Tingoḏi'i 20

Mangale 'orasa ma di'ara musungu cala moi

1Gena-ge togumu i'a, ngoi to oḏi'i mala'ekata matengo 'o 'uci da'u soroga tala. Tai giama 'o gu'u-gu'u ngabanga maut ma da-damunu ma kuci, re 'o rate pako-pako ngai moi. 2Ḏua unanga 'o cako'o naga gena-ge ga'a 'o ngorana ma biri'i, ma lomanga 'Iblisi bolo Roh ma Jira ma 'Olana1 re sirate ma di'ara musungu cala moi.2 3Pasala i'a mala'ekata gena-ge 'a upa'a naga toma maut ma ngabanga ma dara, kara 'a kuci ngabanga ma da-damunu gena-ge re 'o segele, la naga gena-ge 'i sihaga bangsa-bangsa rawara ma di'ara musungu cala moi. Musungu cala moi ngadolo ḏua, kara sieanga naga gena-ge; mada'a pa'i ma di'ara ngomasa moi ḇato.

4Gena ḏua, ngoi to oḏi'i ngowa-ngowa'a manga nyawa-nyawa, ananga gena-ge ga'a manga camala ngowa'a ya tola'a ḏua, sababu 'aḏi singadolo habari mangale Yesus re 'aḏi mete'e Ma Jou'ongu Madutu 'ai demo. Re ḏi'i sababu ngowa-ngowa'a gena-ge 'aḏi oḏu'u silamo'o re siḏubuso haiwani re dulada haiwani. Ananga gena-ge ḏi'i 'aḏi sanga ua nana'o haiwani tamanga memese bolo tamanga giama. Dadi ananga dadunu 'aḏi 'ahu moju re 'aḏi tegoro toma ḏe-ḏegoro--ḏe-ḏegoro re 'aḏi parenta sa'olo 'olana mamete'e ra Kristus ma di'ara musungu cala moi3 5Gena-ge 'orasa ma mulaingi ga'a ngowa-ngowa'a sengene dadunu 'aḏi 'ahu moju. (Mada'a ngowa-ngowa'a sengene ma lelegu 'aḏi dadunu 'ahu ua toma musungu cala moi ma dara.) 6Ngowa-ngowa'a ga'a dadunu 'aḏi 'ahu moju toma 'orasa ma mulaingi gena-ge, ananga ngowa-ngowa'a 'ofi-'ofi re bara'utungu. Re ananga gena-ge ḏuanga i'a 'aḏi basono ua sengene ma soi ḏiḏi,4 mada'a 'aḏi dadi 'imam-'imam ga'a 'aḏi de-de'oso Ma Jou'ongu Madutu re 'a Kristus. Re ananga ḏuanga i'a 'aḏi parenta mamete'e ra Kristus ma di'ara musungu cala moi ma dara.

'Iblisi sanga hukumu

7Wakutu musungu cala moi enanga 'i pasala i'a, kara sisupu 'Iblisi toma ngabanga maut, 8re enanga ḏuanga i'a 'i tagi re 'i sihaga bangsa-bangsa toma dungia sitabi donga. Bangsa-bangsa gena-ge si'aro'o ma lomanga Gog re Magog. 'Iblisi 'i lomu bangsa-bangsa gena-ge toma ngi'i di'a parangi. Ngowa'a gena-ge manga repe madutu sa'olo dongi toma ngoloto ma 'uḏu.5 9Dadi ananga toma dungia sitabi donga 'aḏi sapolo sigoloḏi Ma Jou'ongu Madutu 'ai 'umata manga limau, ga'a Unanga 'a dadalara. Mada'a u'u 'i 'uci da'u diwanga tala ya'u singi-ngiranga ananga gena-ge manga repe madutu. 10Gena ḏua, 'Iblisi ga'a sihaga bangsa-bangsa gena-ge, 'i sanga upa'a toma ngoloto u'u ma walira 'i leja-lejanga. Ngi'i gena-ge nyangu moju, siupa'a haiwani ma mulaingi re nabi sa-sakala. Ananga fara ro'ange ḏuanga i'a 'aḏi sanga sikisa lobi'i re wangere kasingado-ngadolo i'a.6

Hukumu ma ḏo-ḏogumu

11Gena ḏua, ngoi to oḏi'i ḏe-ḏegoro lamo'o bu-buḏo rimoi re Ma Jou'ongu Madutu 'o maḏegoro toma ḏe-ḏegoro gena-ge ma re'u. Diwanga re dungia 'i iranga ra Unanga 'ai biono, singadolo kama oḏi'i riwara. 12Re ngoi to oḏi'i ngowa'a senge-sengene: ngowa'a ma pake ua re ngowa'a la-lamo'o 'aḏi made-de'oso toma ḏe-ḏegoro gena-ge ma biono. Ḏua boku-boku 'i welanga, kara singe-ngeta'a hukumu toma ngowa'a senge-sengene site-tero mete'e ananga manga ga'a 'i silefo toma boku-boku gena-ge ma dara. Re ḏi'i boku rimoi ma lelegu 'i welanga. Re boku gena-ge 'i si'aro'o ngowa'a 'ahu-'ahu manga boku.7 13Re ngowa'a senge-sengene toma ngoloto re toma Maut re Maut ma pareta, ananga 'aḏi sipula'a ra Ma Jou'ongu Madutu. Unanga 'a singe-ngeta'a hukumu toma ngowa'a senge-sengene gena-ge site-tero mete'e ananga manga ga'a ḏi'i. 14Gena ḏua, Maut re Maut ma pareta 'i siupa'a toma ngoloto u'u ma dara. (Ngoloto u'u gena-ge ma ngale: sengene ma soi ḏiḏi.) 15Ngowa'a mo-moini ga'a manga lomanga 'i silefo ua toma ngowa'a 'ahu-'ahu manga boku, ananga gena-ge 'aḏi siupa'a toma ngoloto u'u ma dara.