1 Korenta 14

Jomb ŋ peɗeem na woyiɗ Kooh

1Kon, hiiraat keeñ ciŋ ɗu ŋ waaɗ morom ɗu, te ŋ ini kaɗ ŋ onoh ciŋ Fuuɗsi Hoolohngaani, sawraat ca raak, uupaat nga waak ne Kooh woyee taamboh nga ɗu. 2Yi na jombe ŋ peɗmi Fuuɗsi on ɗe, a wooɗi na ɓooɓi, waaye a na woye na Kooh, ali ɓo' inahɗi in ci a na woye. A na woye in ci ɗasɗukiɗ ci Fuuɗsi Hoolohngaani eɗ ɗe ne a woo ca. 3Waaye yi na woye ini Kooh woos ɗe, a na woye na ɓooɓi ne a ɓaatɗoh ɓa ɓa kaɗ fiki, a ñaahee ɓa, a dalɗee hel ci.

4Yi na jombe ŋ peɗeem, a na ɓaatɗohe haf ce ne a kaɗ fiki ; yi na woye ini Kooh woos ɗe, a na ɓaatɗohe ɓooɓiŋ Janguuni jen. 5Ŋ waaɗeen ne ɗu jen ɗu jombee ŋ peɗeem, waaye ini ŋ uup waaɗ weɗ ne Kooh woyee taamboh nga ɗu. Kooh woyee taamboh nga ɗu ɗah, weɗ uup raak njiriñ jomb ŋ peɗeem, hanaa ɓoyi na jombe ŋ peɗeem toksee in ci a na woye ne ɓi Janguuni min kaɗ fiki.

6Ɗiski wa nik ndii, ɓaah ciŋ ngo, ŋ hayeen nga ɗu ŋ jombee ŋ peɗeem ɗah, ŋ hee ɗu raakɗe winde njiriñ ? Ali njiriñ ne ŋ komɗi ɗu keeh ki Kooh teeɓoh, wala woo ci onan ɗu ki'inah wala woo ci a na woye taamboh nga so wala woo ci jangɗan ɗu ɗah.

7Ɓayaat misaal ŋ in ci na tipse findi mbiiɓ wala koora : Waa nu tipuuɗi ñiiniɗ nga ɗah, ɓo' inhisohanɗi ini mbiiɓi na mbiiɓe wala ini riitiini na riiti'e. 8Te kuluɓ namɗi kuluɓ kulɓi min inhisu ɗah, e ɓi nde kooɗkan ne kaɗ hiñoha ? 9Wa mand ɗaa nga ɗu, ɗu jombee na peɗeem ciŋ ɗu, te ini ɗu na woye minɗi inhu ɗah, ɓooɓi inhohan ini ɗu na woye na ? Ɗu woyan ŋ puuɗsi !

10Ini peɗeem ci na laaye ŋ Adina jen, waa nu nga ɗah raakiɗ ini wa na woye. 11Ŋ inahɗi peɗmiŋ ɓoyi na woye na so ɗah, mi na nike hanhe nga ɗe, te a na name nik hanhe nga so. 12Ɗu nak, nik ne ɗu sawriɗ ngaŋ raak onoh ciŋ Fuuɗsi Hoolohngaani ɗah, waakaat ne ɗu ɓaah ŋ ɓi uupan kaɗiɗ Janguuni fiki. 13Ineem weɗ tah, ɓo' nu na jombe ŋ peɗeem ɗah, a joy joy kiim Kooh, Kooh on ɗe a min tokis ini a na woye.

14Ŋ kiimee Kooh ŋ peɗeem ɗah, a ini Kooh tum nga so dong na kiime, waaye liiɓiŋ ngo na ɓaaheeɗi nga. 15Moo ŋ tuman na ? Ŋ kiiman na ini Kooh tum nga so, ŋ nam kiim na liiɓiŋ ngo ; ŋ hey ƴeeke Kooh na ini a tum nga so, ŋ nam ɗe ƴeek na liiɓiŋ ngo. 16Nik ne fu na corkiɗohe Kooh taamboh ŋ ini a tum nga ɗa dong, te liiɓiŋ ɗa ɓaahɗi nga ɗah, hanheeri nik na ɗu woyohan "Amiin" na, ŋ ini fu woo ŋ kiimiŋ ɗa fu na corkiɗohe Kooh ? A inahɗi ini fu na woye ! 17Wa keeh ne fu na corkiɗe Kooh na ɓi woo moɗiɗ, waaye wa kaɗiɗɗi fiki ɓoyi na sikɗukee ɗa.

18Mi yii corkiɗ Kooh ŋ ini mi na uupee ɗu jen jomb ŋ peɗeem. 19Waaye, ŋ Jangu, ŋ woo woo yatuus inhuuɗ, ca jangiɗ ɓinooɓi, weɗ ngisohiɗ to ŋ jomb ɓi junni junni woo ŋ peɗeem.

20Ɓaah ciŋ ngo kosiɗ ci, kinaat nik komaaki ŋ findi ɗu na liiɓohe ; ŋ ini kaɗ ŋ baahaaɗi, tumaat findi komaaki, waaye ɗu liiɓee ɗah, liiɓaat findi yakak. 21Wa fiisuuɗ ne Heɗi woo ne :

« Ŋ woyohan na cuuɓiŋ ngo

ŋ peɗmi ɓa inahɗi

ŋ taambɗohana nguɓ hanhe !

Tahanɗi sah,

po ɓa sikɗuk ko !1 »

22Kon, ɓo' jombee ŋ peɗeem ɗah, wa na teeɓe kosaaɗiici ne ɓa ɓaahɗi ŋ Janguuni, wa teeɓɗi kosiɗ ci ne ɓa ɓaah nga. Kooh woyee taamboh ŋ ɓo' ɗah, wa na teeɓe kosiɗ ci ne ɓa ɓaah nga, waaye, wa teeɓɗi kosaaɗiici ne ɓa ɓaahɗi nga. 23Ɓi Janguuni jen coheen, ɓa jen ɓa jombee ŋ peɗeem, hend wa raak ɓi hanhe wala ɓi kosaaɗi aasee ɗah, ɓa woyanɗi ne ɗu dof dof e ?

24Waaye Kooh woyee taamboh ŋ ɓooɓi jen, hend wa raak kosaaɗi wala hanhe aasee ɗah, ini a na kerhe jen hey ɗe teeɓe ne a bakaaɗoh, te wa attee ɗe. 25In ci ɗasɗuk ŋ ɗooƴ keeñiŋ ɗe jaar ca ñiin, a ƴek, a yip puki ŋ kehƴi. A ñaamuk Kooh te a teyɗuk ne wa keeh ne Kooh yii ŋ harmban ɗu !

Findi ɓooɓi joy tumoh ne ɓa coh ŋ Janguuni ɗah

26Kon, ɓaah ciŋ ngo, ɓoo joy na tum ? Ɗu coh ɗah, yaa nu nga raakiɗ ini a min tum. Yii na ƴeeke wuu Kooh, yii na jangɗohe, yii na yegɗohe ini Kooh inhiɗ ɗe, yum na jombe ŋ peɗeem, yum na toksee wa. In ceem jen joyiɗ tumu ne ca kaɗiɗ ɓi Janguuni fiki.

27Ɓo' waaɗ jomb ŋ peɗeem ɗah, ɓa kinaat uup kanak, laay po laay kaahay, waaye ɓa woyaat yino yino te ɓo' toksiɗee ɓa. 28Nik ne toksoh raakɗi ɗah, ɓa kinaat woo ŋ fiki ɓooɓi, ɓa woyaat na Kooh ŋ ɗooƴ ɓa.

29Ini kaɗ ŋ ɓi na woye woo ci puloh ŋ Kooh, ɓa kinaat uup kanak po kaahay, te ɓi tas markissee andi wa ɗaa wala wa ɗaa haa. 30Waaye Kooh teeɓ ɓo' wiiriis ŋ ɓooɓi nik ŋ ndeem, ini a min yegɗoh ɗah, yi na woye ɗekaat. 31Ee, ɗu jen, ɗu miniɗ woo woo ci puloh ŋ Kooh, waaye woyaat yino yino. Ŋ ineem ɓooɓi jen hey jange in nga te ɓa hey ndengɗuke nga. 32Ɓi na woye woo ci puloh ŋ Kooh, ɓa yilfaat ini Kooh on ɓa. 33Laam Kooh, a Kooh palañ palañ haa, a Kooh jam.

Ɗu joy tum findi wa na tumohse ŋ Janguuciŋ ɓooɓiŋ Kooh jen, 34ɓooɓi coh ɗah, ɓitiɓ ci ɗekaat. Ɓa joyɗi woo2, ɓa joy taamb ŋ ini ɓa woyu, findi waasiŋ Musaa woyoha. 35Ɓa waaɗ teeɓu in ɗah, ɓa meeksaat ƴaar ciŋ ɓa ŋ kahna. Wa moɗɗi ngaŋ ɓitiɓ, a laayee jomb ŋ coh.

36Ɗu liiɓ ne woo kiŋ Kooh puloh nga ɗu e ? Wala ɗu liiɓ ne e ɗu dong rahasa ?

37Ɓo' nu amb ne Kooh na woye taamboh nga ɗe wala a yi na Fuuɗsi Hoolohngaani ɗah, a joyiɗ teyɗuk ne ini mi na woyee ɗu, wa nakohiŋ Heɗi. 38Te ɓo' nu teyɗukɗi ineem ɗah, a namanɗi teyɗuku.

39Kon, ɓaah ciŋ ngo, waaɗaat ne Kooh woyee taamboh nga ɗu, sawraat nga, te kinaat hondoh ɓo' jomb ŋ peɗeem. 40Waaye in nu ɗu na haɓɗe ɗah, wa deggaat ŋ waas, wa raakuu palañsukoh.