Англунимос 15

О Дэл дэл завето лэ Авраамости

1Тунче о РАЙ сыкадяпэ лэ Аврамости андо дикхлимос тай пхэндя:

— На дара, Аврамо. Мэ сым теро щито, Мэ дава тути баро потинимос.

2О Аврамо пхэндя:

— О Хулай, РАЙ, со Ту инке тэ дэс манди, сар кай мандэ нинай бэяцэ, и ся мэрно хулаимос доросэлапэ шавэсти Мэшэкоско, Элиезерости Дамаскоско?

3О Аврамо инке пхэндя:

— Ту на дян манди бэятонэн, и о копэли, саво аракхадиляпэ андо мэрно чер, прилэла ся мэрно хулаимос.

4Пэ лэсти дума сас о алав лэ РАЕСТАР:

— Най, вов на прилэла теро хулаимос. Прилэла кодва, ко аракхадёлапэ тутар.

5О РАЙ виндярдя лэс аврял и пхэндя:

— Дикх по нэбо и пэ чергая, скати лэн! Ту пэрэангичеса лэн? — И пхэндя лэсти: — Акэ скати тутэ авэна бэяцэ.

6О Аврамо патяя лэ РАЕСТИ, и о РАЙ заангичля када лэсти андо чячимос. О РАЙ пхэндя:

7— Мэ сым о РАЙ, Саво виндярдя тут анда Уро халдеенго, соп тэ дав тути андо хулаимос кадыя пхув.

8Но о Аврамо пушля:

— О Хулай, РАЙ, сар мэ уганава, со кадыя пхув ашэла мэрно хулаимос?

9О РАЙ пхэндя лэсти:

— Ан Манди тринэбэршэндеря гуруня, тринэбэршэндеря бузня и тринэбэршэндерэс бакрэс, и кадя ж ан горлица тай тэрнэс голубос.

10О Аврамо кадя и стердя. Вов росшындя лэн по епаш и ростходя э епаша екх англа екхатэ, ай лэ черэклян на росшындя по епаш. 11И привурянас барэ черэкля тэ хан э мулэ маса, ай о Аврамо отдаравэлас лэн.

12Сар ашыля тэ бэшэл о кхам, по Аврамо дя састо совимос и змэкляпэ пэр лэстэ баро калимос и напэля пэр лэс бари дар. 13О РАЙ пхэндя лэсти:

— Ган жэ, со терэ бэяцэ авэна найчяченца андэ найпэстери пхув, лэн терэна копэлэнца и авэна тасавэн лэн штаршэла бэрша. 14Но Мэ сындосарава колэн манушэн, савэ терэна лэн копэлэнца, и тунче вонэ вижана котар барэ барвалимаса. 15Ай ту мэрэса андо миро и жасатар каринг тери порода, тут гаравэна, кала авэса фартэ пхуро. 16Кардэ рисайвэна кати штарто родо терэ бэятонэн, пала кода со екхатар э бэзэхоско кхоро лэ амореенго инке на допхэрдиля кай упралимос.

17Кала бэшля о кхам и ашыля калимос, и акэ авилэ яг и пири пхабардэ янгарэса и тхуваса. Вонэ прожылэ машкара епаша котора. 18Андэ кодыва дес о РАЙ дя о завето лэ Аврамости и пхэндя:

— Мэ отдав терэ бэяцэнди кадыя пхув, анда египтонстери лэн жы каринг э бари лэн Евфрато: 19э пхув лэ кенеенди, лэ кенизеенди, лэ кадмонеенди, 20лэ хетеенди, лэ перизеенди, лэ рефаенди, 21лэ амореенди, лэ ханаанеенди, лэ гиргашэенди, тай лэ евусеенди.