Zaburi 99

1Uhoraho araganje,

amahanga yose nahinde agashitsi;

avyagiye hagati y’abakerubi,

isi nihinde agashitsi.

2Uhoraho arahambaye ari i Siyoni;

ashizwe hejuru y’amahanga yose.

3Nibahimbaze izina ryawe rihambaye kandi riteye ubwoba;

uri uwera.

4Umwami ni umunyenkomezi, akunda imanza zibereye;

washinze ubutungane;

mu ba Yakobo wakoze

ibigororotse kandi bitunganye.

5Nimushire hejuru Uhoraho Imana yacu

mumwunamire ku ndava y’ibirenge vyiwe;

ni uwera.

6Mose na Aroni bari mu baherezi biwe,

Samweli yari mu bambaza izina ryiwe;

bambaje izina ry’Uhoraho

na we arabishura.

7Yavuganye na bo ari mu nkingi y’igicu;

bitondeye ivyo yihanikirije n’amategeko yiwe yabashingiye.

8Uhoraho Mana yacu,

warabishuye;

ku Bisirayeli wabaye Imana iharira ivyaha,

naho wabahaniye ibibi bakoze.

9Nimushire hejuru Imana yacu

musengere ku musozi wiwe wera,

kuko Uhoraho Imana yacu ari uwera.