze epa e togomo te Ashili, ka o gera epa ee sangsang ai, ayo nya ying kaa pate ma mapapa maana kangza. 34Zaa nyimia tana e gare tukpwei toying azaa leere ne, leere yo deya ka ebelo gara le. Konang lengme ya ka ozitǝ ka waya kap ka le.