Zaburi 64

Yahawe umukuru w’abaririmvyi. Ni Zaburi ya Dawidi.

1Mana yanje, urumva ijwi ryanje ninagutakambira;

ukingire ubuzima bwanje kuko umwansi anteye ubwoba.

2Mpisha unkize inama z’abanyakibi,

unkize imigabo mibi y’inkozi z’ikibi.

3Bakarisha indimi zabo nk’inkota

batumbereza amajambo yabo mabi nk’imyampi yica.

4Barasa uwutagira icaha bamwibundiye;

bamutera atiteguye, badatinya.

5Baterana intege mu migambi yabo mibi,

bakavugana ivy’imitego yo mu mpisho;

bakavuga bati: “Ni nde abibona?”

6Baja inama zo kurenganya abandi bakavuga bati:

“Twagize umugambi mwiza!”

Ni ukuri umutima w’umuntu uri n’ubugunge.

7Ariko Imana izobarasisha imyampi yayo;

bazokubitwa hasi giturumbuka.

8Azobasubiza ku mitwe amajambo yabo mabi

abashitseko uguhona;

abazobabona bose bazobazunguriza imitwe babacokora.

9Abantu bose bazotinya;

bazokwamamaza ibikorwa vy’Imana

batahure ivyo yakoze.

10Umugororotsi azonezererwa Uhoraho

amuhungireko;

abatunganye mu mitima bose bazomunezerererwa!