1. Samuilo 31

E Saulesko smrto

1E Filistejcurja napadnisardine o Izrael, thaj e but Izraelcurja, dok našenas angle lende, sas mudarde pe gora Gilboa. 2E Filistejcurja ćićidine e Saul thaj lešće čhaven ande borba. Mudardine lešće čhaven: e Jonatane, e Avinadave thaj e Malki-Šue. 3E borba oko Saul postanilas sa majzurali, a kana aresline les e strelcurja, phare ranisardine les.

4Askal o Saul phendas pire štitonošešće: “Inkal ćiro mačo thaj pusav man, te na aven akala biobrezime te pusaven man thaj te mučin man.”

Ali o štitonoša či kamla, kaj but daralas. Askal o Saul lijas o mačo thaj pusada pe lesa. 5A kana o štitonoša dikhla kaj o Saul si mulo, vi vo čhuda pe po piro mačo thaj mulo e Saulesa. 6Gajda o Saul, lešće trin čhave, lesko štitonoša thaj sasti lešći vojska sas mudarde zajedno godova isto đes.

7E Izraelcurja save trajinas pe aver rig e dolinatar thaj okola prekal e reka Jordan, ašundine kaj e Izraelošći vojska našlitar thaj kaj si o Saul thaj lešće čhave mudarde. Askal mukline pire gava thaj našline, a e Filistejcurja avile thaj nastanisajle ande lenđe gava.

8Kana thejara đes e Filistejcurja avile te pljačkin okolen saven mudardine, arakhline e tela katar o Saul thaj katar lešće čhave sar pašljon pe gora Gilboa. 9Čhindine e Saulesko šoro, fuljardine lestar o oružije thaj bičhaldine e glasnikonen pe filistejsko phuv te objavin e nevimata ando hramo lenđe idolengo thaj maškar o them. 10E Saulesko oružije čhutine ando hramo savo posvetisardine e Astartenđe, a lesko mulo telo ungladine pe gavesko zido ando Bet-Šan. 11Kana e manuša andar o Javeš-Gilad ašundine so e Filistejcurja ćerdine e Saulešće, 12e majhrabre lendar teljardine ando Bet-Šan. Phirenas sasti rjat. Fuljardine e Saulesko telo thaj e tela lešće čhavenđe katar o zido, pa boldine pe ando Javeš kaj dine jag lenđe tela. 13Askal line lenđe kokala thaj prahosardine len talo kaš tamarisk ando Javeš thaj postinas efta đes.