Zaburi 76

Yahawe umukuru w’abaririmvyi. Bavugira inanga. Ni Zaburi ya Asafu. Ni indirimbo.

1Imana yamamaye i Buyuda;

muri Isirayeli izina ryiwe rirahambaye.

2Ihema ryiwe riri i Salemu,

Siyoni ni ho aba.

3Aho ni ho yavunaguriye imyampi yaka umuriro,

inkinzo n’inkota, hamwe n’ibigwanisho vy’intambara.

4Urakayangana,

uri n’ubwiza kurusha imisozi y’abaguteye.

5Abahizi baryamye hasi bafashwe mpiri,

basinziriye ubutikoma;

nta n’umwe mu bagwanyi

akivyura n’umutwe.

6Kubera ijwi ryo gukankama kwawe, ewe Mana ya Yakobo,

ifarasi n’umukogote birambaraye hasi.

7Ni wewe wenyene ukwiye kwubahwa.

Ni nde yoguhagarara imbere waratse?

8Waciye amateka yawe uri mw’ijuru,

isi iratinya iratekereza;

9igihe wahaguruka ngo uce imanza, ewe Mana,

ngo ukize aboro bo mu gihugu.

10Ni ukuri ubushangashirwe bwawe ku bantu butuma uhimbazwa,

kandi amasigarira y’uburake bwawe azogukikiza.

11Girana amasezerano n’Uhoraho Imana yawe kandi uyashitse;

kandi ibihugu bihakikije

nibizane ingabire kuri Imwe ikwiye kwubahwa

12Acisha bugufi abatware;

yubahwa n’abami bose bo kw’isi.