Dejla 28

O Pavle ki Malta

1Koga agjar spasingjem amen, doznangjem deka adava ostrov vikinela pe Malta. 2O manuša so živinena sine adathe sine but šukar prema amende. Šukar priminge amen hem tharge i jag, adaleske so počmingja te del bršim hem sine šudro. 3A koga o Pavle khedingja kupa kašta hem koga čhiga la ki jag, taro kašta iklilo sap, adaleske so sine tato hem astargja pe leske ko vas.

4Koga dikhle o manuša so živinena adathe sar o sap visinela leske ko vas, vakerge jekh jekheske: “Akava manuš sigurno tano ubijco. Spasingja pe taro more, ama i božica i Pravda na mukhela le te živinel.”

5A o Pavle tresingja e sape ki jag hem ništo na ulo leske. 6A ola sarinen adžikerena sine te šuvlol ili taro jekh puti te merel. Ama koga but adžikerge, dikhle deka e Pavleske nane ništo, promeninge po mislenje baši leske i počminge te vakeren deka ov tano devel.

7A paše uza ko adava than sine o imot e gradonačalnikoskoro taro adava ostrov so vikinela pe sine Poplij. Ov primingja amen ko po kher hem trin dive šukar ugostingja amen. 8Leskoro dad pašlola sine ki postela, adaleske so sine le treska hem bare dukha ko vogi. O Pavle khugja ki leste, molingja pe, i čhigja pe vasta upro leste hem sasljargja le. 9Palo adava počminge te aven hem javera nasvale taro ostrov hem sine sasljarde. 10Bašo adava ko but načinja sikavge deka poštojnena amen, i koga lelem te dža adale thanestar ola denge amen sa adava so trebela sine amenge.

O Pavle resela ko Rim

11Palo trin masek, khugjem ko nesavo brodi so sine tari Aleksandrija hem so nakhagja o jeven ko ostrov. A ki angluni strana sine znako taro devejla o bliznakija, o Kastor hem o Pluks. 12Agjar reslem ko gradi Sirakuza hem adathe ačhilem trin dive. 13Adathar plovingjem hem reslem ko Regijum. Tajsutno dive phudingja i bavlal taro jug, i duj divenge reslem ko gradi Potioli. 14Adathe arakhlem nesave vernikon so pokaninge amen te ačhova efta dive ki lende. I agjar reslem ko Rim: 15koga o vernikija taro Rim šunge deka avaja, iklile te resen pe amencar dži ko ploštad e Apieveskoro hem dži ko than Trin Gostilnice. Koga o Pavle dikhla len, blagodaringja e Devleske hem ohrabringja pe. 16Koga reslem ko Rim, e Pavle mukhle le te živinel korkori, ama leja sine jekh vojniko so pazinela le sine.

O Pavle propovedinela e Isusestar ko Rim

17Palo trin dive o Pavle vikingja e Evrejsko vodačen i koga khedinge pe vakergja lenge: “Phrajlalen iako ništo na kergjum protiv amaro narodo ni protiv o adetija amare parapapongoro, sijum sine astardo ko Erusalim hem predajmo e Rimjanenge. 18Ola ispitinge man hem mangle te mukhen, adaleske so na sijum sine krivo ništoske so zaslužinava meriba. 19Ama o Evreja protivinge pe, i me mora sine te rodav te sudinel pe mange anglo e Rimeskoro caro, ama na te tužinav me narodo. 20Adaleske rodingjum tumen te aven te kerav lafi tumencar, adaleske so baši mi vera ki nada e Izraeleskiri sijum phandlo akale lanconcar.”

21A ola odgovoringe leske: “Na dobingjem nisavo lil tutar tari Judeja hem ni jekh taro phrajla so ale adathar na phenge ništo lošno tutar. 22Ama amen mangaja tutar te šuna so mislineja, adaleske so džanaja deka protiv akaja sekta ko sa o thana vakerela pe.”

23I agjar ola dogovoringe jekh dive, i ko than kote so bešela sine o Pavle ale poviše lendar. Ov taro sabajle dži rakjate svedočinela sine lenge bašo carstvo e Devleskoro, a taro e Mojsijaskoro Zakoni hem taro o Prorokija probinela sine te uverinel len bašo Isus. 24Nesave sine sigurna ko adava so o Pavle vakerela sine, a javera na verujnge. 25I adaleske so na složinge pe maškar peste, ola počminge te džan peske koga o Pavle phengja lenge panda akava: “O Sveti Duh šukar phengja preku o prorok Isaija tumare parapaponge:

26‘Dža ko akava narodo hem phen lenge:

“Ka šunen, ama nikat nane te svatinen,

ka dikhen jakhencar, ama nikat nane te pendžaren.

27Soske akale manušengoro vilo ulo baralo,

phareste šunena kanencar

hem phandle pumare jakha,

te na dikhen jakhencar

hem te na šunen kanencar,

a vileja te na svatinen.

Adaleske našti te iranen pe ki mande

te sasljarav len.” ’1

28Adaleske, mangava te džanen deka akava spasenije e Devleskoro bičhavdo tano e manušenge taro javera nacije hem ola ka prifatinen le.” 29[A koga phengja adava, o Evreja gele peske ko baro akošiba maškar pumende.]

30A o Pavle ačhilo cela duj berša ko jekh kher kirijaja. Adathe primingja sarinen so avena sine ki leste te dikhen le. 31Ov propovedinela sine o carstvo e Devleskoro hem sikavela sine bašo o Gospodari o Isus Hristos – bizo dar hem bizo nikoj te čhinavel le.