1 Timotius

Paulus 'ai Surata ma Mulaingi

ra Timotius

Demo ma mulaingi

Paulus 'o lefo surata nena-ne di'a Timotius, ngowa'a tubaie matengo, mada'a musungu muḏuo i'a ḏua, Timotius mamete'e ra Paulus toma ḏo-ḏagi ma dara di'a singadolo Habari Roanga (Som. 16:3, 17:14-15, 18:5, 19:22, 20:1-6). Wakutu Paulus lefo surata nena-ne, 'a Timotius toma limau Efesus, re unanga toma daeraha Makedonia. Paulus 'o masibasono tala ḏa unanga jau-jau nyangu sapolo toma limau Efesus. Sababu gena-ge, unanga 'a lefo siḏa surata nena-ne ra Timotius (3:14-15). Tai surata ma dara nena-ne, unanga soma'a Timotius, la munara cufala ra Ma Jou'ongu Madutu toma limau Efesus (1:3, 18). Re Paulus 'o soma'a unanga di'a lawana ngowa'a gasa do-doto'o sa-sakala ga'a ma'u rapu reo Habari Roanga (1:3-11, 4:1-6). Toma do-doto'o gena-ge ananga pa'i ya terongo ma demo-demo ra Musa 'ai hukumu, mada'a ananga masiretene ya si'a'a ua (1:7-8). Mete'e do-doto'o gena-ge ngene nyengara sanga salamata na'o wa siḏagi 'a Musa hukumu ma 'atoranga, sa'olo: molo'ara awa, oromo awa ngo-ngoromo ga'a 'i wosono (4:1-5). Dadi Paulus soma'a Timotius balasu 'a lawana do-doto'o gena-ge.

Gena ḏua, Paulus balasu sidoto'o 'a Timotius di'a 'urusu munara ra Ma Jou'ongu Madutu, sa'olo so'o ne: biasa ga'a wo manyiata (2:1-16), ngowa'a ga'a 'aḏi dadi jama'ata ma bi-biri'i re ngowa'a 'aḏi dadi ri-riono ra Ma Jou'ongu Madutu 'ai munara, balasu manga de'oso re ḏegoro 'i patasa (3:1-13) re sioḏi'i we-were'a balo ga'a ngowa'a ma dinga'unu ua (5:3-16). Siḏo-ḏogumu Paulus 'o pula'a duga re domolo ra Timotius, la 'ai de'oso re ḏegoro 'i mete'e do-doto'o banari (6:2b-21).

Ma dara:

1. Demo ma mulaingi (1:1-2)

2. Paulus 'o soma'a Timotius, la 'o lawana ngowa'a 'aḏi gasa do-doto'o sa-sakala. (1:3-20)

3. Paulus si'elingi ngowa'a ngaku Yesus manga de'oso re ḏegoro ga'a 'i patasa. (2:1-3:16)

4. Paulus 'o soma'a Timotius, 'o lawana do-doto'o sa-sakala. (4:1-16).

5. Paulus 'o doto'o, la Timotius 'o 'urusu ngowa'a ngaku Yesus. (5:1-6:2a)

6. Paulus 'o pula'a duga re domolo, la Timotius 'ai de'oso re ḏegoro 'i mete'e do-doto'o banari. (6:2b-21a).

7. Tabea ma ḏo-ḏogumu. (6:21b).