Tingoḏi'i 7

Ma Jou'ongu Madutu 'ai 'umata nga cala latu moi re // cala nyagi rata re cala rata

1Pasala i'a, ngoi to oḏi'i mala'ekata nga ḏuata 'aḏi made-de'oso toma tana'a ḇuḇuku rata, ananga 'aḏi sitogumu karawiana, la karawiana enanga 'i wusu awa bae toma tana'a ma re'u, bae toma ngoloto bolo toma ate-ate.1 2Ḏua, ngoi to oḏi'i mala'ekata ma lelegu 'o sapolo da'a kore mie ino, unanga 'o gasa segele ra Ma Jou'ongu Madutu ino, Unanga ga'a 'ahu-'ahu. Mala'ekata gena-ge 'o 'aro'o 'a siduga-duga mala'ekata nga ḏuata nange-ge ga'a sanga kuasa ḏua ra Ma Jou'ongu Madutu di'a sijira tana'a ma re'u re ngoloto, 3re 'o kanau, “Sijira awa tana'a ma re'u bolo ngoloto, bolo ate-ate singadolo ngomi mi pula'a nana'o segele toma ngowa'a manga memese, ananga gena-ge ga'a ta Ma Jou'ongu Madutu ma tero sa'olo 'Ai budaka-budaka, Unanga gena-ge ga'a nanga Jou'ongu Madutu.”23 4Ḏua ngoi, ngowa'a ri siajele mangale ngowa'a repe: nga cala latu moi re cala nyagi rata re rata (144,000), ananga gena-ge 'aḏi sanga nana'o segele tamanga memese ra Ma Jou'ongu Madutu ino re manga 'asala toma bangsa Israel suku nyagi moi re romoḏiḏi. 5Toma suku rimoi-rimoi 'age ngowa'a manga repe nga cala nyagi moi re romoḏiḏi ga'a sanga nana'o segele. Gena-ge toma suku: Yehuda, Ruben, Gad, 6Asyer, Naftali, Manasye, 7Simeon, Lewi, Isakhar, 8Zebulon, Yusuf re Benyamin.

Manusia manga repe ma tero sa'olo dongi toma ngoloto ma 'uḏu

9Pasala i'a, ngoi to oḏi'i ḏi'i, manusia manga repe ma tero sa'olo dongi toma ngoloto ma 'uḏu ga'a matengo i'a mai ua nga'unu 'a roimi. Ananga gena-ge manga 'asala toma bangsa mo-moini, nagara mo-moini, suku mo-moini, re demo mo-moini. Ananga gena-ge 'aḏi mapake juba buḏo-buḏo re tamanga giama 'aḏi gu-gu'u ate palem ma umanga re 'aḏi made-de'oso talaḏi ra Ma 'Olana 'ai ḏe-ḏegoro re Doba ma Ngowa ma biono. 10Ananga gena-ge 'aḏi kanau ya siduga-duga,

“Nanga salamata 'i sapolo tananga Jou'ongu Madutu ino,

ga'a 'O tegoro ra Ma 'Olana 'ai ḏe-ḏegoro re ra Doba ma Ngowa gena-ge!”

11'Age mala'ekata mo-moini ga'a 'aḏi made-de'oso sigoloḏi Ma 'Olana 'ai ḏe-ḏegoro, bi-biri'i--bi-biri'i re makhluk nga ḏuata ḏi'i. Ananga mo-moini gena-ge 'aḏi mapagara manga biono tala ra Ma 'Olana 'ai ḏe-ḏegoro ma biono re silamo'o re siḏubuso Ma Jou'ongu Madutu. 12Ananga 'aḏi kanau mamete'e:

“ 'Amin!

Ngene wo puji re silamo'o nanga Jou'ongu Madutu ga'a mulia re 'akala soro'unu.

Ngene wo sibere ie murasa ma la re wo silamo'o Unanga.

Unanga gena-ge 'o kuasa re de-de'e di'a kasingado-ngadolo i'a!

'Amin!”

13Matengo toma bi-biri'i--bi-biri'i gena-ge manga sigolona 'o sano ra ngoi, “Ngowa-ngowa'a nena-ne ga'a mapake juba buḏo, ananga nena-ne 'a guna re 'aḏi sapolo le'a ino?”

14Ngoi to sangoro, “Ngoi ta waro ua, Jou. Jou masiretene na waro.”

Ḏua unanga 'o kanau ra ngoi, “Ananga nena-ne raḏi palisi'i 'orasa sikisa ma lamo'o. Ananga manga juba reya 'uju reo Doba ma Ngowa ma ngaunu singadolo ri buḏo.4

15Sababu gena-ge, nange-ne ananga 'aḏi made-de'oso ra Ma Jou'ongu Madutu 'ai ḏe-ḏegoro ma biono,

re 'aḏi de-de'oso re 'aḏi silamo'o re siḏubuso Unanga gena-ge, lobi'i re wangere Tai wala.

Re Ma Jou'ongu Madutu ga'a 'o tegoro ra Ma 'Olana 'ai ḏe-ḏegoro, Unanga gena-ge ḏuanga i'a 'o tegoro mamete'e ra ananga re ya'u saolo.

16Ananga gena-ge 'aḏi basono sawini re camala dudungu riwara;

wangere ma la'o bolo ma sa-sau'u ya'u 'erese riwara,5

17Sababu Doba ma Ngowa gena-ge ga'a 'o tegoro sebanga ra Ma 'Olana 'ai ḏe-ḏegoro 'o dadi ananga manga sowohi.

Unanga ḏuanga i'a ya'u sigasa toma ḇanyo 'ahu ma utu'u.

Re Ma Jou'ongu Madutu 'a singi-ngiranga manga la'o ma 'ongoro mo-moini.”6