Gurbet Bible
1. Samuilo 28
O Saul thaj i džuvli savi dikhljarol
Ane gova vreme e Filistejcura ćidije e vojska te bi čalavena po Izrael.
O Ahiš phenda e Davidese: “Trubul te džane kaj tu thaj ćire manuša ka džan ano maripe mancar thaj me vojskasa.”
O David pe gova phenda: “Tegani ka dićhe so me, ćiro sluga, šaj ćerav.”
O Ahiš vaćarda: “Šukar, ka čhuvav tut te ave manuš savo ka araćhol man sa dži kaj sem džuvdo.”
Kana o Samuilo mulo, sa o Izrael žalisada le, thaj prahosade le ano foro kaj bijandilo, ani Rama. A o Saul andari phuv angleder tradija kolen save akharena e duxuren thaj e dikhljarnen.
E Filistejcura ćidije pe, pa avile thaj ćerde logori ano Šunem, a o Saul ćidija sa o Izrael thaj ćerda logori ani Gilboa. Kana o Saul dikhlja o filistejsko logori, leso ilo lija zurale te marol tari dar. Golese pučlja e GOSPODE so te ćerol, al o GOSPOD khanči ni phenda lese ni ane sune, ni prekalo Urimsko bar, ni prekale prorokura.
Golese o Saul phenda pe službenikurenđe: “Araćhen manđe nesave džuvlja savi akharol e duxuren, te džav late thaj te pučav la so te ćerav.”
Von phende lese: “Isi jekh ano Endor.”
Tegani o Saul urada pe ane avera šeja te ne bi pindžarena le, pa raćasa vov thaj vadži duj manuša đele ki goja džuvli.
O Saul phenda laće: “Akhar manđe jekhe duxo. Vazde kole kaso alav ka vaćarav tuće.”
Al i džuvli phenda lese: “Džane li so o Saul ćerda – so andari phuv tradija kolen save akharena e duxuren thaj e dikhljarnen. Sose tegani čhuve manđe zamka te mudardivav?”
Tegani o Saul xalja sovli po GOSPOD: “Xama sovli po džuvdo GOSPOD, baše kava ni ka ave kaznimi.”
I džuvli tegani pučlja le: “Kas te akharav tuće?”
O Saul phenda: “Akhar manđe e Samuilo.”
Kana i džuvli dikhlja e Samuilo, dija vika andare sa o glaso thaj phenda e Saulese: “Sose xoxadan man? Pa tu san o Saul!”
A o caro phenda laće: “Ma dara. So dićhe?”
I džuvli phenda: “Dikhav e duxo sar ikljol andari phuv.”
O Saul pučlja: “Sar izgledil?”
A i džuvli phenda: “Ikljol purano manuš učhardo ogrtačesa.”
O Saul džanglja kaj si gova o Samuilo, pa pelo ke pe koča thaj poklonisajlo mujesa dži i phuv.
O Samuilo pučlja e Saule: “Sose uznemirisadan man? Sose akhardan man akate?”
O Saul phenda: “Ano baro bilačhipe sem. E Filistejcura maren pe protiv mande, a o Dol irisajlo mandar. Ni odgovoril manđe ni prekale prorokura, ni prekale sune, pa akhardem tut te vaćare manđe so te ćerav.”
O Samuilo phenda lese: “Sose puče man, akana kana o GOSPOD irisajlo tutar thaj si akana ćiro dušmano? O GOSPOD ćerda kova so vaćarda prekale mande: crdija o carstvo andare ćire vasta thaj dija le jekhese tare ćire pašutne, e Davidese. A sar ni šundan e GOSPODE thaj ni ikaldan lesi zurali holi pe Amalečanura, o GOSPOD ćerda tuće kava avđive. O GOSPOD ka dol o Izrael thaj tut ane vasta e Filistejcurenđe, a theara tu thaj će čhave ka aven mancar. O GOSPOD ka dol e Izraelese vojska ane vasta e Filistejcurenđe.”
Pe gova o Saul tari jekh drom pelo thaj pružisajlo ki phuv kobor si baro, golese so but darajlo tare Samuilese lafura. O zuralipe ačhada le, golese so gova đive thaj i rat khanči ni xalja.
Kana koja džuvli avili pašo Saul thaj dikhlja kaj but darajlo, phenda lese: “Ek me, ćiri sluškinja, šundem tut. Čhutem mo džuvdipe ki kocka thaj ćerdem kova so phendan manđe. A akana, tu šun man thaj mukh man te dav tut khanči te xa, te bi avola tut zor bašo drom.”
O Saul ni manglja thaj phenda: “Ni mangav te xav.”
Al i lese sluge lije te vaćaren sar i džuvli thaj vov šunda len, pa uštilo tari phuv thaj bešlo po than e pašljimaso.
E džuvlja ćhere sasa thulo terno guruv thaj sigate čhinda le. Lija aro, dospisada le bizo kvasco thaj peklja mangro. Tegani gova anda anglo Saul thaj angle lese sluge pa savore xalje. Ani goja rat uštile thaj đele.
Gurbet Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.