1. Samuilo 6

E Filistejcurja bolden o Kovčeg e savezosko

1E GOSPODESKO Kovčeg već efta čhon sas ande filistejsko phuv. 2E Filistejcurja akhardine e rašajen thaj e vračaren thaj phučline len: “So te ćeras e GOSPODEŠĆE Kovčegeja? Phenen amenđe sar te boldas les pe lesko than?”

3Von phendine lenđe: “Ako bolden o Kovčeg e Izraelošće Devlesko, na bolden les bi khančesko. Uz leste bičhalen vi žrtveno daro palo jartipe. Tek askal sastona thaj džanena sostar lengo Del kaznilas tumen.”

4E Filistejcurja pe godova phučline: “A sosko žrtveno daro te bičhalas?”

A von phendine lenđe: “Pošto si pandž filistejske vladarja, bičhalen pandž sunakune čirurja thaj pandž sunakune parcovurja, kaj isto pošast pogodisardas vi tumen thaj tumare vladaren. 5Katar o sunakaj ćeren likurja e čironenđe thaj e parcovenđe save harin e phuvjasa, thaj den čast e Izraelošće Devlešće. Šaj kaj askal majbut či kaznila tumen, tumare devlen thaj tumari phuv. 6Na aven tvrdoglave sago kaj sas e Egipćanurja thaj o faraon. Kana kaznisarda len, či mukline e Izraelcen te džantar?”

7“Akana dakle, ćeren nevo vordon thaj len duj gurumnja save otelisajle, ali još či inđarenas o jarmo. E gurumnjen upregnin ande vordon, a lenđe ternen inđaren palpale ande štala. 8Askal len e GOSPODESKO Kovčeg thaj čhon les po vordon, a paše leste čhon o mohto e sunakune predmeturja save den sago žrtveno daro palo jartipe. Sa godova bičhalen po drom. 9Ali, o vordon inćaren pe jak. Ako teljarel prema piri phuv, e dromesa karingal o Bet-Šemeš, godova o GOSPOD ćerda akava baro bilačhi pe amende. Ali, ako či teljaren inća, askal džanasa kaj či kaznisarda men vo, nego akava dogodil pe amenđe korkoro pestar.”

10E Filistejcurja gajda vi ćerdine. Line duj gurumnja save otelisajle thaj upregnisardine len ando vordon, a e gurumnjenđe ternen phandadine ande štala. 11Po vordon čhutine e GOSPODESKO Kovčeg thaj paše leste o mohto e sunakune likonenca katar e parcovurja thaj e čirurja. 12E gurumnja teljardine pravo e dromesa karingal o Bet-Šemeš. Inćarenas pe ke godova drom, ni cara či banđarenas lestar ni levo ni desno thaj stalno rkninas, a e filistejske vladarja džanas pale lende sa dži ko krajo e gavesko Bet-Šemeš.

13E manuša andar o Bet-Šemeš baš askal sas ando polje thaj kosinas o điv. Kana dikhline o Kovčeg, raduisajle thaj teljardine angle leste. 14A o vordon areslo ando polje e Jošuasko andar o Bet-Šemeš thaj ačhiline pašo baro bar. E manuša askal phagline e kaš katar o vordon, a e gurumnjen prinesisardine e GOSPODEŠĆE sago žrtva paljenica. 15E Leviturja fuljardine e GOSPODESKO Kovčeg thaj o mohto ande savo sas e sunakune predmeturja, pa sa čhutine pe okova baro bar. Godova đes e manuša andar o Bet-Šemeš prinesisardine e GOSPODEŠĆE žrtve paljenice thaj aver žrtve. 16Okola pandž filistejske vladarja dikhline sa so sas thaj isto đes boldine pe ando Ekron.

17E pandž sunakune čirurja save e Filistejcurja bičhaldine sago žrtveno daro palo jartipe e GOSPODEŠĆE sas pale filistejske gava: jek palo Ašdod, jek pale Gaza, jek palo Aškelon, jek palo Gat thaj jek palo Ekron. 18E sunakune parcovurja sas gaći sago vi e filistejske utvrdime gava e okolne gavenca. A okova baro bar pe savo čhutine e GOSPODESKO Kovčeg vi ađes ačhel po polje e Jošuasko andar o Bet-Šemeš.

19Ali o GOSPOD mudardas pandžvardeš milje thaj eftavardeš džene andar o Bet-Šemeš, kaj dikhline ando Kovčeg e GOSPODESKO, a nas rašaja. O them tuguilas zbog godova kaj o GOSPOD gajda phare kaznisardas len.

20Pale godova, e manuša andar o Bet-Šemeš phučline: “Ko šaj ačhel anglo GOSPOD, godova sveto Del? Kašće akana akatar o Kovčeg džala?”

21Askal bičhaldine e manušenđe andar o Kirjat-Jearim e glasnikonen e porukasa: “E Filistejcurja boldine o Kovčeg e GOSPODESKO. Aven thaj inđaren les tumende.”