Tingoḏi'i 22

1Mala'ekata gena-ge 'o sijumu ra ngoi ḇanyo ma lese ga'a ma ḇanyo 'i pula'a 'ahu. Ḇanyo gena-ge 'i ciḏo-ciḏoto sa'olo kristal re 'i waloro re 'i 'uisi ra Ma Jou'ongu Madutu re ra Doba ma Ngowa manga ḏe-ḏegoro ino.1 2Re ḇanyo gena-ge 'i 'uisi toma limau gena-ge ma ngo'omo lamo'o ma golona. Toma ḇanyo ma 'uḏu kaci ḏiḏi 'i konyo ate2 ga'a 'i pula'a 'ahu, enanga gena-ge 'i sowo'o musungu rimoi soi nyagi moi romoḏiḏi: Ngara moi, soi moi. Ma so'a ngowa-ngowa'a mo-moini ya pake di'a manga sou'u, la si-la manga si-siḏi.3 3Toma limau gena-ge ma dara, 'ori i'a rimoi i'a mai ua nga'unu katula ra Ma Jou'ongu Madutu.

'Age Ma Jou'ongu Madutu re Doba ma Ngowa manga ḏe-ḏegoro toma limau gena-ge ma dara. Re 'Ai falalomu-falalomu 'aḏi de-de'oso Unanga,4 4re ya oḏi'i Unanga 'ai biono masiretene re 'Ai lomanga 'i silefo tamanga memese. 5Lobi'i re hafu-hafu 'i cua. Ananga 'aḏi paralu ua wangere ma la'o ma ciḏoto bolo lapuru malejanga ma tarangi sababu Ma Jou'ongu Madutu masiretene ḏuanga i'a 'o pula'a tarangi ra ananga. Re ananga ḏuanga i'a 'aḏi pareta sa'olo 'olana kasingado-ngadolo i'a.5

Yesus dadunu 'o sapolo moju

6Ḏua mala'ekata gena-ge 'o kanau ra ngoi, “Demo-demo gena-ge 'i banari re tantu ḏua 'i sitotomo. Ma Jou, Ma Jou'ongu Madutu ga'a 'o pula'a 'Ai Ngagara 'Ofi-'Ofi toma nabi-nabi, Unanga 'o 'utusu 'Ai mala'ekata di'a sijumu toma ngowa-ngowa'a ga'a ta Ma Jou'ongu Madutu ma tero sa'olo 'Ai budaka-budaka,6 'oru ga'a tantu ḏua ḏuanga i'a 'i dadi ti'ara riwara.” 7Yesus 'o kanau, “Tailako la-la ino! Ti'ara riwara Ngoi ḏuanga i'a to sapolo. Bara'utungu ngowa-ngowa'a ga'a 'aḏi mete'e nubuata ma demo-demo toma boku nena-ne!”

8Ngoi, Yohanes, mo-moini gena-ge to 'isene re ta oḏi'i. Pasala i'a, ngoi to mapagara 'ari biono tala toma mala'ekata gena-ge, ga'a ro sijumu mo-moini gena-ge, di'a to silamo'o re siḏubuso unanga. 9Mada'a unanga 'o kanau ra ngoi, “Ra ngoi awa. No silamo'o re siḏubuso ngoi awa! No silamo'o re siḏubuso Ma Jou'ongu Madutu! Sababu ngoi ḏi'i ta Unanga ma tero sa'olo 'Ai budaka7 ma tero ngana re ma tero 'ani ioronongoḏu ngo-ngaku rimoi ga'a nabi-nabi, re ngowa'a mo-moini ga'a mete'e demo-demo toma boku nena-ne.” 10Ḏua mala'ekata gena-ge 'o kanau ḏi'i ra ngoi, “Awa na sigogoro nubuata ma demo-demo toma boku ma dara nena-ne, sababu ma 'orasa ri co-cori ḏua wakutu mo-moini gena-ge ḏuanga i'a enanga 'i dadi. 11Ngowa'a ma jira, sieanga i'a 'aḏi 'a'a cira tau-taunu. Ngowa'a su-sudala, sieanga i'a 'aḏi madiga'a su-sudala tau-taunu. Ngowa'a ga'a 'aḏi 'a'a la-la re banari, sieanga i'a 'aḏi 'a'a la-la re banari tau-taunu. Re ngowa'a ga'a manga 'ahu 'ofi-'ofi, sieanga i'a 'aḏi maki-kiḏanga tau-taunu toma 'ori i'a ma jira.”8

12Yesus 'o kanau, “Tailako la-la ino! Ti'ara riwara Ngoi ḏuanga i'a to sapolo re To gasa ninga ngogele di'a Ta balasa 'oru ga'a ni 'a'a pasala ḏua.9 13Ngoi nena-ne 'Alfa re 'Omega,10 Ngoi nena-ne Ma Mulaingi re Ma Ḏo-ḏogumu. Ngoi nena-ne toma mulaingi singadolo ma ḏo-ḏogumu.”11

14Bara'utungu ngowa-ngowa'a ga'a ya 'uju manga juba singadolo 'i 'ofi, sababu ananga gena-ge sanga watasa di'a 'aḏi osama toma limau gena-ge ma dara mete'e ma ngalana-ngalana lamo'o re ḏi'i 'aḏi oromo ate 'ahu-'ahu ma sowo'o.12 15Mada'a ngowa-ngowa'a ga'a madiga'a 'ori i'a ma jira: Ananga ga'a 'aḏi 'a'a sarati, 'aḏi su-sudala, 'aḏi sisengene ngowa'a, 'aḏi silamo'o re siḏubuso jou'ongu ma somoara, ngowa'a sa-sakala, bae tamanga demo re ganau bolo tamanga de'oso re ḏegoro; ananga mo-moini gena-ge manga ngi'i toma limau ma ḏuḏunu.

16“Ngoi, Yesus, reto 'utusu 'Ari mala'ekata di'a 'a singadolo 'Ari habari nena-ne ra ngini, la jama'ata mo-moini nyengara 'aḏi dawongo habari nena-ne. Ngoi nena-ne 'Olana Daud 'ai ju'uda, Ngoi nena-ne mumuḏungu toma wangere ma la'o ino.”13

17Ma Ngagara 'Ofi-'Ofi re geri molo'ara we-were'a14 'aḏi kanau, “Ino!” 'A guna ḇato 'a 'isene 'Ari habari nena-ne, unanga ḏi'i 'o kanau, “Ino!” 'A guna ḇato 'a basono 'ai camala dudungu re 'o mau ka'e, unanga balasu 'o sapolo 'o ka'e ḇanyo 'ahu-'ahu gena-ge, kama ijana ua.15

Ma ḏo-ḏogumu

18Ngoi Yohanes to si'elingi ngowa'a mo-moini ga'a 'isene nubuata ma demo-demo toma boku nena-ne: Na'o 'a guna ḇato 'a dogo nubuata nena-ne, Ma Jou'ongu Madutu 'a dogo tai hukumu: unanga ḏuanga i'a sanga bahala-bahala ga'a 'i siajele ḏua toma boku nena-ne. 19Re na'o 'a guna ḇato 'a sikuranga nubuata nena-ne, Ma Jou'ongu Madutu ḏi'i 'a sikuranga unanga 'ai balangu toma ate 'ahu-'ahu ma sowo'o re toma limau 'ofi-'ofi gena-ge ga'a 'i siajele toma boku nena-ne.16

20Unanga, Yesus, ga'a singadolo habari nena-ne 'o kanau, “Mode'e, Ngoi ḏuanga i'a capati to sapolo!”

Re, ngoi, Yohanes 'o kanau ḏi'i: “ 'Amin! Sapolo ḇato, Ma Jou Yesus!”

21Ngoi to golo'o ra Ma Jou Yesus mangale 'Ai mura re dadalara sieanga i'a ua Ma Jou'ongu Madutu 'ai ngowa-ngowa'a mo-moini. 'Amin.