Gurbet Bible
Sudije 15
O Samson marol pe e Filistejcurencar
Tegani pale gova, kana sasa o vreme te ćidol pe o điv, o Samson lija jekhe buzore thaj đelo te dićhol pe romnja.
Phenda: “Džav te sovav me romnjasa ani laći soba.” Al lako dad ni mukhlja le te džal andre.
Lako dad phenda: “Dijem gođi kaj tu ni manđe la vadži thaj dijem la će ćirvese. Dal laći po terni phen naj po lačhi latar? Le laće pheja romnjaće umesto late.”
O Samson phenda lese: “Akava drom ni ka avav bango kana ka ćerav e Filistejcurenđe bilačhipe!”
Tegani đelo gothar thaj dolda trišele (300) lisicen, pa duj po duj phanglja len lenđe porikencar a maškare porika phanglja po jekh baklja. Pale gova phabarda e baklje thaj mukhlja e lisicen ano polje kaj si o điv e Filistejcurengo. Gija phabarda e snopura taro điv thaj o điv savo ni sasa vadži ćidimo, thaj e vinogradura thaj e maslinjakura.
Kana e Filistejcura pučlje: “Ko kava ćerda?”, phende lenđe: “O Samson, o džamutro kole manušeso andari Timna, golese so lije lese romnja thaj dije la lese ćirvese.”
Tegani e Filistejcura uštile thaj phabarde la thaj i laće dade.
O Samson pe gova phenda lenđe: “Gija so ćerden, ni ka ačhav dži kaj ni osvetiv man tumenđe.”
Vov zurale čalada pe Filistejcura thaj buten mudarda. Pale gova đelo te bešol ani jekh pećina, ki Etamsko stena.
O Samson pobedil e Filistejcuren
E Filistejcura avile thaj ćerde logori ani Juda thaj lije te spremin pe te napadin o foro Lehi.
E Judejcura pučlje len: “Sose aviljen te maren tumen amencar?”
Von vaćarde lenđe: “Aviljam te phanda e Samsone thaj te ćera lese kova so vov ćerda amenđe.”
Tegani trin milje (3 000) Judejcura đele dži i pećina ki Etamsko stena thaj phende e Samsonese: “Tu li ni džane so e Filistejcura vladin amencar? So ćerdan amenđe gova?”
O Samson vaćarda: “Ćerdem samo kova so von ćerde manđe.”
E Judejcura phende lese: “Aviljam te phanda tut thaj te da tut ane vasta e Filistejcurenđe.”
O Samson phenda lenđe: “Xan sovli kaj tumen korkore ni ka mudaren man.”
Von phende lese: “Ni ka mudara tut. Samo ka phanda tut thaj ka da tut ane lenđe vasta.”
Tegani phanglje le duje neve dorikencar thaj inđarde le tari Etamsko stena. Kana resle dži o foro Lehi, e Filistejcura pojdisade premalo Samson thaj lije te den vika taro radost. Tegani po Samson ulilo o Duxo e GOSPODESO, pa e dorika ke lese vasta ćerdile sar lanena thava phabarde jagasa, thaj e dorika pele lese tare vasta. Gothe dikhlja jekh sirovo vilica taro mulo her, dolda la thaj lasa mudarda milja (1 000) Filistejcuren.
O Samson tegani phenda:
“E herese vilicasa
manušen pi kupa čhudijem,
e herese vilicasa
miljen mudardem.”
Kana gova phenda, čhudija goja vilica pestar, a gova than akharda Ramat-Lehi.1
A sar sasa but trošalo, vazdija po glaso premalo GOSPOD thaj phenda: “Manđe, ćire slugase, dijan kaja bari pobeda. Pa akana li te merav trošalo thaj te perav ane vasta e biobrezimenđe?”
Tegani o Dol putarda jekh šupljina ani phuv, ano foro Lehi, thaj gothar iklilo paj. Kana o Samson pilja paj, irisajlo lese o zuralipe thaj vov džuvdinisajlo. Golese gova izvori akharda En-Hakore.2 Gova izvori i avđive postojil ano Lehi.
O Samson sasa sudija ano Izrael biš (20) berš, ano vreme kana vladisade e Filistejcura.
Source notes (2)
- Footnote Ramat-Lehi Ko original kava značil: “E vilicako brego.”
- Footnote En-Hakore Ko original kava značil: “O izvori koleso savo vazdol po glaso.”
Gurbet Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.