Sudije 1

E Judasko thaj e Simeonesko pleme astaren e Adoni-Bezeko

1Nakon so mulo o Isus Navin, e Izraelcurja pučline e GOSPODE: “Ko džala amendar prvo te boril pe protiv e Hanaacurja?”

2A o GOSPOD phendas: “Neka džal e Judasko pleme. Ake, dijem akaja phuv ande lenđe vas.”

3Askal e manuša andar e Judasko pleme phendine pire phralenđe andar e Simeonesko pleme: “Ajden amenca ande phuv savi si amenđe e kockava dini te zajedno bori men protiv e Hanaacurja. Askal amen džasa tumenca ande phuv savi si tumenđe dini.”

Thaj e Simeonesko pleme đelo lenca.

4Kana e Judasko pleme đelo opre, o GOSPOD dija e Hanaancen thaj e Perižanen ande lenđe vas. Von mudardine deš milje manušen ko gav Bezek. 5Okote dine po Adoni-Bezek thaj borisajle lenca. Pobedisardine e Hanaancen thaj e Perižanen, 6ali o Adoni-Bezek našlo. Von teljardine pala leste, astardine les thaj čhindine lešće palcurja pe lešće vas thaj pe lešće pungre.

7O Adoni-Bezek phendas: “Eftavardeš carurja savenđe sas čhinde e palcurja pe vas thaj pe pungre ćidenas prušuka tale mungri sinija. Sar me ćeravas, gajda o Del boldas manđe.”

Askal inđardine les ando Jerusalim thaj okote mulo.

E Judako pleme zauzmil o Jerusalim thaj o Hevron

8E Judako pleme napadnisardas vi o Jerusalim thaj zauzmisardine les. E manušen save trajinas ando Jerusalim mudardine e mačosa thaj dine jag o gav.

9Posle godova e Judasko pleme đelo te boril pe protiv e Hanaacurja save trajinas ande gore, ande pustinja Negev thaj ande ravnica karingal o zapad. 10Napadnisardine e Hanaancen save trajinas ando Hevron, savo majsigo akhardolas Kirjat-Arba, thaj pobedisardine e Šešaje, e Ahimane thaj e Talmaje.

O Otniel zauzmil o Devir

11Okotar teljardine pe manuša save trajinas ando Devir, savo majsigo akhardolas Kirjat-Sefer.

12O Kalev phendas: “Dava mungre čhora e Ahsa pale romnji okole manušešće savo napadnila o Kirjat-Sefer thaj zauzmil les.”

13Thaj zauzmisarda les o Otniel, o čhavo e Kenazesko, a o Kenaz sas phral e Kalevesko. Thaj o Kalev dija les pire čheja e Ahsa pale romnji.

14Kana udajisali palo Otniel, voj nagovorisarda les te rodel o polje katar lako dad.

E Ahsa đelitar dži ke piro dad, a kana fuljili katar o magarco, o Kalev phučla lat: “So kames?”

15A voj phendas: “Moliv tut, blagoslovisar man! Kana dijan man e šući phuv ande južno pustinja, de man vi e izvorja e pajenca.”

Gajda vo dija lat vi e oprune vi e telune izvorja.

E Judejenđi pobeda thaj e Venijaminengo poraz

16E potomkurja katar e Mojsijesko sokro, savo akhardolas Kenije, teljardine e Judašće plemenosa andar o Jerihon1 opre ande Judejsko pustinja Negev, paše ko Arad, pa naselisajle maškar o them savo trajilas okote. 17E Judasko pleme đelo pire phralenca andar e Simeonesko pleme thaj mudardine e Hanaancen save trajinas ando Cefat. O sasto gav uništisardine thaj zbog godova akhardine les Horma2. 18E Judako pleme zauzmisarda vi e Gaza, o Aškelon, o Ekron thaj e područja oko lende.

19O GOSPOD sas e Judaće plemenosa thaj von zauzmisardine o gorje. Ali e manušen save trajinas ande dolina našti tradine andar e phuv zato kaj sas len sastrune borbene vordona. 20Sago kaj o Mojsije obećisarda, o Hevron dine e Kaleve, savo andar leste trada trin Anakošće potomkonen.

21A e Venijaminesko pleme či trada e Jevusejcen save trajinas ando Jerusalim, gajda kaj von vi ađes trajin ando Jerusalim e Venijaminešće plemenova.

E Josifešće potomkurja osvojin o Betel

22E Josifešće plemenurja napadnisardine o Betel thaj o GOSPOD sas lenca.

23Dok izvidinas o Betel, savo majsigo akhardolas Luz, 24e manuša save izvidinas o gav dikhline jećhe manuše sar inkljel andar o gav, pa phendine lešće: “Sikav amenđe sar te das andre ando gav thaj amen avasa milostive prema tute.”

25Vo sikada lenđe sar te den ando gav, thaj von e mačesa mudardine e manušen save trajinas ando gav, ali godole manuše thaj lešće familija či mudardine. 26Godova manuš đelo ande phuv e Hetitonenđi, okote sagradisardas gav thaj akharda les Luz, savo gajda akhardol vi ađes.

E themen saven e Izraelcurja či tradine andar e phuv

27E Manasijesko pleme našti trada e manušen save trajinas ande akala gava: Bet-Šean, Taanah, Dor, Jivleam, Megido thaj andar e naselime thana oko lende. Zato kaj e Hanaacurja odlučisardine te ačhen te trajin ande godoja phuv. 28Kana e Izraelcurja zurajle, tradenas e Hanaancen te ćeren bući pale lende, ali našti tradine sa len andar godoja e phuv.

29Ni e Efremesko pleme našti trada e Hanaancen save trajinas ando Gezer, pa godola Hanaacurja ačhile te trajin maškar lende.

30Ni e Zavulonesko pleme našti trada e Hanaancen save trajinas ando Kitron thaj ando Nahalol, pa e Hanaancurja ačhile te trajin maškar e Zavulonesko pleme sago lenđe roburja.

31Ni o Asiresko pleme našti trada e manušen save trajinas ande akala gava: Ako, Sidon, Ahlav, Ahziv, Helba, Afik, thaj Rehov. 32Gajda e Asiresko pleme trajilas maškar e Hanaancurja save već trajinas okote, zato kaj našti trada len.

33Ni e Neftalimesko pleme našti trada e manušen save trajinas ando Bet-Šemeš thaj ando Bet-Anat. Trajinas maškar e Hanaancurja save već okote trajinas. Ali e manuša andar o Bet-Šemeš thaj andar o Bet-Anat postanisardine lenđe roburja.

34E Amorejcurja tradine e Danesko pleme te trajin ando gorje thaj či denas len te fuljen tele ande dolina. 35E Amorejcurja odlučisardine te ačhen ande gora Heres, thaj ande gava Ajalon thaj Šaalvim. Ali kana e Josifešće plemenurja zurajle, tradine e Amorejcen pe sila te aven lenđe roburja. 36E granica katar e Amorejcurja džalas katar o brego Akrabim dži ko Sela, pa još majopre.