Zaburi 54

Yahawe umukuru w’abaririmvyi bavugira inanga. Ni masikili ya Dawidi. Ni igihe Abanyazifu bari bagiye kwa Sawuli bakavuga bati: “Mbega Dawidi ntiyinyegeje iwacu?”

1Mana, nunkize ku bw’izina ryawe;

ngwanira ku bw’inkomezi zawe.

2Mana, niwumve ugusenga kwanje;

niwumvirize amajambo y’akanwa kanje.

3Abansi bibona baje kuntera;

abicanyi bagomba kunyica;

abantu batababaye Imana.

4Ni ukuri Imana ni yo mutabazi wanje;

Uhoraho ni we anshigikira.

5Ikibi nigisubire ku bamvuga nabi;

mu bwizigirwa bwawe nubasangangure.

6Nzogushikanira ikimazi n’umutima ubikunze;

nzoshima izina ryawe, Uhoraho, kuko ari ryiza.

7Wantabaye mu magorwa yanje yose,

kandi amaso yanje yiboneye ukuneshwa kw’abansi banje.