1 Korenta 13

E waaɗ-waaɗ uup in ci jen

1Ali ŋ jombee peɗeem ciŋ ɓo' ci,

na ciŋ malaakaaci,

te ŋ waaɗɗi morom mbo ɗah,

ŋ mand na joolooliini na laɓse dong

wala bargi na tipse.

2Ali Kooh woyee taamboh nga so,

ali ŋ inah in ci ɗasɗukiɗ ci

na inhaah ci jen,

ali kosiŋ ngo kaɗ po ŋ yongsee tango sah

te ŋ waaɗɗi morom mbo,

ŋ tus haa.

3Ali ŋ paysoh raak-raakiŋ ngo jen,

ŋ eɗoha kañam wuu ñakiɗ ci,

ŋ nam eɗoh faaniŋ ngo ne wa dohu1,

te ŋ waaɗɗi morom mbo ɗah,

wa raakiɗɗi so ali njiriñ.

4Ɓoyi na tume sagu waaɗ-waaɗ,

a na muñe muñ,

a na raake keeñ moɗiɗ,

a na siisoheeɗi,

a na tipkeeɗi,

a na yaksiɗkeeɗi.

5A na tumeeɗi in supkiɗohiɗ,

a na waakeeɗi ini njirñan haf ce,

a na yooɓeeɗi ayruk,

a na ɗaakeeɗi aay-keeñ.

6A na sumeeɗi ŋ ini lahɗi waas,

waaye a na sume ŋ ini nik keeh.

7Ɓoyi na tume sagu waaɗ-waaɗ,

a na degge in nu nik,

a raak ooluk ŋ in nu nik,

a gen yaakaar in nu nik,

a teyɗuk gaduk in nu nik.

8Waaɗ-waaɗ na sooƴeeɗi muk.

Mbeh hey haye

Kooh woyissanɗi taamboh ŋ ɓo',

jomb peɗmi fu inahɗi reehɗu,

ki'inah reehɗu.

9Laam ki'inhiŋ ɓoo tasiɗ

te findi ɓoo na woyohe woo ci puloh ŋ Kooh, tasiɗ ;

10waaye ini mitiɗi hay ɗah,

ini tas mit reehɗu.

11Wa ŋ nikoh komaaki,

ŋ woyee findi komaaki,

ŋ hotee findi komaaki,

ŋ liiɓee findi komaaki ;

wi ŋ nik yakak,

ŋ faɗta in komaaki.

12Woti-woti

ɓoo hotɗi jahran,

ɓoo na hote

findi ɓoyi na marke ŋ seetu,

waaye kim,

ɓoo hotan jahran.

Woti-woti

ki'inhiŋ ngo tasiɗ,

waaye kim,

ŋ hey inhe inah mitiɗ,

findi Kooh inhoh ho.

13Kon,

in ci kaahay cii genan gen :

Kos, yaakaar, na waaɗ-waaɗ,

waaye wi uup yak nga ca, e waaɗ-waaɗ.