1 Korenta 5

Baahaaɗiiki nik ŋ Janguuni

1Wa ɗii kerhu ŋ ɗisik nu nik ne mbalay raakiɗ nga ɗu, in sepƴiɗ keeh-keeh po kosaaɗiici sah tumanɗi in mand ɗaa. Wa ɗii woyu ne raakiɗ yi nik nga ɗu a tum ɓiti baabiŋ ɗe ɓitiice ! 2Te ɗu ris yaksiɗuk ! Ɗu joy joy miskiɗuk te ɗu puliɗ ɓoyi tum moɗaaɗiineem ŋ ɗooƴ ɗu.

3Ini kaɗ nga so, ali nik ne ŋ nikɗi ndeem sah, mi yii ŋ serooɗu ngaŋ liiɓ po haa mi yii na ɗu, ŋ ineem, ŋ atte'iɗ ƴaareem po ƴutiɗ. 4Ɗu nangɗukoh ŋ tiikiŋ Heɗ ɓoo Yeesu ɗah, ŋ hey nike na ɗu ngaŋ liiɓ te hatiliŋ Yeesu hey nike na ɓoo, 5ɓoo aañ ƴaareem, faɗ ɗe na Seytaani. Pesohaaɗiŋ ɗe weem yahrukoh, ruuhiŋ ɗe min mucɗu ŋ mbehaŋ Heɗi.

6Raakɗi ini ɗu joy ndamkoh ! Ɗu inhiɗ woo kii an : « Lawiir ƴissuut na guufɗe muni jen. » 7-8Kon ɓookkaat po lawiiri kiisɗeem hool nga ɗu, ɗu min mand na muni asi siiɓu. Ɓoo joyeen min feetuk feetiŋ Paak ! Kiristaani a yi Mbaaliŋ Paakiŋ ɓoo te a hoosuuɗ po ƴutiɗ, ɓoo nikka mbuuruuci raakaaɗi lawiir ci. Kon ɓoo feetkaat, waaye ɓoo kinaat feetkoh mbuuru haɓɗohuuɗ lawiir kiisiɗ, weɗ ne fu baahaaɗi na añaand ; ɓoo feetkohaat mbuuru raakaaɗi lawiir weɗ ne ɓoo pesee ŋ keeh na keeñ hooliɗ.

9Ŋ fiisi ŋ kaɓɗohee ɗu, ŋ woyeen ɗu ne kinaat ambsukoh na mbalayoh ci. 10Wa nikɗi haa ne ŋ woyee mbalayoh ci nik ŋ Adina, wala waaɗiɗ kopor ci wala rokoh ci, wala ɓi na ñaamke kooh ci nikaaɗiici. Kon mbaa ɗu heen pule ŋ Adina ! 11Ŋ waaɗee ɗu woo ne kinaat ambsukoh na yi na woye ne a kosiɗ te a na faankohe faankoh sangohuuɗ, wala a waaɗ kopor lool, wala a ñaamkee kooh ci nikaaɗiici, wala a yahee tiik ɓo', wala a laaree wala a roke. Ɗu joyɗi sah ɓaah kañam na ɓo' mand ɗaa.

12-13Ɓoyi ɓaahɗi ŋ Janguuni, waas so nikɗi nga ɗe, e Kooh na hee ɓa atte'e. Waaye ɗu, andi ɗu joyɗi atte ɓi ɓaah nga ɗu ? Wa fiisuuɗ ne : « Aañaat baahaaɗiini nik ŋ harmban ɗu.1 »