1. Samuilo 15

O maripe e Amalečanurencar

1O Samuilo phenda e Saulese: “Me sem kova kas o GOSPOD bičhalda te pomazil tut bašo caro pe leso narodo e Izraelcura. Golese akana, šun e lafura e GOSPODESE:

2Gija phenol o GOSPOD pe vojske: ‘Dikhljem so e Amalečanura ćerde e Izraelcurenđe kana čalade pe lende ko drom kana iklile andaro Egipat. 3Golese akana dža, čalav pe Amalečanura thaj uništi sa so isi len. Ma te ačhave khanika džuvde, nego mudar sa e muršen thaj e džuvljen, e čhavoren thaj kolen save pijen čuči, e guruven thaj e bakren, e kamilen thaj e heren.’”

4Tegani o Saul ćidija e vojska thaj đinda len ano Telaim. Andaro Izrael sesa dujšel milje (200 000) pešakura thaj deš milje (10 000) andari Judeja. 5Pale gova đelo dži o amalečansko foro thaj čhuta zaseda ani dolina.

6O Saul vaćarda e Kenejcurenđe: “Džan! Crden tumen tare Amalečanura, te ma uništiv tumen katane lencar! Golese so tumen šukar ćerden sa e Izraelcurencar kana iklile andaro Egipat.”

Gija e Kenejcura crdije pe tare Amalečanura.

7Tegani o Saul čalada pe Amalečanura tari Havila dži o Šur, savo si istočno taro Egipat. 8E Agage, e amalečkone caro dolde džuvde, a sa e manušen mudarde mačosa. 9Al o Saul thaj i vojska ni mudarde e Agage, ni e emšukare cikne stoka thaj e guruven, e thule terne guruvnjen thaj e bakroren thaj sa aver so sasa vredno. Gova ni manglje te uništin, nego uništisade sa so sasa bezvredno thaj bišukar.

10Tegani o lafi e GOSPODESO avilo e Samuilese: 11“Žal manđe so čhutem e Saule bašo caro, golese so irisajlo mandar thaj ni ćerda kova so phendem lese.”

E Samuile dolda i holi, pa celo goja rat ruja thaj molisajlo e GOSPODESE.

12Theara đive o Samuilo rano ki sabalin đelo te araćhol pe e Saulesa, al phende lese: “O Saul đelo ano Karmel. Odori pese ano čast vazdija spomeniko, pa gothar đelo tele ano Gilgal.”

13Kana o Samuilo reslo odori, o Saul phenda lese: “O GOSPOD te blagoslovil tut! Ćerdem kova so o GOSPOD phenda manđe!”

14A o Samuilo phenda: “Te si čače gija, sar tegani šunav e bakren thaj e stoka?”

15O Saul phenda: “Ande len tare Amalečanura, golese so i vojska ni mudarda emšukar tare bakre thaj tare guruva, te bi anena len sar žrtva e GOSPODESE, ćire Devlese. A sa aver, dži o krajo uništisade.”

16O Samuilo phenda: “Ačh! Mangav te phenav tuće so phenda manđe o GOSPOD erat.”

A o Saul phenda: “Vaćar.”

17O Samuilo phenda: “Kana vadži ni sana khanči ane ćire jakha, na li postanisadan šoro pe Izraelska plemenura? O GOSPOD pomazisada tut bašo caro e Izraeleso. 18O GOSPOD bičhalda tut ano maripe, thaj phenda tuće: ‘Dža thaj dži o krajo uništi kova grešno narodo, e Amalečanuren. Mar tut lencar dži kaj sa ni uništi len.’ 19Sose ni šundan e GOSPODE nego čaladan po pleno thaj ćerdan kova so naj šukar ane GOSPODESE jakha?”

20A o Saul phenda e Samuilese: “Al me šundem e GOSPODE. Đeljem ano maripe ane savo bičhalda man o GOSPOD, dži o krajo uništisadem e Amalečanuren thaj andem lenđe e caro e Agage. 21I vojska lija e bakren thaj e guruven sar pleno, emšukar tare kova so trubuja te uništil pe dži o krajo, te bi dena len ano Gilgal sar žrtva e GOSPODESE, ćire Devlese.”

22Al o Samuilo phenda lese:

“Dal si e GOSPODESE pošukar

čhinde thaj phabarde žrtve

nego poslušnost?

Pošukar si te šunol pe nego te žrtvujil pe,

thaj o pokornost si pošukar tare bakresi khoj.

23Golese so si i pobuna greh, sar o dikhljaripe,

a o tvrdoglavost sar bilačhipe taro idolopoklonstvo.

Golese so čhudijan e GOSPODESO lafi,

o GOSPOD čhudija tut sar caro.”

24Tegani o Saul phenda e Samuilese: “Grešisadem. Phagljem e GOSPODESO zapovest thaj kova so tu vaćardan manđe. Daraljem tari vojska pa šundem len. 25Golese akana, moliv tut, oprosti mingro greh thaj iri tut mancar, te perav ke koča e GOSPODESE.”

26Al o Samuilo phenda lese: “Ni ka iriv man tusa, golese so čhudijan o lafi e GOSPODESO, thaj o GOSPOD golese čhudija tut sar caro e Izraeleso.”

27Kana o Samuilo irisajlo te džal pese, o Saul dolda le taro ogrtači thaj čhinda jekh rubo lestar.

28Tegani o Samuilo phenda lese: “Avđive o GOSPOD čhinda tutar o izraelsko carstvo thaj dija le jekhese tare ćire pašutne, savo si pošukar tutar. 29O Dol, i Slava e Izraelesi, ni xoxavol thaj ni predomislil pe, golese so vov naj manuš, te bi predomislila pe.”

30O Saul phenda: “Grešisadem. Al moliv tut, sikav manđe čast angle šorutne mingre narodose thaj anglo Izrael: iri tut mancar te perav ke koča e GOSPODESE, ćire Devlese.”

31Gija o Samuilo irisajlo e Saulesa, thaj o Saul pelo ke koča anglo GOSPOD.

32Pale gova o Samuilo phenda: “Anen manđe e Agage, e caro e Amalečanurengo.”

O Agag avilo dži leste phanglo ane sinđira thaj dija gođi: “Nakhlo paše mande o ćerko meripe!”

33O Samuilo phenda: “Sar so ćiro mačo bute romnjenđe lija e čhaven, gija i ći dej akana ka ačhol bize čhave.”

Tegani o Samuilo čhinda e Agage anglo GOSPOD ano Gilgal.

34Pale gova o Samuilo đelo ani Rama, a o Saul irisajlo ćhere ani Giva e Saulesi. 35Sa dži ko meripe o Samuilo ni đelo vadži te araćhol pe e Saulesa, al ruja pale leste.

A e GOSPODESE sasa žal so čhuta e Saule bašo caro e Izraeleso.