1 Timotius 3

Jama'ata ma bi-biri'i

1'Oru ga'a ngoi to kanau nena-ne mode-mode'e: “Na'o matengo i'a, 'o nyafusu dadi jama'ata ma bi-biri'i, unanga 'o nyafusu munara ma la-la.” 2Sababu gena-ge, matengo i'a 'o dadi jama'ata ma bi-biri'i, unanga gena-ge balasu 'ai de'oso re ḏegoro kama rapu ua, 'ai were'a pa'i matengo ḇato,1 nga'unu 'o manahana 'ai nyafusu ma jira, 'ai 'akala re sinyingara soro'unu singadolo ngowa'a ya'u silamo'o, 'o nyanyaḏi dawongo ngowa'a ga'a 'aḏi tuḏu tai wala re nga'unu 'o doto'o ngowa'a.2 3Unanga 'o ka'e 'anggur 'i pai'i yoḏu'u re 'o nyanyaḏi ua ma'u tutu'u. Siḏibo ḏi'i, pake 'akala re sinyingara mereoso ra guna ḇato, re nyanyaḏi 'ahu toma dame, re pipisi ma budaka ua. 4Unanga balasu nga'unu 'a si'aturu 'ai ngitu re ngale la-la, re 'o doto'o 'ai ngowa'a, la ananga 'aḏi 'isene re 'aḏi silamo'o unanga. 5Sababu na'o 'ai ngitu re ngale masiretene 'a si'aturu nga'unu ua, tantu ḇato 'a si'aturu jama'ata nga'unu ua ḏi'i! 6Na'o unanga aro dadi ngowa'a ngaku Yesus, awa ngana no cumutu unanga di'a 'o dadi jama'ata ma bi-biri'i, sababu ḏuanga i'a 'o dadi momole. Ḏua Ma Jou'ongu Madutu ḏuanga i'a 'o hukumu unanga gena-ge ma tero sa'olo 'Iblisi sanga hukumu ḏua 'ua re 'au wali. 7Unanga balasu 'ai lomanga camari awa toma ngowa'a repe. Sababu na'o so'o gena ua, ngowa'a 'aḏi sipake-pake ua unanga singadolo 'o eta'a toma 'Iblisi ma kuasa.

Jama'ata ma ri-riono

8Jama'ata ma ri-riono balasu na-nau'u la-la ga'a ngowa'a lelegu ya'u silamo'o, manga 'akala re sinyingara 'i boloto, pipisi ma falalomu ua, re ka'e 'anggur lamo'o ua. 9Ananga balasu remanga 'akala re sinyingara ma kanau 'i 'ofi-'ofi 'aḏi macako'o namo-namoto do-doto'o banari ra Ma Jou'ongu Madutu ga'a 'O pula'a pasala ḏua. 10Ananga balasu na'u disa waro siḏa mangale mode-mode'e manga de'oso re ḏegoro kama rapu ua, kara nyengara 'aḏi dadi jama'ata ma ri-riono. 11We-were'a--we-were'a ga'a riono ngowa-ngowa'a toma jama'ata3 ananga ḏi'i balasu manga de'oso re ḏegoro lai rousu re awa 'aḏi dowa-dowanga demo. Ananga balasu 'aḏi mete'e awa manga 'akala ma mau mada'a 'aḏi mete'e Ma Jou'ongu Madutu 'ai 'akala ma mau ḇato, re manga 'ahu 'i loasa re banari. 12Jama'ata ma ri-riono balasu 'ai were'a pa'i matengo ḇato.4 Re unanga balasu 'a si'aturu la-la 'ai ngitu re ngale. 13Jama'ata ma ri-riono ga'a 'aḏi munara lai rousu toma jama'ata, ngowa'a ya'u silamo'o. Sababu gena-ge, jama'ata ma ri-riono gena-ge kamanga mojongo ua na'o 'aḏi siajele mangale ngo-ngaku ra Kristus Yesus.

Nanga 'agama ma rahasia

14Ngoi to nganono ḏa ti'ara riwara ngoi to ma'u sanga ra ngana. Kalaha so'o gena, ngoi to lefo tari surata ne. 15Dadi na'o rema 'ori i'a i'a 'i dola'aku ngoi, na sahe ma duhu sa'olo ngene wo 'ahu marimoi sa'olo Ma Jou'ongu Madutu 'ai ngowa-ngowa'a ga'a ngaku Kristus Yesus re wo marimoi ra Ma Jou'ongu Madutu ga'a 'o 'ahu kasingado-ngadolo i'a. Ngowa-ngowa'a ngaku Yesus balasu marimoi kadiarata 'o do-doto'o banari sababu do-doto'o gena-ge ma tero sa'olo wala ma bangini re ma ngasu'u lamo'o, la wala gena-ge 'i te'oso lai te'e. 16Matengo i'a mai ua 'aḏi soloto mangale nanga 'agama ma do-doto'o 'i banari re 'i ti-tiai. 'Au wali, ma do-doto'o gena-ge mangale Kristus Yesus 'i sirahasia, sababu Ma Jou'ongu Madutu 'o masijumu nyangu. Mada'a nange-ne Unanga 'o masijumu ḏua ra ngene, dadi ngene wo ngaku nena-ne:

Ma Jou'ongu Madutu 'ai Ngowa'a Nau'u matengo 'O matuhu sa'olo manusia,

Ma Ngagara 'Ofi-'Ofi 'i siajele Unanga gena-ge Ma Jou'ongu Madutu 'ai Ngowa'a Nau'u,

Unanga 'o masijumu toma mala'ekata,

'Ai lomanga sihabari toma bangsa mo-moini,

Ngowa'a toma bangsa mo-moini toma dungia 'aḏi ngaku Unanga

sibere re sijingi'i toma soroga.