Matej 1

E Hristoskere predcija

1Akavaj o spisako taro parapapija e Isuse Hristoskere, o Čhavo e Davideskoro, o Čhavo e Avraameskoro:

2e Avraameske bijandilo o Isak,

e Isakoske bijandilo o Jakov,

e Jakoveske bijandilo o Juda hem o phrajla leskere,

3e Judaske e Tamaraja bijandile o Fares hem o Zara.

E Fareseske bijandilo o Esrom,

e Esromeske bijandilo o Aram,

4e Arameske bijandilo o Aminadav,

e Aminadaveske bijandilo o Naason,

e Naasoneske bijandilo o Salmon.

5E Salmonske e Raavaja bijandilo o Vooz,

e Voozeske e Rutaja bijandilo o Ovid,

e Ovideske bijandilo o Jesej,

6e Jesejeske bijandilo o car David.

A e Davideske bijandilo o Solomon, a i daj leskiri sine i purani romni e Urijaskiri.

7E Solomoneske bijandilo o Rovoam,

e Rovoameske bijandilo o Avija,

e Avijeske bijandilo o Asa,

8e Asaveske bijandilo o Josafat,

e Josafateske bijandilo o Joram,

e Jorameske bijandilo o Ozija,

9e Ozijaske bijandilo o Joatam,

e Joatameske bijandilo o Ahaz,

e Ahazeske bijandilo o Ezekija,

10e Ezekijaske bijandilo o Manasija,

e Manasijaske bijandilo o Amon,

e Amoneske bijandilo o Josija,

11e Josijaske bijandilo o Jehonija hem o phrajla leskere ko vreme koga o narodo tari Judeja preselisalilo ko Vavilon.

12A palo Vavilonsko preselibe e Jehonijaske bijandilo o Salatiil,

e Salatiileske bijandilo o Zorovavel,

13e Zorovaveleske bijandilo o Aviud,

e Aviudeske bijandilo o Elijakim,

e Elijakimeske bijandilo o Azor,

14e Azoreske bijandilo o Sadok,

e Sadokeske bijandilo o Ahim,

e Ahimeske bijandilo o Eliud,

15e Eliudeske bijandilo o Eleazar,

e Eleazareske bijandilo o Matan,

e Mataneske bijandilo o Jakov.

16E Jakoveske bijandilo o Josif, o rom e Marijakoro, so bijangja e Isuse, soj tano o Hristos.

17Agjar sine dešuštar generacije taro Avraam dži ko David, dešuštar taro David dži ko preselibe ko Vavilon, hem dešuštar taro Vavilonsko preselibe dži ko Hristos.

O bijanibe e Isuseskoro

18A o bijanibe e Isuse Hristoskoro sine agjar: Leskiri daj i Marija sine manglardi e Josifeske, ama pred te len pe, oj ačhili khamni taro Sveti Duh. 19Lakoro rom, o Josif sine pravedno manuš, i adaleske so na mangla te ladžakerel la javno anglo sarine, mangla te mukhel la tajno.

20Ama koga razmislingja te kerel adava, o angjeli e Gospodareskoro alo leske ko suno hem phengja leske: “Josif, čhavo e Davideskoro, ma dara te le e Marija romnake, soske o čhavo soj ki late tano taro Sveti Duh. 21Oj ka bijanel čhavo, hem ka de le o anav Isus, soske ov ka spasinel pe narodo taro lengere grevija.”

22Sa adava ulo te phergjol adava so o Gospodari phengja preku o proroko:

23“Akje čhaj ka ačhol khamni

hem ka bijanel murš, hem ka vikinen le Emanuel”1,

(so značinela “O Devel amencar”).

24Koga uštilo o Josif, kergja agjar sar so phengja leske o angjeli e Gospodareskoro – hem lela e Marija romnake. 25Na pipingja la sa dži kote na bijangja i Marija e čhave. Hem togaš dengja le o anav Isus.