Ɓi Rom 10

1Ɓaah ciŋ ngo kosiɗ ci, ini ŋ waaɗiɗ cuuɓiŋ Israayel ŋ keeñiŋ ngo na ini mi na kiimɗee ɓa Kooh, weɗ ne ɓa muc. 2Mi yii seede'iɗ ɓa ne ɓa sawriɗ lool ŋ pangkiɗ Kooh, waaye wa hunɗi na ki'inah. 3Ñak inah kiyurhi puloh ŋ Kooh, na waaɗ tufkiɗoot kiyurhiŋ ɓa haf ɓa, weɗ tah po ɓa teyɗukɗi kiyurhi puloh ŋ Kooh.

4Waasiŋ Musaa mitoh ŋ Kiristaani. Ineem weɗ tah yaa nu kos ɗah raak kiyurah.

Yaa nu kos ɗah hey mucɗasse

5Musaa fiisiɗ ŋ ini kaɗ ŋ kiyurhi puloh ŋ nakoh ci ne : « Yaa nu taambiɗ in cii ɗah, ceɗ a pesohan.1 » 6Waaye ɓooɓi onu kiyurah taamboh ŋ kosi ɓa kos woo in wiiriis, an : « Kina woo ŋ ɗooƴ fu ne : Ya ɓa rapan ŋ Asamaan ? » Woo keem waaɗ woo ne : Ya ɓa rapan ne a ruhsiɗ Kiristaani. 7Ɓa nam woo ne : « Kina woo ŋ ɗooƴ fu ne : Ya ɓa ruhsan ŋ nunga topaaɗiina ? » Woo keem waaɗ woo ne : Ya ɓa ruhsan ne a puliɗ Kiristaani ŋ kaaniɗ ca. 8Kon ɓooɓeem woo inii : « Woo ki weɗi ŋ seroofu, weɗi ŋ nguɓiŋ ɗa, weɗi ŋ ɗooƴ keeñiŋ ɗa. » - Woo keem weɗ woo ki ŋ ini kaɗ ŋ kosi, wi ɓoo na yegɗohe2.

9Laam fu woo na nguɓiŋ ɗa ŋ fiki ɓooɓi ne Yeesu a yi Heɗi, te fu kos ŋ keeñiŋ ɗa ne Kooh hultiɗiɗ ɗe ɗah, fu hey mucɗasse. 10Keeñ weɗ na kose, wa tum ɗa ɓo' yurhiɗ, te nguɓ weɗ na woye, wa ɓay ɗa ŋ muc. 11Fiis ci ceɗ woo ne : « Yaa nu taɓah kosiŋ ɗa nga ɗe ɗah, fu kaci'anɗi.3 »

Wa ye hondoh Yawuut ci kos Kiristaani ?

12Ɓooɓi jen ɓeɗ hend ŋ fiki Kooh, wa Yawuut haa, wa nikaaɗi Yawuut haa, ɓa jen ɓeɗ ɓaah Heɗ, te Heɗ ɓa, yaa nu ɓeeɗuk ɗe ne a naaf ɗa ɗah, a baahoh ɗa ŋ raak-raakiŋ ɗe. 13Laam wa fiisuuɗ ne : « Yaa nu ɓeeɗuk Heɗi ɗah, a hey mucɗasse.4 »

14Waaye ɓa ɓeeɗkohee ɗah, raakee ɓa kosiɗ haa e ? Te ɓa kos ɗah, raakee ɓa kerhiɗ yegɗohiŋ Yi ɓa kos. Te ɓa kerah yegɗoh ɗah, raakee a ɓo' woo ɓa wa. 15Te ɓo' woo ɓa wa ɗah, raakee ɗe woosu woosu. Findi Fiis ci woyoha an : « Cey, kot ci ɓa tiind moɗiɗ, ɓi hay na yegɗoh neɓiɗ !5 »

16Waaye ɓi kerah yegɗoheem, e ɓeɗ jen na tume ini wa woo haa, findi woosuuɗi Esayi woyohee wa ne : « Heɗi, yaa kos yegɗohiŋ ɓoo ?6 » 17Kon, kos na pulohe ŋ ini kerhu, te ini kerhu na pulohe ŋ yegɗohi kaɗ ŋ Kiristaani. 18Waaye mi na meeksohe : Ɓi Israayel kerahɗi kerahɗi e ? Aha'kay ! Fiis ci woyiɗ ne :

« Hoosoociŋ ɓa kerhuuɗ ŋ kehƴi jen,

woo ciŋ ɓa kaɗiɗ po ŋ ɗisik ca uup us ŋ Adina !7 »

19Waaye mi na meeksohe : Ɓa inahɗi inahɗi ini woyu e ? Aha'kay ! Ŋ ineem, Musaa, a yi koc woo ne Kooh woo an :

« Ŋ hey ɗu tahe siis ɓi nikɗi cuuɓ ;

ŋ tah ɗu ayruk cuuɓ ñaañaaɗi.8 »

20Woosuuɗi Esayi kaannja po a woosa ini Kooh woo, an :

« Ɓi waakeeɗi so, mirndohiɗ to hot,

ɓi meeksohɗi so, mirndohha so inah.9 »

21Waaye ini kaɗ ŋ Israayel, a woo ne :

« Ŋ hooɓuk raɗis yaah ne ŋ morgiɗuk

ɓi kerhiɗɗi so, ɓi na taasee so.10 »