Англунимос 5

Лэ Адамости порода

1Акэ э дума пала Адамо тай лэстерэ потомкуря.

Андо дес, кала о Дэл стердя лэ манушэс, Вов стердя лэс кацаво, сар о Дэл.

2Вов стердя лэ муршэс и лэ жувля и бахталисардя лэн. Андо кодва дес о Дэл акхарда лэн «мануш».

3Кала о Адамо прожудя 130 бэрша, лэстэ аракхадиля шаво, лэско образо, саво сас кацаво, сар вов, и вов дя лэсти алав Сифо. 4Тунче сар аракхадиляпэ о Сифо, о Адамо жудя 800 бэрша, и лэстэ сас инке шавэ и щея. 5Ся о жувимос лэ Адамоско сас 930 бэрша, и вов муля.

6Кала о Сифо прожудя 105 бэрша, лэстэ аракхадиля о Еносо. 7Тунче, сар аракхадиляпэ о Еносо, о Сифо жудя 807 бэрша, и лэстэ сас инке шавэ и щея. 8Ся о жувимос лэ Сифоско сас 912 бэрша, и вов муля.

9Кала о Еносо прожудя 90 бэрша, лэстэ аракадиля о Каинано. 10Тунче, сар аракхадиляпэ о Каинано, о Еносо жудя 815 бэрша, и лэстэ сас инке шавэ и щея. 11Ся о жувимос лэ Енососко сас 905 бэрша, и вов муля.

12Кала о Каинано прожудя 70 бэрша, лэстэ аракхадиля о Махалалэло. 13Тунче, сар аракхадиляпэ о Махалалэло, о Каинано жудя 840 бэрша, и лэстэ сас инке шавэ и щея. 14Ся о жувимос лэ Каинаноско сас 910 бэрша, и вов муля.

15Кала о Махалалэло прожудя 65 бэрша, лэстэ аракхадиля о Яредо. 16Тунче, сар аракхадиляпэ о Яредо, о Махалалэло жудя 830 бэрша, и лэстэ сас инке шавэ и щея. 17Ся о жувимос лэ Махалалэлоско сас 895 бэрша, и вов муля.

18Кала о Яредо прожудя 162 бэрша, лэстэ аракхадиля о Енохо. 19Тунче, сар аракхадиляпэ о Енохо, о Яредо жудя 800 бэрша, и лэстэ сас инке шавэ и щея. 20Ся о жувимос лэ Яредоско сас 962 бэрша, и вов муля.

21Кала о Енохо прожудя 65 бэрша, лэстэ аракхадиля о Мафусало. 22Тунче, сар аракхадиляпэ о Мафусало, о Енохо пхирэлас лэ Дэвлэса 300 бэрша, и лэстэ сас инке шавэ и щея. 23О Енохо дожудя жы каринг э 365 бэрша. 24О Енохо жувэлас лэ Дэвлэса, тунче лэс на ашыля, пала кода со о Дэл заля лэс.

25Кала о Мафусало прожудя 187 бэрша, лэстэ аракхадиля о Ламехо. 26Тунче, сар аракхадиляпэ о Ламехо, о Мафусало жудя 782 бэрша, и лэстэ сас инке шавэ и щея. 27Ся о жувимос лэ Мафусалоско сас 969 бэрша, и вов муля.

28Кала о Ламехо прожудя 182 бэрша, лэстэ аракхадиля шаво. 29Вов дя лэсти алав Ноё1 и пхэндя: «Вов дэла амэнди тэ отчиював андэ пхари бути пэ пхув, савяти о РАЙ дя амрая». 30Тунче, сар аракхадиляпэ о Ноё, о Ламехо жудя 595 бэрша, и лэстэ сас инке шавэ и щея. 31Ся о жувимос лэ Ламехоско сас 777 бэрша, и вов муля.

32Кала лэ Ноёсти ашыля 500 бэрша, лэстэ аракхадилэ шавэ о Симо, о Хамо тай о Яфето.