Zaburi 52

Yahawe umukuru w’abaririmvyi. Ni masikili ya Dawidi. Aho Dowegi Umunyedomu yari yagiye kwa Sawuli akamubwira ati: “Dawidi yagiye mu nzu kwa Ahimeleki.”

1Ni kuki wirata ikibi, wa muhizi w’inkomezi?

Ni kuki wirata bukarinda bwira,

wa gatetereza mu nyonga z’Imana?

2Wewe ukora ivy’ubugunge,

ururimi rwawe ruja inama yo kwica;

rumeze nk’urwembe rwakarihijwe.

3Ukunda ikibi kukirutisha iciza,

ibinyoma ukabirutisha ukuvuga ukuri.

4Ukunda ijambo ryose ryo kwonona,

ewe wa rurimi rw’ingunge!

5Ni ukuri Imana izogushitsako uguhona kw’ibihe bidashira:

izoguhonyanga igukwege igukure mw’ihema ryawe;

izokurandura igukure mw’isi y’abazima.

6Abagororotsi bazobiraba batinye;

bazogutwenga, bavuge bati:

7“Ehe wa muntu

atigeze agira Imana ubuhungiro

ariko yishimiye ubutunzi bwiwe bwinshi

agashirwa hejuru n’uko yishe abandi!”

8Ariko jeho ndi nk’igiti c’umwelayo

gishurikira mu nzu y’Imana;

nzokwizigira urukundo rw’Imana rudashira

ibihe vyose.

9Nzokwama ndagushimira ivyo wakoze

ndi mu bizigirwa bawe.

Kandi nzokwizigira izina ryawe,

kuko izina ryawe ari ryiza.