Англунимос 16

Агарь тай о Измаило

1Э Сара, э ромни лэ Аврамости, на анэлас лэсти бэятонэн. Латэ сас копэльница египтянка, ла акхарэнас Агарь. 2Э Сара пхэндя лэ Аврамости:

— О РАЙ на дя манди бэятонэн. Жа, пэрэсов лэ копэльницаса: можэ тэ авэл латар мандэ авэна бэяцэ. О Аврамо стердя кадя, сар пхэндя э Сара.

3Э Сара, лэсти ромни, ля пэстеря копэльница, ла египтянка Агарь, и отдя ла пэстерэ ромэсти. Кай кадва время Аврамо прожудя андо Ханаано дэш бэрша. 4Вов сутя ла Агаряса, и вой ашыля пхари. Кала э Агарь угангля, со вой пхари, вой парашыля тэ обжал пативаса пэстеря хулая. 5Тунче э Сара пхэндя лэ Аврамости:

— Ту дошало сан андэ кода, со вой терэл манди вырытимос. Мэ отдэм тути ла копэльница андо теро пато, и акана, кала вой угангля, со сыни пхари, парашыля тэ обжал ман пативаса. Мэк о РАЙ россындосарэла амэн туса.

6О Аврамо пхэндя:

— Вой же тери копэльница, тер ласа ся, со камэс.

Тунче э Сара ашыля кадя тэ тасавэл ла Агарь, со кодыя нашлятар латар.

7О Янголо лэ РАЕСКО аракхля ла Агаря андэ шуки пхув, найдур ла хаингатар, кадва хаинг сас пашэ катар о дром каринг о Шуро. 8Вов пушля:

— Агарь, копэльница ла Сарати, катар ту авиля и каринг жас?

— Мэ нашавтар мэрня хулаятар ла Саратар, — пхэндя вой.

9Тунче о Янголо лэ РАЕСКО пхэндя лати:

— Рисав каринг тери хулаи и кандэ ла.

10И инке пхэндя о Янголо РАЕСКО лати:

— Мэ стерава кадя, со тутэ авэла бут бэятонэн, со лэн нащи авэла тэ пэрэадинос.

11Инке о Янголо лэ РАЕСКО пхэндя лати:

— Ту екхатар сан пхари и анэса шавэс. Дэ лэсти алав Измаило1, пала кода со о РАЙ ашундя пала терэ дукха.

12Вов авэла, сар дыко осло:

вов авэла пэ саворэн,

и саворэ авэна пэр лэстэ.

Вов авэла тэ жувэл андо холи

пэстерэ пхралэнца2.

13Вой дя алав лэ РАЕСТИ, Саво дэлас дума ласа, Эл-Рои3, пала кода со вой пхэндя:

— Екхатар мэ дикхлэм Колэс, Ко дикхэл ман.

14Акэ состар кодылати хаингати динэ алав Бээр-Лахай-Рои4. Вой и инке исы котэ, машкара Кадэшо тай Бередо.

15Э Агарь андя лэ Аврамости шавэс, и о Аврамо дя лэ шавэсти, савэс вой андя, алав Измаило. 16Кала э Агарь андя лэсти лэ Измаилос, лэ Аврамости сас охтодэша шов бэрша.